07 Sep 2022, 08:49
ގިނަ ދުވަސްތަކަށްފަހު ޝާހުރުކް ޚާން އާއި ސަލްމާން ޚާން އެކުގައި ފެންނަ ފިލްމު 'ޓައިގާ 3'ގެ ޝޫޓިން ފެށުމަށް ތައްޔާރުވެއްޖެއެވެ.
މަނީޝް ޝަރްމާ ޑައިރެކްޓްކުރާ 'ޓައިގާ 3'ގެ ޝޫޓިން ފެށުމަށް ހަމަޖެހިފައިވަނީ މި މަހުއެވެ. މި ފިލްމުގައި ޝާހު ފެންނަނީ ސްޕެޝަލް އެޕިއަރެންސްއެއްގެ ގޮތުގައެވެ. ބޮލީވުޑް ހަބަރުތައް ބުނާގޮތުން މި ސީންތައް ޝޫޓު ކުރުމަށް މި ދެ ތަރިން އެކުގައި 10 ދުވަސް ހޭދަކުރާނެއެވެ. އަދި ފިލްމުގައި ފެންނަ ހާއްސަ މަންޒަރަކީ، ޝާހުގެ 'ޕަޓާން' ފިލްމުގެ ކެރެކްޓާގެ ގޮތުގައި ގެނެސްދޭ މަންޒަރެއް ކަމަށްވެއެވެ. މި ފިލްމު ރިލީޒް ކުރަން ހަމަޖެހިފައިވަނީ އަންނަ އަހަރު ކުރީކޮޅެވެ.
މިދިޔަ އަހަރު މާރިޗްގައި ޓައިގާ 3 ފިލްމުގެ މަސައްކަތް ފެށިއިރު، މި ފިލްމުގައި ލީޑް ރޯލުން ފެންނާނީ، ޓައިގާގެ ކުރީގެ ފިލްމުތައްވެސް ކުޅުނު ސަލްމާން އާއި ކެޓްރީނާ ކެެއިފްއެވެ. އަދި އެ ދެ ތަރިންނާއެކު އިމްރާން ހާޝްމީ ވެސް ވަނީ ލީޑަށް ކާސްޓުކޮށްފައެވެ.
ސަލްމާން އާއި ޝާހު ވެސް ދަނީ އެކި ފިލްމުތަކުގެ މަސައްކަތް މިހާރު ކުރަމުންނެވެ. އެގޮތުން، 'ކިސީކާ ބައި ކިސީކާ ޖާން' ގެ ޝޫޓިންގައި ސަލްމާން މަސައްކަތް ކުރަމުންދާއިރު، ކުރިއަށް ރިލީޒް ކުރަން ހުރި 'ޕަޓާން' އާއި 'ޖަވާން' އަދި 'ޑަންކީ'ގެ ޝޫޓިންގައި ޝާހު ދަނީ މަސައްކަތް ކުރަމުންނެވެ.
'އެކް ތާ ޓައިގާ' އާއި 'ޓައިގާ ޒިންދާ ހޭ' ގެ ސީކުއެލް ނެރެން ހަމަޖެހިފައިވަނީ އަންނަ އަހަރުގެ އޭޕްރީލް 21ގައެވެ.