20 Oct 2022, 12:40
ރީބްރޯޑްކާސްޓް ކުރުމުގެ ގަވާއިދަށް ގެނެވިފައިވާ އިސްލާހުތަކާ ގުޅޭގޮތުން ކަމާ ގުޅުން ހުރި ކުންފުނިތަކާ ބައްދަލު ކުރުމަށް ރައްޔިތުންގެ މަޖިލީހުގެ ގަވާއިދު ކޮމިޓީން ނިންމައިފިއެވެ.
ރާއްޖެއިން ބޭރުގެ ހިއްސާ އޮންނަ ކުންފުންޏަކަށް ރީބްރޯޑްކާސްޓް ނުކުރެވޭ ގޮތަށް ރީބްރޯޑްކާސްޓް ކުރުމުގެ ގަވާއިދަށް ބްރޯޑްކާސްޓިން ކޮމިޝަނުން ވަނީ އިސްލާހެއް ގެނެސްފައެެވެ. މެދުހެންވޭރު ދާއިރާގެ މެންބަރު އަލީ އާޒިމް ހުށަހެޅުއްވި އެ މައްސަލައާ ގުޅިގެން އިއްޔެ ވެސް ވަނީ އެ ކޮމިޓީގެ ބައްދަލުވުމެއް ބާއްވައިފައެވެ.
އިއްޔެ ބޭއްވި އެ ކޮމިޓީގެ 17 ވަނަ ބައްދަލުވުމުގައި ދިއްގަރު ދާއިރާ މެންބަރު އިކްރާމް ހަސަން ވަނީ އެ މައްސަލައާ ގުޅިގެން ކަމާގުޅުންހުރި ކުންފުނިތައް ކޮމިޓީއަށް ހާޒިރުކޮށް، ބައްދަލު ކުރުމަށް ހުށަހަޅާފައެވެ.
މެމްބަރުގެ އެ ހުށަހެޅުމަށް ތާއީދު ކުރައްވާ ފޭދޫ ދާއިރާގެ މެމްބަރު މުޙައްމަދު ނިހާދު ވިދާޅުވީ އެ މައްސަލައަކީ ވަރަށް ބޮޑު މައްސަލައެއް ކަމަށެވެ. އަދި މެންބަރު އިކްރާމު ހުށަހެޅުއްވިފަދައިން އެ ކުންފުނިތަކާ ކޮމިޓީން ބައްދަލު ކުރުމަކީ މުހިއްމު ކަމެއް ކަމަށް މެންބަރު ނިހާދު ވިދާޅުވިއެވެ.
އެ މައްސަލައާ ގުޅިގެން އެ ކޮމިޓީން ވަނީ ބްރޯޑްކާސްޓިން ކޮމިޝާނާ ވެސް ބައްދަލު ކޮށްފައެވެ. އެ ބައްދަލުވުމުގައި އެ ކޮމިޝަނުން ބުނީ ބޭރުގެ ހިއްސާ އޮންނަ ކުންފުނިތަކަށް ރީބްރޯޑްކާސްޓް ނުކުރެވޭގޮތަށް ގަވާއިދު ބަދަލުކުރީ ބްރޯޑްކާސްޓް ކުރުމުގެ ވިޔަފާރީގައި ރާއްޖޭގެ ބާރު ކުޑަވެދާނެ ކަމަށް ގަބޫލުކުރެވޭތީ ކަމަށެވެ.
ބްރޯޑްކޮމްގެ ނައިބު ރައީސް އަޙްމަދު ގައިސް ވިދާޅުވީ ކަމާގުޅުންހުރި ބޭފުޅުންގެ ޚިޔާލުތަކާއެކު އެ ގޮތަށް އެގަވާއިދު ބަދަލުކުރަން ނިންމީ ކަމަށެވެ. ބްރޯޑްކާސްޓް ކުރުމުގެ ވިޔަފާރިއަކީ މެދުމިނުގެ ވިޔަފާރިއެއްކަން ފާހަގަކުރައްވައި އޭނާ ވިދާޅުވީ ރީބްރޯޑްކާސްޓަރުން މައިގަނޑު ގޮތެއްގައި ގެންގުޅޭ ކޮންޓެންޓަކީ ރާއްޖެއިން ބޭރުން ގަނެގެން ގެންނަ ކޮންޓެންޓް ކަމަށެވެ.
ރާއްޖޭގައި އުފައްދާ ކޮންޓެންޓަކީ ރައްޖޭގެ ލޯކަލް ޗެނަލްތަކުން އުފައްދާ ކޮންޓެންޓްތައް އެކަނި ކަން ފާހަގަކުރައްވައި ގައިސް ވިދާޅުވީ އޭގެ އިތުރުން ދައްކާ ހުރިހާ ކޮންޓެންޓަކީ ރާއްޖެއިން ބޭރަށް ބޮޑެތި އަދަދުތަކުން ފައިސާ ދައްކައިގެން، ގަނެގެން ދައްކާ އެއްޗެހި ކަމަށެވެ.
"މިހާރުވެސް ރާއްޖެއިން ބޭރަށް މި ވިޔަފާރީގެ ސަބަބުން ބައިވަރު ފައިސާތަކެއް އެބަދޭ. އެހެން ވީމަ އިތުރަށް ބޭރުބަޔަކަށް އެ ހުއްދަ ލިބޭ ގޮތަށް އޮތީމަ ވިޔަފާރީގަ ދިވެހީންގެ ބާރު ކެނޑިގެން ހިނގައިދާނެ ތީ އަޅުގަނޑުމެން އެގޮތަށް ގަވާއިދު ގައި ބަޔާންކުރީ،" ގައިސް ވިދާޅުވިއެވެ.
ގައިސް ވިދާޅުވީ ބްރޯޑްކާސްޓް ކުރުމުގެ ގަވާއިދުގައި އެންމެ ކުރީއްސުރެ ވެސް އޮންނަ ގޮތުން ބްރޯޑްކާސްޓް ކުރެވޭނީ 100 ޕަސެންޓް ދިވެހި ކުންފުންޏަކަށް ކަމަށެވެ.
އެ ގަވާއިދާ ގުޅުން ހުރިކުންފުނިތަކުގެ ތެރެއިން ކޮމިޓީން ބައްދަލު ކުރެއްވުމަށް އިއްޔެ ނިންމާފައިވަނީ ލޯކަލް ޗެނަލްތަކާއި، މީޑިއާ ނެޓް، އުރީދޫ އަދި ދިރާގާއެވެ. މީގެ އިތުރުން އެ މައްސަލަ ކޮމިޓީން ބައްލަމުންދަނިކޮށް، އެކަމާ ގުޅޭ ގަރާރެއް މަޖިލީހަށް ހުށަހެޅި ބަހުސްކުރެވެމުންދާތީ، އެ ގަރާރު ގަވާއިދު ކޮމިޓީއަށް ލިބޭނެގޮތަކަށް އިންތިޒާމްތައް ހަމަޖައްސަވައިދެއްވުމަށް އެދި މަޖިލީހުގެ ރައީސަށް ސިޓީއެއް ފޮނުއްވަން ފޮނަދޫ ދާއިރާގެ މެމްބަރު މޫސާ ސިރާޖް ހުށަހެޅުއްވިއެވެ.
ރީ ބްރޯޑްކާސްޓިން ވިޔަފާރީގެ ހަމަހަމަކަން ރާއްޖޭގައި ގެއްލިފައިވާ ކަމަށް ބުނެ ޕާލިމެންޓްރީ އިންކުއަރީއެއް ހެދުމަށް މަޖިލީހަށް ގަރާރެއް ވެސް ވަނީ ހުށަހަޅައިފައެވެ. އެ ގަރާރު ހުށަހެޅުއްވީ ނައިފަރު ދާއިރާގެ މެންބަރު އަހުމަދު ޝިޔާމެވެ.
އެ ގަރާރުގައި ވަނީ، ރާއްޖޭގެ އެކިކަންކޮޅުތަކުގައި ޚިދުމަތްދެމުންދާ ކުދި އޮޕަރޭޓަރުންގެ ވިޔަފާރި ހުއްޓުވައި ވަކިބަޔަކަށް ނާޖާއިޒު ބޮޑެތި މަންފާތަކެއް ލިބޭނެފަދަ ގޮތަކަށް ސަރުކާރާއި މިނިވަން މުއައްސަސާތައް މެދުވެރިކޮށް ދަތިތަކާއި ހުރަސްތަކާއި ތަފާތުކުރުންތައް ކުރުމަތި ކުރަމުންދާ ކަމަށެވެ.
އެހެންކަމުން މަޖިލީހުގެ ޕާލިމަންޓަރީ އިންކުއަރީއެއް މެދުވެރިކޮށް އެ ކަންތައްތައް ދެނެގަނެ، އެ ހުރަސްތައް ނައްތާލުމަށް އެ ގަރާރުގައި އޭނާ ވަނީ ސަރުކާރަށް ގޮވައިލައްވައިފައެވެ.
ރީބްރޯޑްކާސްޓިންގެ ގަވާއިދަށް ގެނައި އިސްލާހަށް އަމަލުކުރަން ފަށާނީ އަންނަ ޖެނުއަރީ މަހުން ފެށިގެންނެވެ. އެ ގަވާއިދަށް އަމަލުކުރަން ފެށުމުން ދިރާގު ޓީވީގެ ޚިދުމަތް ހުއްޓާލަން ޖެހޭ ކަމަށާއި އެއީ އެ ކުންފުންޏަށް ލިބޭ ވަރަށް ބޮޑު ގެއްލުމެއް ކަމަށް މަޖިލީހުގެ ބައެއް މެންބަރުން ވަނީ ވިދާޅުވެފައެވެ.