06 Nov 2022, 08:51
ވޯލްޑްކަޕް ފެށެން ދެ ހަފުތާއަށް ވެފައިވަނިކޮށް ލިއޮނެލް މެސީއަށް އަނިޔާވެއްޖެއެވެ.
ފްރާންސްގެ ބައެއް މީޑިއާތަކުން ބުނީ މެސީގެ ފައިގެ ކުޑަހުޅަށް އަނިޔާވެފައިވާކަމަށާއި، މިއަދު ޕީއެސްޖީ ލޯރިއަންޓާ ދެކޮޅަށް ކުޅޭ މެޗުގައި އޭނާ ބައިވެރި ނުވާކަމަށެވެ. ރިޕޯޓްތައް ބުނާގޮތުގައި މެސީއަށް ލިބިފައިވާ އަނިޔާ އެހާ ސީރިއަސް ނޫނެވެ. ލޯރިއަންޓާ ދެކޮޅަށް މިއަދު ކުޅޭ މެޗުގައި މެސީ ނުފެނުނަސް ކުރިއަށްހުރި މެޗުތަކަށް މެސީ ފިޓްވާނޭކަމަށް ފްރާންސްގެ ނޫސްތަކުން ބުނެއެވެ.
މެސީ ވަނީ މިދިޔަ ހަފުތާގެ ޗެމްޕިއަންސް ލީގްގައި ޕީއެސްޖީ އާއި ޔުވެންޓަސްއާ ދެކޮޅަށް ކުޅެފައެވެ. މެސީ އަންނަނީ މިފަހަރުގެ ސީޒަނުގައި މޮޅު ކުޅުމެއް ދައްކަމުންނެވެ. މިފަހަރުގެ ވޯލްޑްކަޕަކީ މެސީއަށް ވަރަށް މުހިއްމު މުބާރާތެކެވެ. ސަބަބަކީ މިފަހަރުގެ މުބާރާތަކީ މެސީގެ އެންމެ ފަހު ވޯލްޑްކަޕަށް ވުމެވެ.
މިފަހަރުގެ ވޯލްޑްކަޕުގައި ވާދަކުރާ ޓީމުތަކުގެ ތެރެއިން އާޖެންޓީނާއަކީ މި މުބާރާތް ކާމިޔާބުކުރާނޭކަމަށް އެންމެގިނަ މީހުން އިއްތިފާގުވާ ޓީމެވެ. މިފަހަރުގެ މުބާރާތުގައި މެސީގެ އާޖެންޓީނާ ހިމެނީ ގްރޫޕް ސީގައެވެ. މި ގްރޫޕްގައި އާޖެންޓީނާގެ އިތުރުން ދެން ހިމެނޭ ޓީމުތަކަކީ، ސައުދީއަރަބިއްޔާ، ޕޮލެންޑްއަދި މެކްސިކޯއެވެ.
ވޯލްޑް ކަޕް ފެށެން 14 ދުވަހަށް ވެފައިވާއިރު، އާޖެންޓީނާގެ ޓީމަށްވެސް ވަނީ އަނިޔާގެ މައްސަލަތަކާއި ކުރިމަތިލާން ޖެހިފައެވެ. މިގޮތުން ޑިމާރިއާ، ރޮމޭރޯ އަދި ޕައުލޯ ޑީބަލާ އަށް ވަނީ އަނިޔާވެފައެވެ.