22 Nov 2022, 17:31
ފީފާ ވޯލްޑްކަޕްގައި އެންމެ ފަހުގެ ކޮޕައެމެރިކާ އަދި ދެ ބައްރުގެ ޗެމްޕިއަނުން ކުޅޭ ފިނަލިސިމާގެވެސް ޓްރޮފީ އުފުލާލި އާޖެންޓީނާ، ސައުދީ އަރަބިއްއާ އަތުން ބަލިވެއްޖެއެވެ.
މިއަދު ގަތަރުގެ ލުސައިލް ސްޓޭޑިއަމްގައި ކުޅުނު މެޗު ސައުދީން ކާމިޔާބުކުރީ 2-1 ގެ ނަތީޖާއަކުންނެވެ.
ދުނިޔޭގައި ހުރި އެންމެ މޮޅު އެއް ފުޓުބޯޅަ ކުޅުންތެރިޔާ ލިއޮނެލް މެސީ އަށް ވޯލްޑް ކަޕުގެ ތަށި ހޯދާދިނުމުގެ އަޒުމުގައި ނުކުތް އާޖެންޓީނާގެ މައްޗަށް ސައުދީން ކުރި ހޯދީ ފަހަތުން އަރައެވެ.
މެޗުގައި އާޖެންޓީނާގެ ފަރާތުން މޮޅު ކުޅުމެއް ފެނުނުއިރު އެ ޓީމުން ވަނީ ގޯލު ޖަހާނެ ގިނަ ފުރުސަތުތައް ތަނަވަސްކޮށްފައެވެ. ނަމަވެސް އެ ޓީމަށް އެ ފުރުސަތުތަކުގެ ބޭނުން ކުރެވޭ ގޮތް ނުވިއުރު ސައުދީން ވަނީ އެ ޓީމަށް ލިބުނު މަދު ފުރުސަތުތަކުގެ ބޭނުން ހިފައި އާޖެންޓީނާ މާޔޫސް ކޮށްލައިފައެވެ.
އަދި ސައުދީގެ ޑިފެންސް ލައިނުން މެޗުގައި ދެއްކި މޮޅު ކުޅުމާއި ދެއްކި ހުޝިޔާރުކަންވެސް ފާހަގަކޮށްލެވެއެވެ.
މެޗުގެ ފުރަތަމަ މިނެޓު ތެރޭގައިވެސް އާޖެންޓީނާގެ ތަރި ލިއޮނަލް މެސީގެ ޖާދޫ ވަނީ ދައްކާފައެވެ. އެގޮތުން އޭނާ އޭރިއާ ތެރޭގައި ހުރެ ފޮނުވާލި ހަމަލާ ދިފާއު ކުރީ ސައުދީގެ ކީޕަރު އަލް އުވައިސްއެވެ.
މެޗުގެ އަށްވަނަ މިނެޓުގައި މެސީ ވަނީ ގޯލު ޖަހައި މެޗުގެ ލީޑު އާޖެންޓީނާއަށް ނަގައިދީފައެވެ. އެ ގޯލަކީ ސައުދީގެ އޭރިއާތެރެއިން އެ ޓީމުގެ ޑިފެންޑަރަކު އާޖެންޓީނާގެ ލިއަންޑްރޯ ޕަރެޑޭސްއަށް ކުރި ފައުލަކަށް ދިން ޕެނަލްޓީއަކުން މެސީ ޖެހި ގޯލެކެވެ.
އެ މެޗުގެ ފުރަތަމަ ހާފުގައި އާޖެންޓީނާއިން ވަނީ އިތުރު ހަތަރު ގޯލު ޖަހައިފައެވެ. އެ ހަތަރު ގޯލު ވެސް ވަނީ އޮފްސައިޑް ކަމަށް ނިންމާ، ބަލައި ނުގަންނަން ނިންމާފައެވެ.
އާަޖެންޓިނާއާއި ސައުދީ އަރަބިއާ ބައްދަލުކުރި މެޗުގެ ތެރެއިން --- ފޮޓޯ/ ގެޓީ އިމޭޖްސް
ދެވަނަ ހާފު ފަށައިގެން ސައުދީގެ ކުޅުން ރަނގަޅުކޮށް އެ ޓީމުން ހާފުގެ ކުރީ ކޮޅު ވަނީ ގޯލެއް ޖަހައި މެޗުގެ ނަތީޖާ ހަމަހަމަކޮށްފައެވެ. މެޗުގެ 49 ވަނަ މިނެޓުގައި ސައުދީއަށް އެ ގޯލު ޖަހައިދީފައިވަނީ ސަލާހް އަލް ސޮހްރީއެވެ.
މެޗުގެ 52 ވަނަ މިނެޓުގައި ސައުދީން ވަނީ ގޯލެއް ޖަހައި މެޗުގެ ލީޑު ނަގައިފައެވެ. އެ ގޯލަކީ އަލް ޑައުސާރީ ޖެހި ގޯލެކެވެ.
ވޯލްޑްކަޕްގައި އާޖެންޓީނާ އަދި ސައުދީ ހިމެނިފައިވަނީ ގްރޫޕް ސީގައެވެ. އެ ގްރޫޕްގައި ދެން ހިމެނެނީ މެކްސިކޯއާއި ޕޮލެންޑެވެ.
މި މޮޅާއެކު ސައުދީ ވެގެންގޮސްފައިވަނީ ވޯލްޑް ކަޕްގެ މެޗެއްގައި 1990 ވަނަ އަހަރަށްފަހު އާޖެންޓީނާގެ މައްޗަށް ކުރިހޯދި، ޔޫރަޕު ނޫން ބައްރަކަށް ނިސްބަތްވާ ފުރަތަމަ ގައުމަށެވެ.
މިމެޗުން އާޖެންޓީނާ ބަލިވެފައިވާއިރު މިއީ 2019 ވަނަ އަހަރުގެ ޖޫން މަހުގެ 16 ވަނަ ދުވަހަށްފަހު އާޖެންޓީނާ ބަލިވި ފުރަތަމަ ފަހަރެވެ. އާޖެންޓިނާ އެންމެފަހުން ބަލިވެފައިވަނީ އެދުވަހު ކޮޕާ އެމެރިކާގައި ކޮލަމްބިއާ އަތުން 0-2 ގެ ނަތީޖާއަކުންނެވެ.