02 Dec 2022, 21:15
ބ. އޭދަފުށީގައި ހުންނަ ބ. އަތޮޅު ހޮސްޕިޓަލުގައި ރަސްމީކޮށް ލޮލުގެ ފަރުވާދޭ ޔުނިޓެއް ގާއިމުކޮށް، ލޮލުގެ ބަލިތަކަށް ބޭނުންވާ ފަރުވާ ދޭން ފަށައިފިއެވެ.
ބ. އަތޮޅު ހޮސްޕިޓަލުގެ މެނޭޖަރު މުޙައްމަދު ރަޝީދު މިއަދު 'ސަން'އަށް ވިދާޅުުވީ އެ ހޮސްޕިޓަލަށް ލޮލުގެ ބަލިތަކަށް ޚާއްސަ ޑޮކްޓަރެއް ވަޑައިގަތީ މިއަހަރުގެ ޖޫން މަހުގެ ތެރޭގައި ކަމަށެވެ. އަދި ބަލިތަކަށް ފަރުވާ ދޭން ފަށާފައިވަނީ ޖުލައި މަހުގެ ތެރޭގައި ކަމަށް އޭނާ ވިދާޅުވިއެވެ.
މުޙައްމަދު ރަޝީދު ވިދާޅުވީ އޭރުވެސް ފަރުވާ ދިނުމަށް ބޭނުންވާ ގިނަ ވަސީލަތްތައް މަދު ކަމަށެވެ. އޭނާ ވިދާޅުވީ އޮގަސްޓް މަހުގެ ތެރޭގައި ކުޅުދުއްފުށީ ރީޖަނަލް ހޮސްޕިޓަލުން އެ ހޮސްޕިޓަލަށް ހަދިޔާކުރި ބައެއް އަލާތްތަކާއެކު ފަރުވާ ދިނުމުގެ ޚިދުމަތް ކޮންމެވެސް ވަރަކަށް ރަނގަޅުކުރި ކަމަށެވެ.
ލޮލުގެ ފަރުވާ ދިނުމަށް ޚާއްސަ ޔުނިޓު ގާއިމުކޮށް ރަސްމީކޮށް ޚިދުމަތް ދޭން ފެށުމާ ގުޅިގެން މުޙައްމަދު ރަޝީދު ވިދާޅުވީ، މިހާރު އޮޕަރޭޝަން ކުރުން ފިޔަވާ ލޮލުގެ އެހެން ހުރިހާ ފަރުވާއެއް އެ ހޮސްޕިޓަލުން ދެވޭނެ ކަމަށެވެ. އަދި އެކަމަށް ބޭނުންވާ ހުރިހާ މެޝިނަރީއަކީ ފާއިތުވި އަހަރުގެ ތެރޭގައި އެ ހޮސްޕިޓަލުން ފަރުވާ ދިން ފަތުރުވެރިއެއްގެ ހެޔޮ އެދުން ތަކާއެކު ލިބުނު މެޝިނެރީތަކެއް ކަމަށް އޭނާ ވިދާޅުވިއެވެ.
"އެއީ މިދިޔަ އަހަރު ސޮނޭވާފުއްޓަށް އައި ފަތުރުވެރިއެއް ހަދިޔާ ކުރި ތަކެތި. އޭނަ މި ހޮސްޕިޓަލުގައި އެނދުމަތި ކުރެވުމުން ހޮސްޕިޓަލުގެ މުވައްޒަފުން، ޚާއްސަކޮށް ނަރުހުން ދެއްކި އޯގާތެރި ކަމުގެ ސަބަބުން ބޭނުންވީ ހަދިޔާއެއް ދޭން،" އޭނާ ވިދާޅުވިއެވެ.
މުޙައްމަދު ރަޝީދު އިތުރަށް ވިދާޅުވީ އެ ހޮސްޕިޓަލަށް ބޭނުންވާ ތަކެތީގެ ލިސްޓެއް ދިނުމަށް ފަތުރުވެރިޔާ އެދުނު ކަމަށެވެ. އޭރު ފުރަތަމަ އެދުނީ ފިޒިއޯތެރަޕީ ހެދުމަށް ބޭނުންވާ ވަސީލަތްތައް ހޯދައި ދިނުމަށް ކަމަށް އޭނާ ވިދާޅުވިއެވެ.
ނަމަވެސް ލޮލުގެ ފަރުވާއަށް ބޭނުންވާ މެޝިންތައް ނެތުމުން އެފަދަ މެޝިން ބޭނުންވާކަން ފަހުން ހިއްސާ ކުރި ކަމަށް އޭނާ ވިދާޅުވިއެވެ. އަދި ފަތުރުވެރިޔާގެ ދީލަތީ އެހީއާއެކު، އެ މެޝިންތައް ބޭނުންކޮށްގެން ރަނގަޅު ފެންވަރެއްގެ ލޮލުގެ ފަރުވާގެ ޚިދުމަތް މިހާރު ދެމުންދާ ކަމަށް މުޙައްމަދު ރަޝީދު ވިދާޅުވިއެވެ.
މިދިޔަ މަހު ބ. އަތޮޅު ހޮސްޕިޓަލުގައި ޑައިލިސިސް ޔުނިޓެއް ގާއިމްކޮށް، އެ ޚިދުމަތް ވެސް ވަނީ ދޭން ފަށާފައެވެ.