15 Dec 2022, 09:07
މަޝްހޫރު ލަވަކިޔުންތެރިޔާ ޓޭލާ ސްވިފްޓްގެ 33 ވަނަ އުފަން ދުވަސް ފާހަގަ ކޮށްފައި ވަނީ ސްޓޫޑޯގައި މިއުޒިކްގެ މަސައްކަތުގައި ކަމަށް އޭނާ ބުނެފިއެވެ.
މިދިޔަ އަންގާރަ ދުވަހު ޓޭލާ އަށް ވަނީ 33 އަހަރުވެފައެވެ. އެކި އާޓިސްޓުން އާންމުކޮށް އުފަން ދުވަސްތައް ފާހަގަކުރާނީ ވަރަށް ކުލަގަދަކޮށެވެ. އެކި އެކުވެރިންނާއެކު އުފަން ދުވަސް ފާހަގަ ކުރުން ބާއްވާއިރު ގިނަ ފަހަރަށް އެ ދުވަސް ވެފައި އޮންނަނީ ބޮޑު އިވެންޓަކަށެވެ. ނަމަވެސް މިފަހަރު ޓޭލާ މި ދައްކާލީ ތަފާތު ވާހައެކެވެ.
ޓޭލާގެ އުފަން ދުވަހު އޭނާ ވަނީ ސޯޝަލް މީޑިއާއަށް ހާއްސަ ޕޯސްޓެއް ކޮށްފައެވެ. މި ޕޯސްޓަކީ ޓޭލާ އާއި މަޝްހޫރު ލަވަކިޔުންތެރިޔާ އަދި ކޮމްޕޯސާ ޖެކް އެންޓަނޯފް އެކީގައި ސްޓޫޑިއޯއެއްގައި ތިބި މަންޒަރު ދައްކުވައިދޭ ޕޯސްޓެކެވެ.
View this post on Instagram
ޓޭލާ އެ ޕޯސްޓާއެކު ވަނީ ފޭނުންނަށް ޝުކުރު އަދާކޮށްފައެވެ. އަދި އުފަންދުވަހުގެ ތަހުނިޔާތަކަށް ޝުކުރުވެރި ވާ ކަމަށް އޭނާ ބުންޏެވެ.
އޭނާ ބުނިގޮތުގައި އުފަންދުވަސް ހޭދަ ކުރީ ސްޓޫޑިއޯގައެވެ. އަދި އެއީ އޭނާ އެންމެ ބޭނުންވި ގޮތް ކަމަށް ވެސް ޓޭލާ ވަނީ ބުނެފައެވެ. އޭނާގެ މިއުޒިކް އުފައްދަނީ އޭނާގެ ފޭނުންނަށް ކަމަށާއި އެކަން ކުރަން ލިބުމަކީ ވަރަށް ކުރާ ހިތުން ކުރާ ކަމެއް ކަމަށް ޓޭލާ އިޝާރާތް ކުރިއެވެ.
ޓޭލާ އަންނަނީ އަވަދި ނެތި އާ މިއުޒިކް ނެރެމުންނެވެ. އެގޮތުން މި ދެ އަހަރުގެ ތެރޭގައި އެކަނި ވެސް ޓޭލާ ވަނީ ގިނަ އާޓިސްޓުން މުޅި ކެރިއަރުގައި ވެސް ނެރެފައި ނުވާ މިންވަރަށް ލަވަ ނެރެފައެވެ.