16 Dec 2022, 23:05
ކ. އަތޮޅުގައި އޮންނަ ގިރާވަރު ފަޅު ހިއްކައިގެން ރެސިޑެންޝަލް ސިޓީއެއް އެތަނުގައި ގާއިމުކުރުމަށް ފައިސާ ހޯދުމަށް އިންވެސްޓަރުންނަށް މިއަދު ހުޅުވާލައިފިއެވެ.
ގިރާވަރު ފަޅަކީ މާލޭ މީހުންނަށް ގޯތި ދޭން ނިންމައިފައިވާ ތަނަކަށްވާއިރު އެތަން ރެސިޑެންޝަލް ސިޓީއެއްގެ ގޮތުގައި ތަރައްގީ ކުރުމަށް ކަނޑައަޅުއްވައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވަނީ އިއްޔެގަރާރެއްނެރުއްްވާފައެވެ.
އެ ގަރާރުގައި ވަނީ އެ މަޝްރޫއަށް ޚަރަދު ކުރަން ޖެހޭ އެންމެ ދަށް އަގަކީ ފަސް މިލިއަން ޑޮލަރު ކަމަށެވެ.
އޭގެ ފަހުން އިކޮނިމިކް މިނިސްޓްރީއިން މިއަދު ކުރިއިއުލާނެއްގައިވާގޮތުން ގިރާވަރު ފަޅު އިންވެސްޓަރުންނަށް ހުޅުވާލީ، ބަދަލުގައި ރަށެއް ނުވަތަ ފަޅެއް ދޭ ގޮތަށް، ކްރޮސް ސަބްސިޑީ އުސޫލުންނެވެ.
މީގެ އިތުރުން އެ ފަޅުގައި ސިޓީއެއް ތަރައްގީ ކުރުމަށް ފައިނޭންސް ކުރުމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމަށް މިހާރު ހުޅުވާލާފައިވާ ކަމަށް އެ އިއުލާނުގައިވެއެވެ. އަދި ރައީސް ނެރުއްވި ގަރާރުގައި ވާގޮތަށް ޕްރޮޕޯސަލް ހުށަހެޅޭނެ އެންމެ ކުޑަ މިންވަރަކީ ފަސް މިލިއަން ޑޮލަރު ކަމަށް މިނިސްޓްރީގެ އިއުލާންގައި ވެސް ވަނީ ބުނެފައެވެ.
އެކަމަށް ޝައުގުވެރިވާ ފަރާތްތަކުން އެޕްލިކޭޝަން ފޯމް އެ މިނިސްޓްރީގެ މެއިލްއަށް ހުށަހެޅުމަށް އެ އިއުލާނުގައިވެއެވެ.
ރައްޔިތުންގެ މަޖިލީހުގައި މި އަހަރު އިއްވެވި ރިޔާސީ ބަޔާނުގައި ރައީސް ޞާލިޙު ވަނީ ގިރާވަރު ފަޅު ހިއްކުމަށް ފަހު، މާލޭ މީހުންނަށް 2،000 ގޯތި ދޫކުރުމަށް ނިންމާފައިވާ ކަމަށް ވިދާޅުވެފައެވެ.
މީގެ އިތުރުން އެމަނިކުފާނު ވަނީ ގިރާވަރު ފަޅު ހިއްކައި އެތަނަކީ ތިލަމާލެ ބުރިޖުން ގުޅާލާ ތަނަކަށް ވާނެ ކަން ވެސް ފާހަގަކުރައްވާފައެވެ.