09 Jan 2023, 14:40
އިދިކޮޅު ލީޑަރު، ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރުމަށް ގޮވާލައި އިދިކޮޅު ޕީޕީއެމް/ޕީއެންސީން ކުރަމުން އަންނަ ސިލްސިލާ މުޒާހަރާތަކުގެ ބައިވެރިންނާ މެދު ފުލުހުން އަމަލުކުރަނީ އަނިޔާވެރިކޮށް ކަމަށް ބުނެ އިދިކޮޅުން ކަންބޮޑުވުން ފާޅުކޮށްފިއެވެ.
އެއްވެ އުޅުމުގެ މިނިވަންކަން ކަށަވަރު ކޮށްދިނުމަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހްގެ ރިޔާސީ ވައުދުފުޅެއް ނަމަވެސް، އެއްވެ އުޅުމުގެ ހައްގަށް ތަކުރާރުކޮށް ހުރަސްއަޅާކަމަށް ބުނެ އިދިކޮޅުން ވަނީ ކަންބޮޑުވުން ފާޅުކޮށްފައެވެ.
ވ. އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން ރިޝްވަތުނަގައި އެފައިސާ ލޯންޑާ ކުރިކަމުގެ ކުށް ގެ މައްޗަށް ސާބިތުވެ، ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވާފައިވަނީ މިދިޔަ ޑިސެމްބަރު މަހުގެ 25 ވަނަ ދުވަހުއެވެ.
އެ ދުވަހުން ފެށިގެން އިދިކޮޅުން ސިލްސިލާ މުޒާހަރާތައް ބާއްވަމުން އަންނައިރު، ޖެނުއަރީ މަހުގެ އަށްވަނަ ދުވަހުގެ ނިޔަލަށް 100އަށްވުރެ ގިނަ މީހުން ހައްޔަރުކޮށްފައިވާ ކަމަށް އިދިކޮޅުން ބުނެއެވެ.
މުޒާހަރާގެ ތެރެއިން އެއްވެސް އިންޒާރަކާނުލައި އަތުޖެހުނު މީހަކު ހައްޔަރުކުރާ ކަމަށާއި، ފުލުހުން އަމަލު ކުރާ ގޮތުން އެތައް ބަޔަކަށް އެކިވަރުގެ އަނިޔާވެފައިވާ ކަމަށްވެސް އިދިކޮޅުން ވަނީ ތުހުމަތުކޮށްފައެވެ.
ޕީޕީއެމްގެ ތަރުޖަމާނު ހީނާ ވަލީދު ވިދާޅުވީ، ހައްޔަރު ކުރި މީހުންގެ ތެރެއިން ދެ މީހެއްގެ ބަންދަށް 15 ދުވަހުގެ މުއްދަތެއް ޖަހާފައިވާކަމަށާއި އެކަކު 30 ދުވަހަށް ގޭބަންދުކޮށްފައިވާ ކަމަށެވެ. އަދި، ދެ މީހަކު 60 ދުވަހަށް ގޭބަންދުކޮށްފައިވާއިރު މުޒާހަރާގެ ތެރެއިން އުމުރުން ދުވަސްވީ އަންނެހުންވެސް ހައްޔަރުކޮށްގެން ގެންދަނީ ވަރަށް އިހާނެތިކޮށް ކަމަށް އޭނާ ވިދާޅުވިއެވެ.
"މިފެންނަނީ މިނިވަންކަމުގެ ހައްގުތައް ފުރި ބަންޑުންވާތަން" އޭނާ ވިދާޅުވިއެވެ.
އިދިކޮޅުން ރޭ ކުރިއަށް ގެންދިޔަ އިހުތިޖާޖުގައި ބައިވެރިވި އުމުރުން ދުވަސްވީ އަންހެނަކު ހައްޔަރުކުރި ގޮތުންވެސް ގިނަ ބައެއްގެ ފާޑުކިޔުން ފުލުހުންނަށް އަމާޒުވެގެން ގޮސްފައިވެއެވެ.
ކޮންމެ ރެއަކު ފުލުހުން ޕީޕީއެމް އޮފީސް ދޮރުމަތީ ބެރިކޭޑުޖަހައި ބަންދު ކުރަމުންދާތީ ވެސް އިދިކޮޅުން ވަނީ ކަންބޮޑުވުން ފާޅުކޮށްފައެވެ.