13 Feb 2023, 15:28
ގޯލްޑެން ފުޓްސަލް ޗެލެންޖު 2023ގެ ހއ. އަތޮޅުގެ ކުއާޓާ ފައިނަލް މެޗުތަކުން މޮޅުވެ ވަށަފަރާއި އުތީމާއި މުރައިދުއާއި ފިއްލަދޫ ސެމީ ފައިނަލަށް ދަތުރުކޮށްފިއެވެ.
ރޭ ކުޅުނު ހއ. ކުއާޓާ ފައިނަލުގެ ފުރަތަމަ މެޗުގައި ބައްދަލުކުރީ ކެލާއާއި މުރައިދޫއެވެ. އެ މެޗުގެ ފުރިހަމަ ވަގުތު ނިމުނު އިރު ދެ ޓީމުންކުރެ އެއްވެސް ޓީމަކަށް ގޯލެއް ޖެހިފައެއް ނުވެއެވެ. އެހެންކަމުން ނަތީޖާ ނެރުމަށް ޖެހި ޕެނަލްޓީ 4-2ގެ ނަތީޖާއަކުން ކާމިޔާބުކޮށް އަތޮޅު ސެމީގެ ޖާގަ ކަށަވަރުކުރީ މުރައިދޫ ޓީމެވެ.
އެ އަތޮޅު ކުއާޓާގެ ދެވަނަ މެޗުގައި ބައްދަލުކުރީ ފިއްލަދޫއާއި ބާރަށެވެ. އެ މެޗު 1-0ގެ ހަނި ނަތީޖާއަކުން ކާމިޔާބުކުރީ ފިއްލަދޫ ޓީމެވެ. ފިއްލަދޫން މެޗުގައި ޖެހި ހަމައެކަނި ގޯލު ޖެހީ އަލީ ކާމިލްއެވެ.
ކުއާޓާގެ ތިން ވަނަ މެޗުގައި ވާދަކޮށްފައިވަނީ ދިއްދޫއާއި އުތީމެވެ. މެޗުގައި ދިއްދޫގެ ފައިގު އަހުމަދު ގޯލެއް ޖަހައި އެ ޓީމަށް ލީޑު ނަގައިދީފައިވަނިކޮށް އުތީމުން ވަނީ ދެ ގޯލު ޖަހައި އަތޮޅު ސެމީއަށް ދަތުރުކޮށްފައެވެ. 2-1 ގެ ނަތީޖާއަކުން ނިމުނު އެ މެޗުގައި އުތީމުގެ ދެ ގޯލު ވެސް ޖެހީ އަހުމަދު އައިހަމްއެވެ.
ހއ. ކުއާޓާގެ ފަހު މެޗުގައި މާރަންދޫ ބަލިކޮށް ސެމީއަށް ދަތުރުކުރީ ވަށަފަރު ޓީމުންނެވެ. 4-2ގެ ނަތީޖާއަކުން ވަށަފަރު ކާމިޔާބު ހޯދި މެޗުގައި އެ ޓީމުގެ ގޯލުތައް ޖެހީ ސާޖިދު ރަޝީދާއި އަބްދުﷲ ސިނާންއެވެ. ސާޖިދު ވަނީ މެޗުގައި ހެޓްރިކް ހަދައިފައެވެ. އަދި މާރަންދޫ ޓީމުގެ ދެ ގޯލު ޖެހީ ސަމްހާން އަބްދުލް ރަހުމާން އާއި މުހައްމަދު ސާޖިދެވެ.
މާރަންދޫއާއި ވަށަފަރު ބައްދަލުކުރި މެޗުގެ ތެރެއިން --- ފޮޓޯ/ ގޯލްޑެން ފުޓްސަލް އެސޯސިއޭޝަން
ގޯލްޑަން ފުޓްސަލް ޗެލެންޖަކީ މީހުން ދިރިއުޅޭ ކޮންމެ ރަށަކުން ވެސް އެރަށަކަށް ނިސްބަތްވާ އެއް ޓީމަށް ހުޅުވާލައިގެން ކުރިއަށްގެންދާ މުބާރާތެކެވެ. ނަމަވެސް މާލެއާއި ފުވައްމުލަކުގެ ކޮންމެ އަވަށަކުން ޓީމެއް ބައިވެރިކުރުމުގެ ފުރުސަތު ވެސް ވަނީ ހުޅުވާލައިފައެވެ.
މިއަހަރުގެ ގޯލްޑެން ފުޓްސަލް ޗެލެންޖުގައި 102 ޓީމު ވަނީ ބައިވެރިވެފައެވެ. އެ މުބާރާތުގައި މި އަހަރު 242 މެޗު ކުޅުމަށް ވަނީ ހަމަޖެހިފައެވެ.
މިފަހަރުގެ މުބާރާތްވެސް ކުރިއަށްދާނީ ކުރިންވެސް މުބާރާތް ކުރިއަށް ގެންދިޔަ އުސޫލުންނެވެ. ފުރަތަމަ އެ އަތޮޅެއް ނިސްބަތްވާ އަތޮޅު ބުރެއް ކުޅެން ޖެހޭއިރު އެ ބުރުން އެންމެ މޮޅު ޓީމުތައް ވާދަކުރަން ޖެހޭނީ ޒޯން ބުރުގައެވެ. ޒޯން ބުރުން އެންމެ މޮޅު 16 ޓީމު ދެން ވާދަކުރަން ޖެހޭނީ މުބަރާތުގެ ގަދަ 16ގައެވެ. އަދި އެ ބުރުން ކާމިޔާބު ހޯދާ ޓީމުތައް ކުއާޓާ، ސެމީ އަދި ފައިނަލް ކުޅެ މުބަރާތުގެ އެންމެ މޮޅު ޓީމެއް ހޮވޭނެއެވެ. އެ މުބާރާތުގެ ހުރިހާ މެޗެއް ކުޅޭނީ ހުޅުމާލެ ރެހެންދި ޓާފު ދަނޑުގައެވެ.
މިއަހަރު ކުޅޭ ގޯލްޑެން ފުޓްސަލް ޗެލެންޖުގެ ބްރޯޑްކާސްޓިން ޕާޓްނަރެއްގެ ގޮތުގައި ހަމަޖައްސާފައިވަނީ ސަން ސިޔާމް މީޑިއާއެވެ.