15 Feb 2023, 15:19
ކުރިއަށް އޮތް ރޯދަ މަހަށް އއ. ތޮއްޑޫ ދަނޑުވެރިން ރާއްޖޭގެ މާކެޓަށް ބޭނުންވާ ކަރާ ހެއްދުމުގެ މަސައްކަތް ފަށައިފިއެވެ.
ތޮއްޑޫ ކައުންސިލްގެ ރައީސް އަހްމަދު ކަރަމް "ސަން"އަށް ވިދާޅުވީ ކޮންމެ އަހަރެއްގެ ރޯދަ މަހާ ދިމާކޮށް މުޅި ރާއްޖޭގެ މާކެޓަށް ބޭނުންވާ ކަރާ އެ ރަށުގައި ހެއްދުމުގެ މަސައްކަތް ކުރަނީ ކައުންސިލްގެ ޚާއްސަ ބެލުމުގެ ދަށުން އެ ރަށުގެ ކަރާ ދަނޑުވެރިންނާ ގުޅިގެން ކަމަށެވެ.
އެގޮތުން ދުރައިލައި އެ ކަމަށް ބޭނުންވާ ދަނޑު ބިމާއިި، މަސައްކަތް ކުރާނެ ތާރީޚުތައް ކަނޑައަޅައި ކަމަށް ކަރަމް ވިދާޅުވިއެވެ.
ކަރާ ހައްދަން ދަނޑުބިން ދޫކުރަނީ އާންމުކޮށް ހުޅުވައިލައިގެންނެވެ.
"ކަރާ ހައްދާ ތާރީޚު ވެސް ކަނޑައަޅަނީ ކައުންސިލުން. އެއީ ދެން ކުރީއްސުރެ ވެސް އެ ކަން ކުރަމުން އަންނަ ގޮތް. މިހާރު ދަނޑުވެރިން ހަމަ މަސައްކަތް ކުރަމުން ގެންދަނީ،" ކަރަމް ވިދާޅުވިއެވެ.
މި އަހަރުގެ ރޯދަ މަހަށް ތޮއްޑޫ ކައުންސިލުން ވަނީ 112 ބިމެއް ކަރާ ހެއްދުމަށް ބޭނުންކުރާ ދަނޑުތަކުގެ ގޮތުގައި ޚާއްސަކޮށްފައެވެ. އެއީ ޖުމްލަ ދެމިލިއަން އެއްލައްކަ އެގާރަހާސް އަކަފޫޓެވެ.
ދަނޑުވެރިކަމާ ގުޅޭ ގޮތުން މި ނޫހާ ވާހަކަދައްކަމުން އެ މަސައްކަތް ކުރަމުން އަންނަތާ 30 އަހަރަށްވުރެ ގިނަ ދުވަސްވެފައިވާ އަލީ އަބްދުﷲ ބުނީ މި ދުވަސްވަރުގެ މޫސުމަށް ބަލާއިރު ދަނޑުވެރިކަން ވަަރަށް ރަނގަޅުވާނެކަމަށް ބެލެވޭކަމަށެވެ.
"މޫސުން މި އޮތީ ވަރަށް ރަަނގަޅަށް. އެހެންވީމާ އަޅުގަނޑުމެން މިދިޔަ އަހަރެކޭ އެއްގޮތަށް ރަށުން ކަރާ ބޭރުކުރާނަން. ވަރަށް އިންތިޒާމުވެގެން ކުރާ ކަމެއް މިއީ. ދަނޑުވެރިކަން ވަރަށް ރަނގަޅުވާނެ،" އަބްދުﷲ ބުންޏެވެ.
އޭނާ އިތުރަށް ބުނީ ދަނޑުވެރިކަން ކުރުމުގައި އޮތީ އެންމެ ބިރެއް ކަމަށެވެ. އެއީ ގިނަ އަހަރުތަކެއް، އެއް ފަސްގަނޑެއްގައި އެ ކަން ކުރާތީ މުޑުވައްތަކަށް ވައިރަސް ޖެހުމުގެ ބިރު ކަމަށެވެ.
އެހެންނަމަވެސް އެ ކަމަށް ވެސް ހައްލު ހޯދައިގެން މަސައްކަތް ރާވަމުން އަންނަކަމަށް އަބްދުﷲ ބުންޏެވެ.