27 Feb 2023, 09:30
ދިރިއުޅުމުގެ އާދަތަކާއި މަސައްކަތުގެ މާހައުލުގެ ގޮތުން އުނަގަނޑުގައި ރިއްސުމަކީ ގިނަ ބަޔަކު ތަހައްމަލު ކުރަން ޖެހޭ ކަމެކެވެ. އެތައް ބަޔަކަށް އާންމު ގޮތެއްގައި ދިމާވާ މި މައްސަލައަށް އެތައް ދުވަހެއް ވާއިރު ވެސް ގިނަ ފަހަރަށް ހައްލެއް ނު ހޯދާ ހުރެއެވެ. ގިނަ ފަހަރަށް ތަދު ކަނޑުވަން އާދައިގެ ބޭހެއް ބޭނުން ކުރެއެވެ. ނަމަވެސް މިކަމަށް އެންމެ ރަނގަޅު ބޭހަކީ ކޮބާ ހެއްޔެވެ؟
އުނަގަނޑުގައި ރިއްސުމަކީ ގިނަ ބަޔަކަށް ކޮންމެ ދުވަހަކު ހެން މިހާރު ތަހަމައްލު ކުރަން ޖެހޭ ވޭނެކެވެ. މިސާލަކަށް ބަރު އެއްޗެއް އުފުއްލައިގެން ވެސް ނުވަތަ އަބަދު އިށީނދެ އިންނަން ޖެހިގެން ވެސް އުނަގަނޑުގައި ރިއްސުމަކީ އާންމު ކަމަކަށް ވެދާނެއެވެ.
ހަ ހަފުތާ އިން ފެށިގެން 12 ހަފުތާ އާ ދެމެދަށް ރިއްސުން ހުންނަ ނަމަ އެ ވާނީ "އެކިއުޓް" ތަދަކަށެވެ. ނަމަވެސް ތިން މަހަށް ވުރެ ގިނަ ދުވަހު ރިއްސާ ނަމަ އެއީ "ކްރޮނިކް" ތަދެކެވެ.
އުނަގަނޑުގައި ރިއްސާ އިރަށް ގިނަ ފަހަރަށް ބޭނުން ކުރާނީ "އޯވާ ދަ ކައުންޓާ" ބޭހެވެ. މިއީ އާންމުކޮށް ދިވެހިން އެކި ކަން ކަމަށް ބޭނުންކޮށް އުޅޭ ބޭހެވެ. ނަމަވެސް އެންމެ ރަނގަޅު ބޭހަކީ ކޮބާ ހެއްޔެވެ؟
އޯތޮޕީޑިކް ރިސާޗު ޖާނަލް އަށް އާންމުކޮށްފައިވާ ދިރާސާއަކުން އެނގުނު ގޮތުގައި އުނަގަނޑުގައި ރިއްސާ ގިނަ ބައެއް ވަނީ ޓައިލަނޯލް އާއި ޕެރަސެޓްމޯލް އަދި ޕެނެޑޯލް ފަދަ ބޭސްތައް ބޭނުންކޮށްފައެވެ. މި ބޭސްތަކަށް ކިޔާ އަނެއް ނަމަކީ ނޮން ސްޓެރޮއިޑަލް އެންޓައި އިންފްލެމެޓަރީ ޑްރަގްސް ނުވަތަ އެންއެސްއެއިޑްސް އެވެ.
ރިސާޗަރުން ބުނާގޮތުގައި މިފަދަ ހާލަތަށް އެންމެ އެކަށީގެންވާނީ އައިބުޕްރޫފެން ފަދަ އެންއެސްއެއިޑެއް ބޭނުންކޮށްގެނެވެ. ނަމަވެސް މި ބޭސް ހޯދުމަށް ޑޮކްޓަރަށް ދެއްކުމަށް ރިސާޗަރުން ލަފާ ދެއެވެ.
އެ ދިރާސާއިން ދައްކާގޮތުގައި އައިބޫޕްރޫފެން އެންމެ ރަނގަޅަށް މަސައްކަތް ކުރަނީ މަސަލް ރިލެކްސް ކުރާ ބޭހަކާ އެކުގައެވެ. ދެ ބޭސް އެކުގައި ބޭނުން ކުރަން ފެށުމުން އުނަގަނޑުގެ ރިހުން ހަފުތާއެއްްގެ ތެރޭގައި ކުޑަވާކަން ފާހަގަކުރެވިފައިވާ ކަމަށް އެ ދިރާސާއިން ދައްކައެވެ. މި ދެ ކޮންބޯ ބޭސް ލިބޭނީ ޑޮކްޓަރުގެ ބޭސް ސިޓީއަކާއެކުގައެވެ.