25 Feb 2023, 13:39
ރިސޯޓުތަކުގެ މުވައްޒަފުން ކޮންމެ ދުވަހަކު މަސައްކަތަށް ނިކުތުމުގެ ކުރިން ތުނބުޅި ބާލައި އޮމާން ކުރަން މަޖުބޫރުކޮށް ހަދާފައިވާ ރިސޯޓު ޕޮލިސީ ބަދަލުކުރުމަށް އެދި ޓުއަރިޒަމް އެމްޕްލޯއިމެންޓް އެސޯސިއޭޝަން އޮފް މޯލްޑިވްސް (ޓީމް)ގެ ފަރާތުން އިކޮނޮމިކް މިނިސްޓްރީއަށް ޕެޓިޝަނެއް ހުށަހަޅައިފިއެވެ.
ރާއްޖޭގެ އެކި ރިސޯޓުތަކުގައި މަސައްކަތް ކުރާ ފިރިހެން މުވައްޒަފުންގެ ތުނބުޅި ނުބެހެއްޓޭތީ އެކަމާ މެދު ރިސޯޓުތަކުގައި މަސައްކަތް ކުރާ މުވައްޒަފުން ކަންބޮޑުވުން ފާޅުކުރަމުން އަންނަތާ ގިނަ އަހަރުތަކެއް ވަނީ ވެފައެވެ. އެކަމުގެ ކަންބޮޑުވުން ސޯޝަލް މީޑިއާގައި މީގެކުރިން ވެސް މުވައްޒަފުން ފާޅުކޮށްފައިވެއެވެ.
މި ޕެޓިޝަނާ ގުޅޭގޮތުން ޓީމްގެ ސެކްރެޓަރީ ޖެނެރަލް މައުރޫފް ޒާކިރު (މަޓޭ) "ސަން" އަށް ވިދާޅުވީ މި ޕެޓިޝަން އިކޮނޮމިކް މިނިސްޓްރީއަށް ހުށަހަޅާފައިވަނީ ރިސޯޓުތަކުގައި މަސައްކަތް ކުރާ 1،500 އެއްހާ ފިރިހެން މުވައްޒަފުންގެ ސޮޔާ އެކު ކަމަށެވެ.
މި ޕެޓިޝަންގައި އެދިފައިވަނީ ބޭރުގެ ހޮޓެލް ޗެއިންތަކުގައިވެސް މަސައްކަތް ކުރާ މުވައްޒަފުންނަށް ތުނބުޅި ބެހެއްޓުމަށް ހުއްދަދީފައިވާ މިންގަނޑާ އެއްގޮތަށް ރާއްޖޭގެ ފަތުރުވެރިކަމުގެ ދާއިރާގައި މަސައްކަތް ކުރާ މުވައްޒަފުންނަށްވެސް ތުނބުޅި ބެހެއްޓުމަށް ހުއްދަ ދިނުމަށެވެ.
ޓުއަރިޒަމް އެމްޕްލޯއިމެންޓް އެސޯސިއޭޝަން އޮފް މޯލްޑިވްސްގެ ސެކްރެޓަރީ ޖެނެރަލް މައުރޫފް ޒާކިރު (މަޓޭ)
ރިސޯޓު ތަކުގައި މަސައްކަތް ކުރާ އެންމެންގެވެސް ކަންބޮޑުވުން މިއީ. ކޮންމެ ދުވަހަކު ކްލީން ޝޭވް ކުރުން ނޫން ގޮތެއް އެބަ ބޭނުންވޭ. ބޭރުގެ ހޮޓެލް ޗެއިންތަކުގައިވެސް އަމަލު ކުރަމުން އަންނަ ގޮތަކީ ޑީސެންޓް ލެވެލް އަކަށް ތުނބުޅި ބަހައްޓަން ހުއްދަ ދޭ އެބަ. ރާއްޖޭގެ ބައެއް ރިސޯޓުތަކުގައި މިހާރުވެސް އެކަން އެބަ ޕްރެކްޓިސް ކުރޭ. ހަމަ އެމިންގަނޑުތަކާ އެއްގޮތަށް ތުނބުޅި ބެހެއްޓުމަށް ހުއްދަ ދިނުމަށް ޕެޓިޝަންގަ އެދިފަ ވާނީޓުއަރިޒަމް އެމްޕްލޯއިމެންޓް އެސޯސިއޭޝަން އޮފް މޯލްޑިވްސްގެ ސެކްރެޓަރީ ޖެނެރަލް މައުރޫފް ޒާކިރު (މަޓޭ)
މިކަމާ ގުޅިގެން އިކޮނިމިކް މިނިސްޓަރު ފައްޔާޒް އިސްމާއީލްއާ އެކު ބޭއްވި ބައްދަލުވުން ވަރަށް ކާމިޔާބު ކުރުމަށާއި، މި ކަންބޮޑުވުމަށް ހައްލު ލިބިގެންދާނެ ކަމަށް ގަބޫލުކުރައްވާ ކަމަށް މަޓޭ ވިދާޅުވިއެވެ. އެގޮތުން، މަޓޭ ވިދާޅުވީ ރިސޯޓު މުވައްޒަފުން ތުނބުޅި ބެހެއްޓުމަށް ހުރަސް އެޅުމަކީ އެއްވެސް ހާލެއްގައި ސަރުކާރުގެ ވިސްނުން ހުރި ގޮތް ނޫން ކަމަށް އެ ބައްދަލުވުމުގައި މިނިސްޓަރު ވިދާޅުވި ކަމަށެވެ.
ހަމައެހެންމެ، މިކަމާ ގުޅޭގޮތުން ރިސޯޓުތަކުގެ މެނޭޖުމަންޓާ މަޝްވަރާ ކުރައްވައި، އެ ކަންބޮޑުވުމަށް އަވަސް ހައްލެއް ގެނެސްދެއްވުމަށް މަސައްކަތް ކުރައްވާނެ ކަމަށްވެސް މިނިސްޓަރު ފައްޔާޒް ވަނީ ވިދާޅުވެފައެވެ.
"ބިއާޑް ޕެޓިޝަން" ގައި ސޮއި ކުރުން ކުރިއަށް ދަނީ --- ފޮޓޯ: ޓީމް ޓްވިޓާ
"ސަން" އާ ވާހަކަދެއްކި ރިސޯޓު މުވައްޒަފަކު ބުނީ ތުނބުޅި ބެހެއްޓުމަކީ ރިސޯޓުތަކުގައި މަސައްކަތް ކުރާ މުވައްޒަފުންގެ ތެރެއިން ހުރިހާ ދިވެހި މުވައްޒަފުންވެސް ބޭނުންވާ ކަމެއް ކަމަށެވެ. އަދި އެކަމުގެ ކަންބޮޑުވުން ދުވަހެއް ދުވަހަކަށް އިތުރުވަމުންދާ ކަމަށްވެސް އޭނާ ބުންޏެވެ.
މިހާރުވެސް މި ޕެޓިޝަނަށް ސޮއި ހޯދުމުގެ މަސައްކަތް ކުރިއަށް ދާއިރު، މިކަމަށް އެދެވޭ ހައްލެއް ލިބެންދެން ޕެޓިޝަނަށް ސޮއި ހޯދުމުގެ މަސައްކަތް ކުރިއަށްދާނެ ކަމަށް މަޓޭ ވިދާޅުވިއެވެ. ޔޫނިއަންއާ ނުގުޅި ތިބި ރިޒޯޓުތަކުގެ މުވައްޒަފުންވެސް މިހާރު އަންނަނީ މި ޕެޓިޝަންގައި ސޮއި ކުރަމުންނެވެ.
ކޮންމެ ވަގުތަކުވެސް ސާފުތާހިރު ވެވޭނެ ފަދަ މަސައްކަތު މާހައުލެއްގައި ތިބޭ ބަޔަކަށް ތުބުޅި ބާލަން މަޖުބޫރުކުރުމަށް ދުނިޔަވީ ހަމަތަކުން ބަލާއިރު އެއްވެސް ހުއްޖަތެއް ދެއްކެން ނެތް ކަމަށް މިކަމަށް ވަކާލާތުކުރާ މަސައްކަތްތެރިން ގަބޫލުކުރެއެވެ.