01 Mar 2023, 14:11
އިސްލާމް އާބާދު (1 މާޗް 2023): ޕާކިސްތާންގެ ކުރީގެ ބޮޑުވަޒީރު އިމްރާން ޚާން ހައްޔަރުކުރުމުގެ އަމުރެއް އެގައުމުގެ ކޯޓަކުން ނެރެފައިވީނަމަވެސް ޕާކިސްތާނުގެ ފުލުހުން އެކަން ތަންފީޒުކުރުމަށް ފަސްޖެހިއްޖެއެވެ.
އިމްރާން ޚާން ހައްޔަރު ކުރުމުގެ އަމުރެއް ނެރެފައި ވަނީ ފަސް އަހަރު ދުވަހުގެ މުއްދަތަށް ދައުލަތުގެ އެއްވެސް މަގާމެއް އަދާކުރުން މަނާކުރުމަށް މިދިޔައަހަރު ޕާކިސްތާނުގެ ކޯޓަކުން ނިންމާފައިވާ މައްސަލައިގައެވެ. ނަމަވެސް އިމްރާޚާން ހައްޔަރުކުރާނެކަން ނުވަތަ ނޫންކަން ފުލުހުން ހާމަކޮށްފައެއް ނުވެއެވެ.
ޕާކިސްތާނުގެ ދައުލަތުންވަނީ އިމްރާން ޚާންގެ މައްޗަށް ތިން މައްސަލައެއްގައި ކޯޓަށް ދައުވާ އުފުލާފައެވެ. އެއްކަމަކީ ދައުލަތުގެ މުދާ ނާޖާއިޒް ގޮތުގައި ބޭނުން ކުރިކަމަށް ބުނެ ކުރި ދައުވާއެވެ. އަނެއް ދައުވާއަކީ ޓެރަރިޒަމްގެ ތުހުމަތުގައި ކުރާ ދައުވާއެކެވެ. ތިންވަނަ ދައުވާއަކީ ފަސް އަހަރުގެ މުއްދަތަށް ދައުލަތުގެ އެއްވެސް މަގާމެއް އަދާކުރުން އިމްރާންޚާނަށް މަނާކުރުމުގެ ދައުވާއެވެ.
އިމްރާން ޚާން ހައްޔަރުކުރުމުގެ އަމުރު ނެރެފައިވަނީ ފަސް އަހަރު ދުވަހުގެ މުއްދަތަށް ދައުލަތުގެ އެއްވެސް މަގާމެއް އަދާކުރުން މަނާކުރުމަށް ކުރި ދައުވާއާ ގުޅިގެންނެވެ. މިއިން އެއްވެސް ދައުވާއެއް ގެ ޝަރީއަތުގެ މަރުހަލާތައް އަދި އެއްކޮށް ފުރިހަމައެއް ނުވެއެވެ.
ޕާކިސްތާނުގެ މިހާރުގެ ބޮޑުވަޒީރު ޝަހެބާޒް ޝަރީފަކީވެސް މަނީލޯންޑަރިންގް އާއި ރިޝްވަތާ އަދި ކޮރަޕްޝަނުގެ އެތައް ދައުވާތަކެއް ކުރެވިފައިވާ ބޭފުޅެކެވެ. ޝެހެބާޒް ޝަރީފު ބޮޑުވަޒީރުކަމުގެ ހުވާކުރުމުގެ ފުރުސަތު ލިބިވަޑައިގަތީވެސް ޕާކިސްތާނުގެ ދައުލަތުން އޭނާގެ މައްޗަށް އެތައް ދައުވާތަކެއް އުފުލާފައިވާތީ ކޯޓުން ޚާއްސަ ހުއްދައެއް ލިބިގެންނެވެ. ބޮޑުވަޒީރުކަން ލިބިވަޑައިގަތުމުން މިއިން އެއްވެސް ދައުވާއެއް ގެ ޝަރީއަތް ކުރިއަކަށް ނުދެއެވެ. ޝަރީއަތްތައްވަނީ ވަގުތީގޮތުން ސަސްޕެންޑް ކުރެވިފައެވެ.
އިމްރާންޚާންގެ މައްޗަށް އުފުލާފައިވާ ދައުވާތަކަކީވެސް އޭނާގެ ޕާޓީ އިންތިޚާބު ކާމިޔާބުކޮށްފިނަމަ އޭނާއަށް ބޮޑުވަޒީރުކަން ލިބުމަށް އޮތް ހުރަހަކަށް ނުވާނެއެވެ. ޕާކިސްތާނުގެ ކޯޓަކުން އިއްޔެވަނީ އިމްރާން ޚާންގެ މައްޗަށް ހިނގާ ދެ ދައުވާއެއްގައި ކަފާލާތުގެ ދަށުން އޭނާ ބަންދުނުކޮށް ދޫކޮށްލުމުގެ އަމުރެއް ނެރެފައެވެ.
އިމްރާންޚާން ގެ ސަޕޯޓަރުން ގެންދަނީ ޕާކިސްތާނުގެ ސަރުކާރަށް އުނދަނގޫވާވަރަށް ގައުމުގެ އެކި ކަންކޮޅުތަކުގައި ސަރުކާރާ ދެކޮޅަށް ވަރަށް ވަރުގަދަ މުޒާހަރާތަކެއް ކުރަމުންނެވެ. އިމްރާންޚާންގެ މަގްބޫލުކަން ޕާކިސްތާނުގައި މިހާރުވަނީ ދުވަހަކުވެސް ނުދާވަރަށް މައްޗަށް ގޮސްފައެވެ.
އެއީ ޕާކިސްތާނުގެ މިހާރުގެ ބޮޑުވަޒީރު ޝެހެބާޒް ޝަރީފުގެ ވެރިކަމުގައި ޕާކިސްތާންގައި ތަކެތީގެ އަގުތައް އިންތިހާއަށް މައްޗަށްގޮސް އިގްތިސާދީ ގޮތުން އިނދަޖެހުމާ ދިމާއަށް ދާތީއާއި މިދިޔަ އަހަރުގެ މާޗްމަހު އިމްރާން ޚާން މަގާމުން ދުރުކުރީ އެމެރިކާގެ ބާރާއި ނުފޫޒުގެ ސަބަބުން ސިފައިން އަޑީގައި ތިބެ ޕާކިސްތާނުގައި މިހާރު ވެރިކަންކުރާ ބޮޑު ދެޕާޓީއާ ޑީލް ހަދައިގެން ކަމަށް ކުރެވޭ ތުހުމަތުތައް ރައްޔިތުން ގަބޫލުކުރާތީއެވެ.
ޕާކިސްތާނުގެ ރައްޔިތުންގެ އަތްމަތި ދަތިވެ ފަގީރުކަމުގެ ނިސްބަތް ކުރިން ނުދާވަރަށް މައްޗަށް ދިޔުމާއެކު ބޭރު ފައިސާގެ ރިޒާވް ޕާކިސްތާނުގައި ހުސްވުމާ ގާތްވެފައިވާތީއެވެ. ފާއިތުވި 40 އަހަރު ތެރޭގައިވެސް މިއަށްވުރެ ޕާކިސްތާނު އިގްތިސާދީ ގޮތުން ދަށަށްގޮސްފައިވާ ދުވަސް އައިސްފައިނުވާކަމަށް ރިޕޯޓްތައް ބުނެއެވެ.
މިހާލަތަށް ޕާކިސްތާނުގެ އިގްތިސާދު ވެއްޓުމުގެ ސަބަބުތަކުގެ ތެރޭގައި ކޮވިޑް-19 ގެ ބަލިމަޑުކަމުގެ ސަބަބުން އިގްތިސާދު ހީނަރުވުމާއި މިދިޔަ އަހަރު ޕާކިސްތާނަށް ކުރިމަތިވި ފެންބޮޑުވުމުގެ ބޮޑު ކާރިސާއާ ގުޅިގެން 50 ވަރަކަށް މިލިޔަން މީހުން ހާލުގައި ޖެހުމާއި ފެންބޮޑުވުމުގެ ސަބަބުން ދަނޑުތައް ހަލާކުވެ ދަނޑުވެރިކަމުގެ އުފެއްދުންތައް އިންތިހާއަށް ދަށްވުމާއި ފެންބޮޑުވުމުގެ ސަބަބުން ލިބުނު މާއްދީ ގެއްލުންތައް ބޮޑުކަމުންނެވެ.
ޕާކިސްތާނުގައި ކުރިޔަށް އޮތް އާންމު އިންތިޚާބު ކާމިޔާބު ކުރުމުގެ ފުރުސަތު އެންމެ ބޮޑީ އިމްރާންޚާންގެ ޕާޓީއަށް ކަމަށް އެގައުމުގެ މަސްރަހު ދިރާސާކުރާ ފަރާތްތަކުން ދެކެއެވެ. ޕާކިސްތާނުގައި މިހާރު އޮތީ އެގައުމުގެ އެންމެ ބޮޑު ދެޕާޓީ ކަމަށްވާ މަރުހޫމާ ބޭނަޒީރު ބުއްޓޫގެ ޕާކިސްތާން ޕީޕަލްސް ޕާޓީއާއި ނަވާޒް ޝަރީފުގެ މުސްލިމް ލީގް ނަވާޒް ޕާޓީ ގުޅިގެން އުފައްދާފައިވާ ކޯލިޝަން ސަރުކާރެކެވެ. މިސަރުކާރުގެ މަގްބޫލުކަން ޕާކިސްތާނުގެ އާންމުންގެ މެދުގައި ވަރަށް ދަށެވެ.
އިމްރާންޚާން ސިޔާސީ މަސްރަހުން ދުރުކުރުމަކީ ޕާކިސްތާން ޕީޕަލްސް ޕާޓީއާއި ނަވާޒް ޝަރީފުގެ މުސްލިމް ލީގް ނަވާޒް ޕާޓީ އިތުރުން ޕާކިސްތާނުގެ ސިފައިންގެ އިސް ފަރާތްތަކުންވެސް މިވަގުތު ވަރަށް ބޭނުންވާކަމެއް ކަމަށް މުހައްލިލުން ވިދާޅުވެއެވެ. ނަމަވެސް އިމްރާންޚާންގެ ސަޕޯޓް ޕާކިސްތާނުގައި ބޮޑުކަމުން މިކަންކުރުންވަނީ ދަތި ކަމަކަށް ވެފައެވެ.