03 Apr 2023, 09:42
އެޗްބީއޯގެ އެންމެ މަގުބޫލު ޝޯތަކުގެ ތެރޭގައި ހިމެނޭ "ވައިޓް ލޮޓަސް"ގެ ތިންވަނަ ސީޒަނުން ފެންނާނެ މަންޒިލު އާންމުކޮށްފިއެވެ.
ޑްރާމާ ޝޯ ވައިޓް ލޮޓަސް އަކީ ރިލީޒްކުރުމާއެކު ބޮޑު މަގުބޫލުކަމެއް ހޯދަން ފަށާފައިވާ ޝޯއެކެވެ. މި ޝޯ ދައްކަމުން ދިޔަ ދުވަސްވަރު މުޅި އިންޓަނެޓުން މި ޝޯގެ ވާހަކަ ނޫން އެހެން ވާހަކައެއް ނީވެއެވެ. ދާދިފަހުން ޝޯގެ ދެވަނަ ސީޒަން ނިންމާލިއިރު ޝޯގެ ތިންވަނަ ސީޒަނެއް ވަނީ އިއުލާނުކޮށްފައެވެ.
ވައިޓް ލޮޓަސްގެ ކޮންމެ ސީޒަނެއްގައި ފެނިގެންދާނީ މައިގަނޑު ކެރެކްޓަރުން ކޮންމެވެސް ރިސޯޓެއްގައި ޗުއްޓީ ހޭދަކުރަމުންދާއިރު ދިމާވާ ކަންތައްތަކެވެ. އެގޮތުން ފުރަތަމަ ދެ ސީޒަން ފެނިގެން ގޮސްފައިވަނީ ހުޅަނގުންނެވެ. ފުރަތަމަ ސީޒަން ހަވާއީއިން ފެނުނު އިރު ދެވަނަ ސީޒަނުން ފެނުނީ އިޓަލީއެވެ.
މިފަހަރު ތިންވަނަ ސީޒަނަށް ޝޯގެ ކެރެކްޓަރުންނާއި ސްޓޯރީލައިން ދާނީ ތައިލެންޑަށެވެ. މައުލޫމާތު ލިބޭ ގޮތުގައި އެ ޝޯގެ އާ ސީޒަން ކުރިއަށް ދާނީ ތައިލެންޑްގެ ފޯ ސީޒަންސް ރިސޯޓު ހުންނަ ތަނެއްގައެވެ. ފޯ ސީޒަންސްގެ ހަތަރު ތަނެއް ތައިލެންޑުގައި ހުންނާނެއެވެ. އެ ތަންތައް ހުންނާނީ ބެންކޮކާއި ޗަންގްމައި އާއި ކޮ ސަމޫއީ އަދި ގޯލްޑެން ޓްރައިއެންގަލް ގައެވެ.
ވައިޓް ލޮޓަސް އަކީ ބޮޑު ކާސްޓެއް އޮތް ޝޯއެކެވެ. އެގޮތުން ތިއޯ ޖޭމްސް އާއި ޖެނިފާ ކޫލިޖްގެ އިތުރުން އެލެގްޒެންޑްރިއާ ޑަޑާރިއޯ އަދި އޯބްރީ ޕްލާޒާ ފަދަ އެކްޓަރުން ވަނީ ޝޯއިން ފެނިގެން ގޮސްފައެވެ. ޝޯގެ ތިންވަނަ ސީޒަނުން ފެންނާނެ އެކްޓަރުން އަދި ހާމަކޮށްފައެއް ނުވެއެވެ.
ވައިޓް ލޮޓަސް އަކީ އެވޯޑު ހަފުލާތަކުގައި ވެސް ބޮޑެތި ކާމިޔާބީތައް ހޯދާ ޝޯއެކެވެ. އެގޮތުން ޝޯގެ ފުރަތަމަ ސީޒަނަށް ވަނީ އެމީ އެވޯޑު ހަފުލާގައި ވެސް 10 އެވޯޑެއް ލިބިފައެވެ.