20 Apr 2023, 12:18
ގއ. މާމެންދޫގައި ހިންގި ގްރޫޕް މާރާމާރީއެއްގައި ވަޅިން ހަމަލާދީ އެރަށު ލިލީ އޮފްދަ ވެލީ، އަހްމަދު އުދައްޔު، 17، މަރާލި މައްސަލައާ ގުޅިގެން ދައުވާ އުފުލާފައިވާ މީހުންގެ ދިފާއުގައި އެ މީހުންގެ އާއިލާގެ ބައެއް މީހުންނާއި ރައްޓެހިން ހެކިބަސް ދީފިއެވެ.
އުދައްޔުގެ މަރުގެ މައްސަލައިގައި ދައުލަތުން ދައުވާ އުފުލާފައިވަނީ ތިން މީހެއްގެ މައްޗަށެވެ. އެއީ އުއްދަޔު މަރާލުމުގައި ބައިވެރިވިކަމުގެ ތުހުމަތު ކުރެވޭ ގއ. މާމެންދޫ، ރިހިފަރުދާގެ، އަހުމަދު ޝަމީމްއާއި، އެރަށު ބިލަތްމާގެ، ޝަރަފު ރަޝިދުއާއި، ހަމަ އެރަށު ގުލްފާމުގެ، މުހައްމަދު މާޒިންއެވެ. އެ ތިން މީހުންގެ މައްޗަށް އުފުލާފައި ވަނީ، ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގައި ބައިވެރިވުމުގެ ކުށުގެ ދައުވާއެވެ.
އެ މައްސަލައާ ގުޅިގެން ކްރިމިނަލް ކޯޓުގައި މިއަދު ބޭއްވި ޝަރީއަތުގެ މަޖިލީހުގައި ވަނީ ދިފާއުން ހުށަހަޅާފައިވާ ހަތަރު މީހެއްގެ ހެކިބަސް ނަގާފައެވެ.
އެގޮތުން ފުރަތަމަ ހެކިބަސް ނަގާފައިވަނީ ޝަރަފު އަދި މާޒިންގެ ފަރާތުން ހުށަހެޅި ދެ ހެކިންގެ ހެކިބަހެވެ. މާމެންދޫ މެޖިސްޓްރޭޓް ކޯޓުގައި ތިބެގެން ހެކިބަސް ދެމުން އެ ދެ މީހުން ބުނެފައިވަނީ އެއީ ދައުވާ ލިބޭ ދެ މީހުންގެ ރަހުމަތްތެރިން ކަމަށެވެ.
ހާދިސާ ހިނގި ތަނުގައި އެތަނުން އެކަކު ހުރިކަން ފާހަގަކޮށް ހެކިބަސް ދެމުން އޭނާ ބުނީ, އުދައްޔުއަށް ހަމަލާދިން މީހުންގެ ތެރޭގައި ޝަރަފު ނުހިމެނޭކަން ޔާގީންކޮށް ބުނަން އެނގޭ ކަމަށެވެ. ނަމަވެސް އެއީ ރޭގަނޑުގެ ވަގުތަށް ވެފައި އެތަން އޮތީ އަނދިރިކޮށް ކަމަށްވާތީ އެ މާރާމާރީގައި ޝާމިލްވީ ކޮންބައެއްކަން ބުންނަ ނޭނގޭ ކަމަށެވެ.
އެ މީހުންގެ ތެރޭގައި ޝަރަފު ނުހިމެނޭކަން އެނގެނީ އެއީ ކުޑައިރުން ފެށިގެން ވެސް އޭނާ ޝަރަފު ދަންނާތީ ކަމަށް ބުނެފައިވެއެވެ.
އެ ހެކިވެރިޔާގެ ހެކި ބަހުގައި ފުށުއެރުންތަކެއް ހުރިކަން ފާހަގަކޮށް ދައުލަތުގެ ވަކީލް ވިދާޅުވީ, ހެކިވެރިޔާ މީގެ ކުރިން ފުލުހުންނަށް ބަޔާނެއް ދީފައިވާ ކަމަށެވެ. ހެކިވެރިޔާ ސޮއި ކޮށްފައިވާ އެ ބަޔާނުގައިވާ ގޮތުން, އުދައްޔު މަރުވި މާރާމާރީގެ ހަބަރު އޭނާއަށް ލިބިފައިވަނީ އެތަން ފެނުނު އެހެން މީހެއްގެ ފުށުން ކަމަށް ދައުލަތުގެ ވަކީލް ވިދާޅުވިއެވެ.
އެކަމަށް ރައްދު ދެއްވައި ހެކިވެރިޔާ ބުނެފައިވަނީ ފުލުހުންނަށް ބަޔާނެއް ދެވިފައިވާކަން ހަނދާނެއްނެތް ކަމަށެވެ.
މިއަދުގެ އަޑުއެހުމުގައި ޝަމީމުގެ ބައްޕަ އާއި އޭނާގެ އެއްބަނޑު އެއްބަފާ ދައްތައެއް ވެސް ވަނީ ހެކިބަސް ދީފައެވެ.
އެގޮތުން ދެ މީހުން ވެސް ބުނެފައިވަނީ ހާދިސާ ހިނގިރޭ 8:30 އިން ފެށިގެން 10 ޖެހުމާ ހަމައަށް ޝަމީމް ހުރީ އޭނާ ދިރިއުޅޭ ގޭގައި ކަމަށެވެ.
އުދައްޔު މަރާލި ކަމުގެ ކުށުގައި ގަސްތުގައި މީހަކު މަރާލުމުގެ ދައުވާ އުފުލީ 18 އަހަރުން ދަށުގެ ކުޑަކުއްޖަކަށެވެ. އޭނާގެ މައްޗަށް ކުށް ސާބިތުވެ އަދަބެއްގެ ގޮތުގައި ކުޑަކުދިން ބަންދުކުރާ މަރުކަޒެއްގައި ބަންދުކުރަން ޖުވެނައިލް ކޯޓުން ވަނީ ހުކުމް ކޮށްފައެވެ.