04 May 2023, 08:54
ސައުތު ސިނަމާގެ ކާމިޔާބު ބަތަލާ ސަމަންތާ ޕްރަބޫއަށް ބަތަލާ އަނުޝްކާ ޝަރްމާގެ ފިލްމު ކުންފުނިން އުފައްދާ ޕްރޮޖެކްޓެއްގައި މަސައްކަތްކުރުމުގެ ފުރުސަތު ލިބިއްޖެއެވެ.
ފިލްމު "ޕުޝްޕާ"ގެ "އޯ އަންޓަވާ" ލަވައިން ބެލުންތެރިންގެ ބޮޑު މަގުބޫލުކަމެއް ހޯދި ބަތަލާ މިޕްރޮޖެކްޓަށް ސޮއިކުރިކަމެއް ކަށަވަރުނުވެއެވެ. އެހެންނަމަވެސް މި ޕްރޮޖެކްޓަށް ސަމަންތާ ގެނައުމުގެ މަޝްވަރާ އޭނާއާއެކު ކުރިޔަށްދާކަމަށް ރިޕޯޓުތަކުން ބުނެއެވެ.
އަނުޝްކާ ޝަރްމާގެ އަމިއްލަ ފިލްމު ކުންފުނި ކްލީން ސްލޭޓް ފިލްމްޒްއިން އުފައްދަން ނިންމާފައިވާ މި ޕްރޮޖެކްޓަކީ ވެބް ސީރީސްއެއްކަމެއް ނުވަތަ ފީޗަ ފިލްމެއްކަންވެސް އަދި ޔަގީންނުވެއެވެ. އަލަށް އުފައްދަން ނިންމާފައިވާ މިޕްރެޖްކްޓަކީ އެންމެ މުހިންމު ރޯލުތަކުން އަންހެނުން ފެންނަ ޕްރޮޖެކްޓެއްކަމުން، ސަމަންތާ މިފިލްމަށް ނުވަތަ ވެބް ސީރީސްއަށް އެއްބަސްވުމުގެ ފުރުސަތު ބޮޑުކަމަށްވެސް ރިޕޯޓުތައް ބުނެއެވެ. ސަބަބަކީ މިހާތަނަށް ސަމަންތާ ކުޅެފައިވާ ގިނަ ފިލްމާއި ވެބް ސީރީސްތަކަކީވެސް ބަތަލާއިންގެ ރޯލް ބޮޑު ފިލްމުތަކާއި ސީރީސްތަކެވެ.
އަނުޝްކާގެ ބަދަލުގައި މިފަހަރު މިޕްރޮޖެކްޓްގައި ޕްރޮޑިއުސަރެއްގެ ރޯލް އަދާކުރާނީ އަނުޝްކާގެ ބޭބެ ކާނެޝް ޝަރްމާއެވެ. އަނުޝްކާ އާއި ކާނެޝް ގުޅިގެން އުފެއްދި ފިލްމު ކުންފުނި ހިންގުމުގެ ޒިންމާ އަނުޝްކާވަނީ ކާނެޝްއާ ހަވާލުކޮށްފައެވެ.
ސަމަންތާގެ ނިންމުން އެނގުމާއެކު މިޕްރޮޖެކްޓާބެހޭ އިތުރު މަޢުލޫމާތު ވަރަށް އަވަހަށް މީޑިއާތަކާ ހިއްސާކުރާނެކަމަށް ކްލީން ސްލޭޓް ފިލްމްޒްއިންވަނީ ބުނެފައެވެ.
ސަމަންތާއަކީ، އެމޭޒަން ޕްރައިމްގެ ވެބް ސީރީސް "ދަ ފެމިލީ މޭން"ގެ ދެވަނަ ސީޒަންއިން ބެލުންތެރިންގެ ސަމާލުކަން ވަރަށް ބޮޑަށް ހޯދި ބަތަލާއެކެވެ. ހިންދީ ވެބް ސީރީސްތަކުން ސަމަންތާ ފެނުނުނަމަވެސް ބޮލީވުޑް ފިލްމެއް ކުޅެން އަދި ވިސްނާފައިނެތްކަމަށް އޭނާ ވަނީ ބުނެފައެވެ.
ސަމަންތާވަނީ ދާދިފަހުން އެމޭޒަން ޕްރައިމްއިން ރިލީޒްކުރި އިނގިރޭސި ވެބް ސީރީސް "ސިޓަޑެލް"ގެ އިންޑިއާގެ އުފެއްދުމަށް ސޮއިކޮށްފައެވެ. މި ސީރީސް ރިލީޒްކުރާނެ ވަކި ތާރީޚެއް އަދި އިއުލާނުނުކުރެއެވެ.