10 May 2023, 09:09
އިންޑިއާގެ އެންމެ ގިނަ ބައެއްގެ ލޯތްބާއި އިހުތިރާމް ހޯދާފައިވާ އެއް އެކްޓަރު ކަމަލް ޙަސަން 1994ވަނަ އަހަރު އުފެއްދި ފިލްމު "މަހަނަދީ"އަކީ އޭނާގެ ހަޔާތާ ގުޅިފައިވާ ވަރަށް ޖަޒުބާތީ ފިލްމެއްކަމަށް އޭނާ ބުނެފިއެވެ.
ފިލްމު އުފެއްދިތާ 29 އަހަރުވެފައިވާ އިރު މިފިލްމު އުފެއްދުމުގެ ފަހަތުގައިވާ ސިއްރު ދުވަހަކުވެސް ހަނދާނުން ފޮހެނުލެވޭނެކަމަށް ކަމަލް ބުނެފައެވެ. ކަމަލް އަމިއްލައަށް ލިޔުނު ވާހަކައެއްގެ މައްޗަށް އުފެއްދި މިފިލްމުގެ ވާހަކަ ހިޔާލަށްއައީ އޭރު ގޭގައި މަސައްކަތްކުރަން ގެންގުޅުނު ފަރާތުން ކަމަލްގެ ދެ އަންހެންކުދިން ރަހީނުކުރުމަށް ރޭވި ރޭވުން ފަޅާއެރުމުންކަމަށް އެކްޓަރުވަނީ ބުނެފައެވެ.
ކަމަލްއަށް މިރޭވުމާ ގުޅޭގޮތުން އެނގުނީ އިއްތިފާގަކުންކަމަށާއި މިރޭވުމުގެ މަގްސަދަކީ ފައިސާ ހޯދުންކަމަށްވެސް ކަމަލްވަނީ ބުނެފައެވެ.
މިހާދިސާއާ ގުޅޭގޮތުން އޭރު ވާހަކަ ދައްކަން ބޭނުންނުވީ ކަމަލްގެ ދެ އަންހެން ކުދިން ހަގުކަމުން ކަމަށާއި މިހާރު ކުދިން ބޮޑެތިވެފައިވުމުން މިފިލްމުގެ ހަގީގަތް ވިސްނޭނެކަމަށް ގަބޫލުކުރާކަމަށް އެކްޓަރުވަނީ ބުނެފައެވެ.
އެ ރޭވުން ރޭވި މީހާ ދެކެ ވަރަށް ރުޅިއައިކަމަށްވެސް އެކްޓަރުވަނީ ބުނެފައެވެ. ނަމަވެސް އެދުވަސްވަރު ފިލްމެއް ލިޔުމުގެ މަސައްކަތުގައި އުޅުމުން މިމައްސަލަ މާބޮޑުކަމަކަށް ހަދަން ބޭނުންނުވީކަމަށް އެކްޓަރުވަނީ ބުނެފައެވެ.
މި ހާދިސާއަށްފަހު ފިލްމު "މަހަނަދީ" ވުޖޫދަށް އައިކަމަށާއި މިފިލްމުވީ ކަމަލްއަށް ހުރިހާގޮތަކުންވެސް ކާމިޔާބީ ގެނެސްދިން ފިލްމަކަށްކަމަށް އޭނާ ވަނީ ބުނެފައެވެ.
ކަމަލްއަކީ ސައުތު ސިނަމާގެ ފިލްމުތަކުގެ އިތުރުން ބައެއް ހިންދީ ފިލްމުތަކުންވެސް ފެނިފައިވާ އެކްޓަރެކެވެ. އޭގެތެރޭގައި ބަތަލާ ސްރީދޭވީއާއެކު ކުޅުނު ފިލްމު "ސަދްމާ"،ޑިމްޕަލް ކަޕާޑީއާއެކު ކުޅުނު ފިލްމު "ސާގަރު" އަދި ބަތަލާ ރާޓީއާއެކު ކުޅުނު ފިލްމު "ދޭކާ ޕިޔާރު ތުމާރާ" ހިމެނެއެވެ.
ކުރީގެ ފިލްމީ ބަތަލާ ސާރިކާ ތާކުރްއާ ކައިވެނިކޮށްގެން ކަމަލްއަށް ދެ އަންހެން ކުދިން ލިބިފައިވެއެވެ. އޭގެތެރެއިން ޝްރުތީ ހަސަންއަކީ ސައުތު ސިނަމާ އަދި ހިންދީ ސިނަމާގައިވެސް ފާހަގަކޮށްލެވޭ ބަތަލާއެކެވެ. ހަގު ދަރިފުޅު އަކްޝަރާ ހަސަންވަނީ 2015ވަނަ އަހަރު ފިލްމީ ދާއިރާއަށް ތަޢާރަފުވެފައެވެ. ކަމަލް އެންމެ ފަހުން ފެނިފައިވަނީ މިދިޔަ އަހަރު ރިލީޒްކުރި ތަމަޅަ ފިލްމު "ވިކްރަމް"އިންނެވެ.