16 May 2023, 23:46
އިމުގެ މައްސަލައިގައި އިލްމުވެރިންގެ ގުޅުމުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާ ބައްދަލުކޮށް ތިން ކަމެއް ހުށަހަޅައިފިއެވެ.
އެ ބައްދުލުވުން އޮތީ މިއަދު ރައީސް އޮފީހުގައެވެ.
އިލްމުވެރިންގެ ގުޅުމުން ބުނީ، ޗާގޯސް މައްސަލައިގައި އިލްމުވެރިންގެ ފަރާތުން ކުރިއަށް ގެންދާ މައުލޫމާތު އެއްކުރުމުގެ ސިލްސިލާގެ ތެރެއިން ސަރުކާރަށް ހުށައަޅަން ހުރި ސުވާލުތައް ހުށައެޅުމަށާއި ރައީސާ ހިއްސާކުރަން ހުރި ކަންބޮޑުވުންތައް ހިއްސާކުރުމަށް ޓަކައި އެ މަނިކުފާނާ އެކު މިއަދު ބޭއްވި ދޮޅުގަޑިއިރުގެ ބައްދަލުވުމުގައި، އެ ޖަމިއްޔާގެ ފަރާތުން ތިން ކަމެއް ހުށަހަޅާފައިވާ ކަމަށެވެ.
އޭގެ ތެރޭގައި ޗާގޮސްގެ މައްސަލައިގައި މޮރިޝަސްގެ ސަރުކާރަށް ރާއްޖެއިން ފޮނުވި ސިޓީ ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް ހިއްސާ ކުރުމާއި ރާއްޖޭ އީއީޒެޑް ކަމަށް ގާނޫނުގައި ބަޔާންކޮށްފައިވާ ސަރަޙައްދާ މެދު، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ނިންމާފައިވާ ނިންމުން މުރާޖައާ ކުރުމަށް ހުށަހެޅުމާއި އިލްމުވެރިންގެ ގުޅުމުގެ އިސްނެގުމާ އެކު، އީއީޒެޑް މައްސަލައިގައި ސަރުކާރުގެ ސްޓޭންޑާ ދެކޮޅު ފަރާތްތަކާ އެކު ސަރުކާރުން ޕަބްލިކް ބަހުސަކަށް ދިއުން ހިމެނެއެވެ.
ޗާގޯސް މައްސަލައިގައި އިލްމުވެރިންގެ ގުޅުމުން ކުރިއަށް ގެންދާ މައުލޫމާތު ހިއްސާކުރުމުގެ ސިލްސިލާގެ ތެރެއިން، އެ ޖަމިއްޔާއިން ވަނީ އިޓްލޮސްގެ ނިންމުމާ ނުރުހުން ފާޅުކުރާ، ސަރުކާރާ ދެކޮޅު ފަރާތްތަކާ ވެސް ބައްދަލުކޮށްފައެވެ.
އިޓްލޮސް އިން މިދިޔަ މަހު ނިންމީ ފުށުއަރާ ސަރަހައްދު ރާއްޖެއަށް ބޮޑުބައި ލިބޭ ގޮތަށެވެ. ރާއްޖެއަށް 47،232 އަކަ ކިލޯމީޓަރުގެ ސަރަހައްދެއް ލިބިފައިވާއިރު މޮރީޝަސްއަށް ލިބުނީ 45،331 އަކަ ކިލޯމީޓަރުގެ ސަރަހައްދެކެވެ.
އިމުގެ މައްސަލައިގައި އިޓްލޮސްގެ ނިންމުން ކަމުނުގޮސްގެން، އިދިކޮޅު ފަރާތްތަކުން ނުރުހުން ފާޅުކުރަނީ، އެ ސަރަހައްދު އެއްކޮށް ލިބެން ޖެހޭނީ ރާއްޖެއަށް ކަމަށް ބުނެއެވެ.