12 Jun 2023, 14:29
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމަށް 54 މެންބަރުންގެ ސޮޔާ އެކު ހުށަހަޅާފައިވާ މައްސަލައިގައި، އެ މަނިކުފާނަށް ދޭން ޖެހޭ ނޯޓިސް މިއަދު ފޮނުވައިފިއެވެ.
އެމްޑީޕީގެ ރައީސްކަން ވެސް ކުރައްވާ ނަޝީދުގެ އިތުބާރު ނެތް ކަމަށް ހުށަހަޅާފައިވަނީ އެ ޕާޓީން އިސްވެ އޮވެއެވެ.
މަޖިލީހުގެ އަމީންއާންމު ފާތިމަތު ނިޔުޝާ ސޮއިކުރައްވާ މައްޗަންގޮޅިމެދު ދާއިރާގެ މެންބަރުކަން ވެސް ކުރައްވާ ނަޝީދަށް މިއަދު ފޮނުއްވި ސިޓީއެއްގައި ވަނީ އެ މަނިކުފާނުގެ އިތުބާރު ނެތް ކަމުގެ މައްސަލައެއް މި މަހުގެ ހަތްވަނަ ދުވަހު ލިބިފައިވާ ކަމަށެވެ.
މަޖިލީހުގެ ގަވާއިދު ބުނާ ގޮތުން އިތުބާރު ނެތް ކަމުގެ މައްސަލައެއް ހުށަހެޅޭތާ، ރަސްމީ ބަންދުނޫން ތިން ދުވަހުގެ ތެރޭގައި ގަވާއިދުގައި ބުނާ 14 ދުވަހުގެ ނޯޓިސް ފޮނުވަން ޖެހެއެވެ. އެހެންވެ، އަމީންއާންމުގެ ސިޓީގައި ވަނީ ނަޝީދަށް އެ ނޯޓިސް ދީފައެވެ.
އެކަމަކު، އެ މައްސަލަ އެޖެންޑާ ކުރެވޭނެ ވަކި ދުވަހެއް އެ ސިޓީގައި ބަޔާން ކޮށްފައެއް ނުވެއެވެ.
"އެ ގަރާރު އެޖެންޑާ ކުރެވޭނެ ވަކި ތާރީޚެއް ފަހުން އަންގާނެ ވާހަކަ ދެންނެވީމެވެ." ނަޝީދަށް މަޖިލީހުގެ އިދާރާއިން ފޮނުއްވި ސިޓިގައި ވެއެވެ.
އެ މަނިކުފާނުގެ އިތުރުން، މަޖިލީހުގެ ނައިބު ރައީސް އަދި ނަޝީދުގެ ދެބެއިންގެ ދެ ދަރި ކޮއްކޮ އީވާ އަބްދުﷲ ގެ އިތުބާރު ނެތް ކަމުގެ މައްސަލައެއް ވެސް އެމްޑީޕީން ވަނީ ހުށަހަޅައިފައެވެ.
އެ މައްސަލައިގައި އޭނާއަށް ފޮނުވި ނޯޓިސްގެ މުއްދަތު ވެސް ހަމަވެފައިވާއިރު އަދިވެސް އީވާގެ މައްސަލަ އެޖެންޑާ ކުރެވިފައެއް ނުވެއެވެ. މަޖިލީހުގެ ގަވާއިދު ބުނާ ގޮތުން، އިތުބާރު ނެތް ކަމުގެ މައްސަލައެއް އެޖެންޑާ ކުރުމުގެ ކުރިން އާންމު ކޮމިޓީން، އެ މައްސަލައިގައި އަމަލު ކުރާނެ ގޮތްތަކެއް ކަނޑައަޅަން ޖެހެއެވެ.
އެކަމަކު، މަޖިލީހުގެ 13 މެންބަރަކު އެމްޑީޕީން ވަކިވުމާ އެކު މަޖިލީހުގެ ކޮމްޕޮޒިޝަނަށް އައި ބަދަލާ އެއްގޮތަށް ކޮމިޓީތައް އެކުލަވައިނުލާ އާންމު ކޮމިޓީ ކުރިއަށް ގެންދެވިދާނެ ކަމަކަށް ރިޔާސަތުން ގަބޫލެއް ނުކުރައްވައެވެ. ކޮމިޓީތައް އެކުލަވައިނުލެވި ލަސްވަނީ، އެ ކަމުގައި ސިޔާސީ ޕާޓީތަކަށް އެއްބަސްވުމަކަށް ނާދެވުމުންނެވެ.
އެހެންވެ، އީވާގެ މައްސަލަ ވެސް އެޖެންޑާ ނުކުރެވި މަޖިލީސް ހުއްޓުމަކަށް އައިސްފައިވާއިރު، ނަޝީދުގެ މައްސަލަ އެޖެންޑާ ކުރެވޭނެ ދުވަހެއް ވެސް އަދި ނޭނގެއެވެ.