15 Jun 2023, 14:07
ވޮޝިންޓަން (14 ޖޫން 2023): ރަޝިއާގެ ވައިގެ ސިފައިންގެ އަމަލުތައް ހުންނަގޮތުން އެކަމަށް ރައްދު ދިނުމަށްޓަކައި މެދުއިރުމަތީގައި ހިންގާ އަސްކަރީ ހަރަކާތްތަކަށް އެފް 22 ރެޕްޓޯ މަރުކާގެ ފައިޓާޖެޓް ނެރެފައިވާ ކަމަށް އެމެރިކާ ބުނެފިއެވެ.
މެދުއިރުމަތީގައި އެމެރިކާ ހިންގާ އަސްކަރީ ކަންކަން ބަލަހައްޓާ އެމެރިކާގެ ކޮމާންޑް ކަމަށްވާ ސެންޓްރަލް ކޮމާންޑުން ބުނީ ސޫރިޔާގައި މަރުކަޒުކޮށްފައިވާ ރަޝިއާގެ ވައިގެ ބާރުތަކުގެ އަމަލުތައް ހުންނަނީ ރައްކާތެރި ކަމެއްނެތި އުދުވާނީ ގޮތަކަށް ކަމަށާއި ސޫރިޔާގައި އުދުހޭ ރަޝިއާގެ ފައިޓާޖެޓްތަކުގެ ހަރަކާތްތަކުގެ ސަބަބުން ސޫރިޔާގައި އެމެރިކާ ހިންގާ އަސްކަރީ ހަރަކާތްތަކަށް ދަތިތައް ފޯރަމުން ދާކަމުގައެވެ.
މެދުއިރުމަތީގައި އެމެރިކާ ހިންގާ އަސްކަރީ ހަރަކާތްތަކަށް އެފް 22 ރެޕްޓޯ މަރުކާގެ ފައިޓާޖެޓް ނެރެންޖެހުނީ މިކަމުގެ ނަތީޖާއެއްގެ ގޮތުންކަމަށްވެސް އެމެރިކާގެ ސެންޓްރަލް ކޮމާންޑުން ނެރުނު ބަޔާނެއް ބުނެއެވެ. މެދުއިރުމަތީގައި އެމެރިކާގެ ގިނަ އަދަދެއްގެ އަސްކަރީ ބޭސްތައް އެބަހުއްޓެވެ. މީގެތެރޭގައި ތުރުކީގެ އެންޖެރެލިކް ވައިގެ ބޭސް އާއި ގަތަރުގައިވާ އެމެރިކާގެ އަސްކަރީ ބޭސް އާއި ބަހްރައިންގައިވާ އެމެރިކާގެ އަސްކަރީ ބޭސް ހިމެނެއެވެ.
އެފް 22 ރެޕްޓޯ މަރުކާގެ ފައިޓާޖެޓްތައް ރުކުރުވާލީ މީގެތެރެއިން ކޮންބޭސް އެއްގައި ކަން އެމެރިކާގެ ސެންޓްރަލް ކޮމާންޑުން ހާމަކޮށްފައެއް ނުވެއެވެ. ތުރުކީގައި އެމެރިކާ އަސްކަރީ ބޭސް ގާއިމްކޮށްފައިވަނީ ތުރުކީއަކީ ނޭޓޯގެ ގައުމަކަށްވާތީ އެމެރިކާއަށް ލިބޭ އަސްކަރީ އިމްތިޔާޒްތަކުގެ ދަށުންނެވެ.
ގަތަރާއި ބަހްރައިންގައި އެމެރިކާ އަސްކަރީ ބޭސްތައް ބިނާކޮށްފައިވަނީ އެދެގައުމުގެ ސަރުކާރުތަކުގެ އެދުމުގެ މަތިންނެވެ. ނަމަވެސް ސޫރިޔާގައި އެމެރިކާ ފައި ހަރުކޮށްލައިގެން އުޅެނީ ގަދަބާރު ބޭނުންކޮށްގެން އިސްތިއުމާރީ އުސޫލުންނެވެ. ސޫރިޔާ ސަރުކާރުގެ ހުއްދައަކާ ނުލައި ގަވައިދާ ގާނޫނާ ޚިލާފަށެވެ.
ސޫރިޔާގައި އެމެރިކާގެ ވައިގެ މަރުކަޒެއް ނެތްނަމަވެސް ސޫރިޔާގެ އިރުއުތުރުގައި އެމެރިކާގެ 900 ވަރަކަށް ސިފައިން ގަވައިދާ ޚިލާފަށް ފައިހަރުކޮށްލައިގެން އެބަތިއްބެވެ. އެމެރިކާގެ މިއަމަލަކީ މިނިވަން މުސްތަގިއްލު ގައުމެއްގެ މިނިވަންކަމާއި ސިޔާދަތަށް ފާޅުގައި އަރައިގަތުން ކަމަށްވިޔަސް ސޫރިޔާގެ ދާޚިލީ ހަނގުރާމައިގެ ނާޒާއިޒު ފައިދާ ނަގައިގެން އެމެރިކާ އިސްތިއުމާރީ އުސޫލުން ސޫރިޔާއަށް ވަދެގަނެގެން އުޅޭ އުޅުން ކުށްވެރިކުރުމުގައި އދ. ވަނީ ނާކާމިޔާބުވެފައެވެ.
އެމެރިކާ ސިފައިންގެ 900 މީހުން ސޫރިއާގައި ފައިހަރުކޮށްލާފައިވަނީ ސޫރިއާގެ ތެލާއި އަގުބޮޑު މައުދަންތައް އެންމެ ގިނައިން ހުރި ސަރަހައްދުގައެވެ. އެސަރަހައްދުން ވަގަށް ތެޔޮނަގައިގެން ކަޅުބާޒާރުގައި ވިއްކައި އެއިން އެމެރިކާ މާލީ ފައިދާ ހޯދާކަމަށާއި އެފައިދާތަކުގެ ބޮޑުބައެއް ދެނީ ސޫރިއާގެ ކުރުދީ ބާޣީ ޖަމާއަތްތަކަށް ކަމުގެ ތުހުމަތު ސޫރިއާ ސަރުކާރުންނާއި ސޫރިޔާގެ އަވަށްޓެރި ތުރުކީންވަނީ އެމެރިކާގެ މައްޗަށް ކޮށްފައެވެ. އެމެރިކާ ސޫރިޔާގެ ކުރުދީ ބާޣީންނަށް މިގޮތަށް އެހީވަނީ ބާޣީ ޖަމާއަތްތަކުގެ އެހީގައި ސޫރިޔާގައި އެމެރިކާ ކުރަން ބޭނުންވާކަންކަން ކުރުމަށެވެ.
އެމެރިކާ ސޫރިޔާގެ އިރު އުތުގެ ސަރަހައްދަށް ވަދެގަނެގެންއުޅެނީ އައިއެސް ޖަމާއަތާއި އަލްގާއިދާގެ ހަނގުރާމަވެރިންނާ ކުރިމަތިލުމުގެ ނަމުގައެވެ. ނަމަވެސް ސޫރިޔާގައި ފައިހަރުކޮށްލައިގެން ހަގީގަތުގައި އެމެރިކާ ކުރަމުންގެންދާ އެއް ކަމަކީ ސޫރިއާގައި އީރާނާއި ރަޝިއާ ހިންގާ އަސްކަރީ ހަރަކާތްތައް ބަލައި މޮނިޓާ ކުރުމެވެ. އަނެއްކަމަކީ ސޫރިއާގެ ރައީސް ބައްޝާރުލް އަސަދުގެ ސަރުކާރާ އިދިކޮޅު ބާޣީ ޖަމާއަތްތަކަށް އެހީތެރިވުމާއި ބައްޝާރުގެ ސަރުކާރަށް ފިއްތުންތައް ކުރިމަތިކުރުމެވެ.
ރަޝިއާގެ ވައިގެ ސިފައިންގެ އަމަލުތައް ހުންނަގޮތުން އެކަމަށް ރައްދު ދިނުމަށް ކަމަށްބުނެ މެދުއިރުމަތީގައިވާ އެމެރިކާގެ އަސްކަރީ ބޭސްތަކަށް އެފް 22 ރެޕްޓޯ މަރުކާގެ ފައިޓާޖެޓްތައް ނެރުނު ނަމަވެސް ރަޝިއާއާ ސީދާގޮތެއްގައި ކުރިމަތިލުމަކީ އެމެރިކާއަށް ކުރަންކެރޭނެ ކަމެއް ނޫންކަމަށް މުހައްލިލުންނާއި މުރާސިލުން ދެކެއެވެ. އެހެންކަމުން އެފް 22 ރެޕްޓޯ މަރުކާގެ ފައިޓާޖެޓް ނެރުމުގައި އެމެރިކާގެ ބޭނުމަކީ ހަމައެކަނި އެމެރިކާގެ އަސްކަރީ ބާރު ރަޝިއާއަށް ދައްކާލައި އިންޒާރެއް ދިނުންކަމަށް އެފަރާތްތަކުން ބުނެއެވެ.