17 Jun 2023, 08:42
ގއ. ވިލިނގިލިން ގެއްލިގެން ހޯދަމުން ދިޔަ މީހާ ހެޔޮހާލުގައި ފެނިއްޖެއެވެ.
ބުރާސްފަތި ދުވަހުގެ ރެެއިން ފަށައިގެން ހޯދަމުން ދިޔައީ އެ ރަށު ރަތްވިލާ އާގެ އައްސަދު އަހްމަދެވެ.
އޭނާ ގެއްލިގެން އުޅޭތީ ބުރާސްފަތި ދުވަހުގެ ރޭ 01:10 ހާއިރު ރިޕޯޓު ކުރިއިރު އޭނާ ހޯދުމުގެ މަސައްކަތް ފުލުހުންނާއި ރަށު ކައުންސިލުން ވަގުތުން ފެށިއެވެ.
ކުރި މަސައްކަތުން އޭނާ ފެނުނީ ރޭ މެންދަމު ތިނެއް ޖަހާލާހާއިރު ގެއެއްގެ ތެރޭގައި ފިލާ އޮއްވާކަމަށް އެ ރަށުން މައުލޫމާތު ދިން މީހަކު ބުންޏެވެ. އެއީ އޭނާގެ ބޭބެއެއްގެ ގެ ކަމަށާއި އެ ގޭގެ މީހުން މިހާރު ދިރިއުޅެނީ މާލޭގައި ކަމަށް ވެސް އޭނާ ބުންޏެވެ.
"މިހާރު ހުސް ބަންގްލަދޭޝް މީހުން އެ ތަނުގައި އުޅޭނީ،" އޭނާ ބުންޏެވެ.
ފެނުނުއިރު އޭނާއަށް އެއްވެސް އަނިޔާއެއް ވެފައެއް ނުވެއެވެ. ހުރީ ހެޔޮހާލުގައެވެ.
އެ ރަށުގައި ހުރި އިތުބާރު ހިފޭ މަސްދަރަކުން އިއްޔެ "ސަން"އަށް ކިޔައިދިން ގޮތުގައި އައްސަދު އެންމެ ފަހުން ފެނިފައިވަނީ ބުރާސްފަތި ދުވަހު މެންދުރު ފަހު 02:25 ހާއިރު އެ ރަށު އިޖްތިމާއީ މަރުކަޒު ކައިރިންނެވެ.
އެގޮތުން, އޭނާ އިޖްތިމާއީ މަރުކަޒު ކައިރި ހުންނަ ފިހާރައެއް ކަމަށްވާ "ޑެއިލީ ޑޯޒް"އިން ފެންފުޅިއެއް ގަނެ އެ ތަނުން ދިޔައީ ކަމަށާއި އޭގެ ފަހުން އެ ދުވަހު އިރުއޮއްސެން ގާތްވީއިރު ވެސް އޭނާގެ ޚަބަރެއްވެފައިނުވާ ކަމަށް އެ ރަށުން ވާހަކަ ދެއްކި މީހާ ބުންޏެވެ.
އެއަށް ފަހު ގާތްގަނޑަކަށް ހަވީރު 05:45 ހާއިރު އައްސަދު އޭނާގެ ގާތް ދެ ތިން މީހަކަށް ގުޅައި ވަރަށް ކުރުކޮށް ވާހަކަ ދެއްކި ކަމަށާއި އެއީ އެންމެ ފަހުުން އައްސަދާ ގުޅުނު ވަގުތު ކަމަށް އޭނާ ކިޔައިދިނެވެ.
"އޭގެ ފަހުން އައްސަދު އޭނާގެ ގާތް ދެ ތިން މީހަކަށް މި ގުޅަނީ. ގުޅައިފައި ވެސް މާ ބައިވަރު ވާހަކަތަކެއް ނުއެއް ދައްކާ. ހުރެފައި މި އަހަނީ ކޮންތާކުތޯ، ކޮން ބަޔަކާ އެކުތޯ ކީއްތޯ ކުރަނީ. އެއަށް ޖަވާބު ދީ ނިމޭތަނުން އިތުރު ވާހަކައެއް ނުދެއްކެނީސް ފޯނު ކަނޑާލަނީ،" އޭނާ ބުންޏެވެ.
އެ ރަށުން މައުލޫމާތު ދިން މީހާ ބުނި ގޮތުގައި އައްސަދަކީ ބިދޭސީ ބައެއް މަސައްކަތްތެރިން ގޮވައިގެން ކޮންސްޓްރަކްޝަން މަސައްކަތް ކުރާ މީހެކެވެ.
އެހެންވެ, އެ މަސައްކަތަށް އޭނާ އެ ރަށުގައި މިހާރު ވެސް ބޭނުން ކުރާ ގުދަނެއް ހުންނަ ކަމަށާއި އޭނާ ހޯދަން ކުރަމުން އަންނަ މަސައްކަތުގެ ތެރެއިން އޭނާއާ ގުޅުންހުރި އެ ސައިޓު ވެސް ބަލައިފައިވާ ކަމަށް އޭނާ ކިޔައިދިނެވެ. އަދި، އެ ތަނުން އަމިއްލަ ނަފުސަށް ގެއްލުން ދޭން މަސައްކަތް ކޮށްފައިވާ ކަމަށް ބެލެވޭ މަންޒަރުތަކެއް ފެނުނު ކަމަށް ބުންޏެވެ.
ނަަމަވެސް އެއީ އައްސަދު ކޮށްފައި ހުރި ކަމެއްތޯ ނުވަތަ އެހެން މީހަކު އެ ފަދަ ކަމެއް ސިފަ ކުރުމަށްޓަކައި ކޮށްފައި ހުރިކަމެއްތޯ އަދި ޔަގީންނުވާ ކަމަށް އޭނާ ކިޔައިދިނެވެ.
އެ ގުދަނުގެ ތެރެއިން އައްސަދުގެ އެއްޗެހި ކަމަށް ބެލެވޭ އަވި އައިނަކާއި ސިނގިރޭޓު ފޮށްޓެއް ވެސް ފެނިފައިވެއެވެ.
"ފުލުހުން މިހާރު އެ ގުދަނުގައި ޓޭޕް އަޅައި ބަންދުކޮށްފައި ހުރީ. ހަމަ ޔަގީންވާ ކަމަކީ އެ ތަނަކީ އޭނާގެ ފުރިހަމަ ބެލުމުގެ ދަށުގައި އޮންނަ ތަނެއްކަން. އެ ތަނުގެ ތަޅުދަނޑި އޮންނާނީ ވެސް އައްސަދު އަތުގައި. އެހެންވީމާ އެހެން މީހަކަށް އެ ތަނަށް ވަދެވޭނެހެން އަޅުގަނޑަށް ހިއެއް ނުވޭ،" އިއްޔެ އޭނާ ކިޔައިދިނެވެ.
އޭނާ ކިޔައިދިން ގޮތުގައި އައްސަދަށް ގުޅުމަށް ޓަކައި އޭނާގެ އާއިލާއިން އިއްޔެ ވެސް މަސައްކަތް ކުރިއެވެ. އެގޮތަށް ގުޅަނިކޮށް އައްސަދު ފޯނު ނެގި ކަމަށާއި އެ ކޯލަށް ހިނގި 14 ސިކުންތުގެ ތެރޭގައި އެއްވެސް ވާހަކައެއް ނުދައްކާ ކަމަށް އޭނާ ބުންޏެވެ.