01 Jul 2023, 18:49
އެމްޑީޕީގެ ފަރާތުން ސަރުކާރުގެ ސިޔާސީ އިސް މަގާމެއްގައި ހުންނަވައިގެން ސަރުކާރު ޕްރޮމޯޓުނުކުރައްވާތީ ހެރިޓޭޖް މިނިސްޓްރީގެ ޑިރެކްޓަރު ޝަމްޢޫނު ޖަލީލު (ލޫކަސް)އަށް އެމްޑީޕީގެ ޗެއާޕާސަން ފައްޔާޒް އިސްމާއީލްގެ ނުރުހުން އަމާޒުކުރައްވައިފިއެވެ.
ލޫކަސްއަށް ނުރުހުން އަމާޒުވީ އިދިކޮޅު ޕީޕީއެމް ޕީއެންސީ ހިންގެވުމާ ހަވާލުވެ ހުންނެވި އަބްދުއްރަހީމް އަބްދުﷲ އާއި ޕީޕީއެމްގެ ސެނެޓް މެމްބަރު އަދި މާލޭގެ ޑެޕިއުޓީ މޭޔަރު އަހްމަދު ނަރީޝާ އެކު ނަގައިފައިވާ ފޮޓޯއެއް ސޯޝަލް މީޑިއާގައި ނަރީޝް ހިއްސާކުރެއްވުމާއެކުގައެވެ.
އެ ފޮޓޯއާ ގުޅިގެން އެމްޑީޕީގެ ވަޓްސްއެޕް ގްރޫޕެއްގައި ފައްޔާޒު ވަނީ ފޮޓޯ ނެންގެވުމުގެ ބަދަލުގައި ސަރުކާރު ޕްރޮމޯޓްކުރުމަށް ގޮވައިލައްވައިފައެވެ. އަދި އެކަން ނުކުރެއްވޭނަމަ ރީތިގޮތަކީ މަގާމުން އިސްތިއުފާދިނުން ކަމަށް އޭނާ ވިދާޅުވިއެވެ.
މިކަމާ ގުޅިގެން "ސަން"އާ ވާހަކަދައްކަވަމުން ފައްޔާޒު ވިދާޅުވީ ސިޔާސީ މަގާމުތަކަކީ ބައެއް ހައްގުތަކާއެކު ލިބޭ މަގާމެއް ކަމަށެވެ. އެއީ ސަރުކާރުގައި ހުންނަ ވެރިއަކު ގެންގުޅުއްވާ ސިޔާސަތުތައް ޕްރޮމޯޓުކުރުމަށް ޓަކައި އެ ވެރިއަކު ބޭނުންފުޅުވުމުން އައްޔަންކުރައްވައި، ވަކިކުރައްވާ މަގާމުތަކެއްކަމަށް ފައްޔާޒު ވިދާޅުވިއެވެ. އެކަން ނުވާނަމަ މަގާމުން ދުރުވާން ޖެހޭ ކަމަށް އޭނާ ވިދާޅުވިއެވެ.
"އެއަށް ތަބާނުވެވޭ ބޭފުޅުން ޖެހޭނީ ވަޒީފާއިން ވަކިވާން ނުވަތަ ވަކިކުރަން އިނގޭތޯ. އެ ދެން ވަރަށް ސާފު މުޅި ދުނިޔޭގައި އެ ކަން އޮންނަ ގޮތް،" ފައްޔާޒު ވިދާޅުވިއެވެ.
އޭގެ އިތުރުން ފައްޔާޒު ވިދާޅުވީ ރައީސްގެ މަސައްކަތްތައް ކުރުމަށް ޓަކައި އެމަނިކުފާނާ ދެކޮޅު ވިސްނުމެއްގެ މީހަކު އައްޔަން ނުކުރެވޭނެ ކަމަށެވެ.
އެމްޑީޕީ ދެބައިވީއިރު ޕާޓީ ތެރޭ މަގާމުގެ ބޭނުމުގައި ތިބި މެމްބަރުން ވެސް މަދުނޫންކަން އެނގިލައްވާ ކަމަށް ވެސް ފައްޔާޒު ވިދާޅުވިއެވެ. ނަމަވެސް މަގާމުގެ ބޭނުމުގައި ތިބެގެން ސަރުކާރު ޕްރޮމޯޓުނުކޮށް ތިބުމަކީ ޗެލެންޖެއް ކަމަށް ވިދާޅުވިއެވެ.
"އެހެން ޕާޓީއަކަށް އަޅުގަނޑުމެންގެ މެމްބަރަކު ބަދަލުވެއްޖެ ކަމަށް ވާނަމަ އެ ސްލޮޓް ހުސްކުރާނަން އަޅުގަނޑުމެން. ހުސްކޮށްފައި އެމްޑީޕީގެ މެމްބަރަކަށް އެ ސްލޮޓް ހޯދާނަން،" ފައްޔާޒު ވިދާޅުވިއެވެ.
އޭނާ ވިދާޅުވީ ސިޔާސީ މަގާމުގައި ދެމިހުންނަ ކަމަށް ވާނަމަ ސަރުކާރު ޕްރޮމޯޓުކުރަން ޖެހޭނެކަމަށެވެ.
"އެހެންވީމާ މުނާފިގުންގެ ގޮތުގައި އެއީ ބަލައިގަނެވޭނެކަމެއް ނޫން ދެއްތޯ. މީގައި ތިބެންޏާ މިއާއެކު ތިބެންވާނެ. އެހެން ނޫންނަމަ ދުރަށް ދާންވާނީ،" ފައްޔާޒު ވިދާޅުވިއެވެ.
ލޫކަސްއަކީ އިދިކޮޅު ޕީޕީއެމަށާއި ކުރީގެ ސަރުކާރަށް ނިސްބަތްކޮށް ވަރަށް ބޮޑަށް ސޯޝަލް މީޑިއާގައި ފާޑުކިޔަމުން އައި ބޭފުޅެކެވެ. ހަމަައެއާއެކު ސަރުކާރުގެ ސިިޔާސަތުތަކާއި މަޝްރޫތައް ޕްރޮމޯޓުކުރުމުގައި މީގެ ކުރިން ވަރަށް އިސްކޮށް އުޅުއްވި ބޭފުޅެކެވެ.