02 Jul 2023, 14:43
ޅ. ނައިފަރު ބަނދަރުގައި އަޅާފައި އޮތް ތިން ލޯންޗެއްގައި ރޯވެ، 9.1 ލައްކަ ރުފިޔާގެ ގެއްލުން ވެއްޖެއެވެ.
ނައިފަރު ކައުންސިލްގެ ނައިބު ރައީސް އަހުމަދު ސާޖިދު މިއަދު "ސަން" އަށް ވިދާޅުވީ އެ ހާދިސާ ހިނގާފައިވަނީ ރޭ މެންދަމު 3:00 އާއި 4:00 އާ ދެމެދުގެ ވަގުތެއްގައި ކަމަށެވެ. އަދި އެ ހާދިސާގައި ތިން ލޯންޗުވެސް ބޭނުން ނުކުރެވޭ ވަރަށް އަނދާފައިވާ ކަމަށް އޭނާ ވިދާޅުވިއެވެ. މިއިން ކޮންމެ ލޯންޗެއްގެ އަގު ތިން ލައްކަ ރުފިޔާއަށް ވުރެ އިތުރެވެ.
އޭނާ ވިދާޅުވި ގޮތުގައި އެ ތިން ލޯންޗު އޮތީ ޖެހިޖެހިގެންނެވެ. އެހެންކަމުން ބޮޑަށް ބެލެވެނީ އެއް ލޯންޗުން އެހެން ލޯންޗު ތަކަށް އަލިފާން ފެތުރުނީ ކަމަށެވެ.
ނަމަވެސް އަލިފާން ރޯވާން މެދުވެރިވި ސަބަބު އަދި ދެނެގަނެވިފައެއް ނުވެއެވެ.
"އެ ލޯންޗު ތަކަކީ މަޑިވަރު އެއާޕޯޓާއި، އަތޮޅު ތެރޭގެ ރަށްރަށަށް މީހުން ގެންގޮސް ދަތުރު ކުރަމުން އައި ލޯންޗުތަކެއް. އިއްޔެ އާ ޖެހެންދެން ވެސް ބަރާބަރަށް ދަތުރުތައް ކުރަމުން އައި. އެއީ ތިން މީހެއްގެ ތިން ލޯންޗު،" ސާޖިދު ވިދާޅުވިއެވެ.
އޭނާ ވިދާޅުވީ، މި މައްސަލަ ފުލުހުންވެސް ތަހުގީގު ކުރަމުންދާ ކަމަށެވެ. އެ ހާދިސާގައި އެއްވެސް މީހަކަށް އަނިޔާއެއް ނުލިބެއެވެ.
އެ ހާދިސާ ގައި ރޯވި ލޯންޗުތަކުގެ ފޮޓޯ ސޯޝަލް މީޑިއާގައި ދައުރުވަމުން ދާއިރު، ރޯވި ލޯންޗުތަކުގެ ތެރެއިން އެއް ލޯންޗު އޮތީ ބަންޑުން ޖަހާލާފައެވެ.