06 Jul 2023, 09:07
މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ އަންހެނުންގެ ކައުންސިލް ޗެއާޕާސަން މަޤާމަށް އާއިމިނަތު ދުމެއިނާ އައްޔަންކޮށްފިއެވެ.
އޭނާ އެ މަޤާމަށް އައްޔަންކުރީ އެމްޑީއޭގެ ގައުމީ މަޖިލީހުން އިއްޔެ ހަވީރު ބޭއްވި ބައްދަލުވުމުގެ ތެރެއިންނެވެ.
އެ ބައްދަލުވުމުގެ ތެރެއިން އަންހެނުންގެ ކައުންސިލް މެންބަރުކަމަށް ވަނީ އިތުރު މެންބަރެއްގެ ގޮތުގައި ނަޒީރާ އިބްރާހީމް ވެސް ހޮވާފައެވެ. އޭގެ އިތުރުން އެ ޕާޓީގެ ސެކްރެޓަރީ ޖެނެރަލްގެ މަޤާމަށް ޝާހު އިސްމާއިލް ވަނީ އައްޔަންކޮށްފައެވެ.
'ސަން' އާ ވާހަކަ ދައްކަވަމުން ދުމެއިނާ ވިދާޅުވީ މީގެ ކުރިން ވެސް ސިޔާސީ ހަރަކާތްތަކުގައި އެމްޑީޕީގެ އެކްޓިވިސްޓެއްގެ ގޮތުގައި ހަރަކާތްތެރިވެފައިވާ ކަމަށެވެ. އެހެންނަމަވެސް މެދުކެނޑުމަކަށް ފަހު އަލުން އަނެއްކާ ވެސް ސިޔާސީ ދާއިރާއަށް ނުކުންނެވީ ކަމަށް އޭނާ ވިދާޅުވިއެވެ.
ދުމެއިނާ ވިދާޅުވީ ކުރިއަށް އޮތް ތަނުގައި ޕާޓީއަށް މެންބަރުން އިތުރުކުރުމާއި ވަކިން ޚާއްސަގޮތެއްގައި އަންހެނުން ބާރުވެރިކުރުވުމަށް މަސައްކަތް ކުރައްވާނެ ކަމަށެވެ.
"އަޅުގަނޑުގެ މަސްއޫލިއްޔަތު އަދާކުރުމަށް ޕާޓީގެ ލީޑާޝިޕާ އެކު ޕާޓީގެ މަޖިލީހުގެ މެންބަރުން އަދި އާންމު މެންބަރުންނާ ގުޅިގެން މަސައްކަތްތައް ކުރިއަށް ގެންދާނެ ކަމުގެ ފުރިހަމަ ޔަގީންކަން އަރުވަން." ދުމެއިނާ ވިދާޅުވިއެވެ.
އޭނާ ވިދާޅުވީ އެމްޑީއޭގެ މުޅި ޓީމަކީވެސް ވަރަށް އެކުވެރި ވަރަށް ރަނގަޅު ގުޅިގެން އުޅޭ ބައެއްކަމަށާއި ކުރިއަށް އޮތް ތަނުގައި ވެސް އެ ޓީމާ އެކު މަސައްކަތް ކުރިއަށް ގެންދާނެ ކަމަށެވެ.
އެމްޑީއޭގެ އެ ބައްދަލުވުމުގައި ވަނީ އެ ޕާޓީގެ ހުސްވެފައިވާ މަޤާމުތަކަށް މީހުން އައްޔަންކޮށްފައެވެ. އަދި، އެއީ އެ ޕާޓީއިން ކުރިއަށް އޮތް ރިޔާސީ އިންތިޚާބުގައި ވެރިކަންކުރާ މައި ޕާޓީ އެމްޑީޕީއާ އެކު ކޯލިޝަން ހެދުމަށް ފަހު ކެމްޕެއިނަށް ތައްޔާރުވުމުގެ ގޮތުންވާ ތައްޔާރީތަކުގެ ތެރެއިން ކޮށްފައިވާ މުހިންމު މަސައްކަތެކެވެ.