20 Jul 2023, 21:05
މި އަހަރުގެ ރިޔާސީ އިންތިޚާބުގައި، ދަ ޑިމޮކްރެޓްސްގެ ފަރާތުން ވާދަކުރާނެ ކެންޑިޑޭޓަކު ހޮވުމަށްޓަކައި ބާއްވާ ޕްރައިމަރީގައި އެ ޕާޓީގައި އިސްކޮށް ހަރަކާތްތެރިވާ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބް ވާދަކުރަން ނިންމަވައިފިއެވެ.
މިރޭ ކުރެއްވި ޓްވީޓެއްގައި އޭނާ ވިދާޅުވީ، 2023 ގެ ރިޔާސީ އިންތިޚާބުގައި ޑިމޮކްރެޓްސްގެ ފަރާތުން ވާދަކުރާނެ ކެންޑިޑޭޓަކު ހޮވުމަށްޓަކައި ބާއްވާ ޕްރައިމަރީގައި ވާދަކުރުމަށް ގަސްތުކުރާ ކަމަށެވެ. އެހެން ވިދާޅުވެ އޭނާ ވަނީ އެ ޕާޓީގެ މެންބަރުންގެ ތާއީދަށް އޭނާ ވަނީ އެދިވަޑައިގެންފައެވެ.
ދަ ޑިމޮކްރެޓްސް އަކީ އެމްޑީޕީގެ ތެރޭގައި އުފެދުނު ހިޔާލު ތަފާތުވުންތަކަށް ފަހު ރައީސް ނަޝީދަށް ތާއީދު ކުރައްވާ މެންބަރުން އެ ޕާޓީން ވަކިވެ އުފެއްދި ޕާޓީ އެކެވެ.
ޑިމޮކްރެޓްސްގެ ވަގުތީ ކައުންސިލް އެކުލަވާލުމަށް ފަހު ބޭއްވި އެ ކައުންސިލްގެ ފުރަތަމަ ބައްދަލުވުމުގައި އެ ޕާޓިގެ ވަގުތީ ޗެއާޕާސަން ހަސަން ލަތީފް ވިދާޅުވީ، ޕާޓީގެ ރިޔާސީ ކެންޑިޑޭޓަކު ކަނޑައަޅާނީ އެތެރޭގެ ޕްރައިމަރީ އަކުން ކަމަށެވެ. އަދި ވަރަށް އަވަހަށް ޕްރައިމަރީ ބާއްވަން ތައްޔާރު ވަމުން ދާ ކަމަށްވެސް ބުނެފައިވެއެވެ.
އެހެންނަމަވެސް ރައީސް މުހައްމަދު ނަޝީދާއި، ޖުމްހޫރީ ޕާޓީގެ ލީޑަރު ގާސިމް އިބްރާހިމް އަދި އެމްއެންޕީގެ ލީޑަރު މުހައްމަދު ނާޒިމް ވަނީ ޖުމްހޫރީ ޕާޓީ (ޖޭޕީ)އާއި އެމްއެންޕީ އަދި ދަ ޑިމޮކްރެޓްސް ގުޅިގެން އެއް ކެންޑިޑޭޓަކު ނެރެން އެއްބަސްވެފައެވެ.
އެ ބައްދަލު ކުރެއްވުމުގައި ޑިމޮކްރެޓްސްގެ ޕްރައިމަރީއަށް ކުރިމަތިލުމުގެ ޝައުގުވެރިކަން ގެންގުޅުންވަންތޯ "ސަން" އިން ސުވާލު ކުރުމުން ރައީސް ނަޝީދު ވިދާޅުވީ އެ މަނިކުފާނު ކުރިމަތި ނުލައްވާނެ ކަމަށެވެ.
މިއަހަރުގެ ރިޔާސީ އިންތިޚާބު ބޭއްވުމަށް ހަމަޖެހިފައި ވަނީ ސެޕްޓެމްބަރު މަހުގެ ނުވަވަނަ ދުވަހުއެވެ.