25 Jul 2023, 08:38
ސަނީ ޑިއޯލްގެ ހަގު ދަރިފުޅު ރާޖްވީރު ޑިއޯލް ބޮލީވުޑަށް ތަޢާރަފްވާ ފިލްމުގެ ބަތަލާއަކީ ކުރީގެ ފިލްމީތަރި ޕޫނަމް ދިލޮންގެ ދަރިފުޅު ޕަލޯމާ ތަކޭރިއާކަން ކަށަވަރުވެއްޖެއެވެ.
ރާޖްޝްރީ ޕްރޮޑަކްޝަންސްއިން ގެނެސްދޭ މިފިލްމުގެ ނަމަކީ، "ދޯނޯ"އެވެ. ކާމިޔާބު ޑައިރެކްޓަރު ސޫރަޖު ބަރުޖަތުޔާގެ ދަރިފުޅު އަވްނިޝް ބަރުޖަތުޔާ އަލަށް ޑައިރެކްޓްކުރާ މިފިލްމަކީ ޕަލޯމާވެސް ފިލްމީ ދާއިރާއަށް ތަޢާރަފްވާ ފިލްމެވެ.
މިފިލްމުގެ ފުރަތަމަ ޕޯސްޓަރުވެސް ރިލީޒްކޮށްފައިވާއިރު ވަރަށް އަވަހަށް ފިލްމުގެ ފުރަތަމަ ޓީޒާވެސް އާއްމުންނަށް ދައްކާލާނެކަމަށް ރާޖްޝްރީ ޕްރޮޑަކްޝަންސްއިންވަނީ ބުނެފައެވެ. ސަނީއާއި ޕޫނާމްގެ ދެ ކުދިން އެއް ފިލްމަކުން ފިލްމީ ދާއިރާ ނުކުންނައިރު ސަނީއާއި ޕޫނަމްއަކީ ޒުވާން ދުވަސްވަރު އެކީގައި ވަރަށް މަގުބޫލު ފިލްމުތަކެއް ކުޅެފައިވާ ފިލްމީ ތަރިންނެވެ.
އޭގެތެރޭގައި، 1984ގައި ރިލީޒްވި ފިލްމު "ސޯހްނީ މަހިވާލް" އަދި "ސަމަންދަރު"ފަދަ ފިލްމުތައް ހިމެނެއެވެ. ފިލްމުގެ ފުރަތަމަ ޕޯސްޓަރު އާއްމުކޮށްފައިވީނަމަވެސް ރާޖްވީރާއި ޕަލޯމާ ފިލްމުގައި ފެންނަނީ ކޮންކަހަލަ ކެރެކްޓާއަކުންކަމެއް އަދި ސާފެއް ނުވެއެވެ. ނަމަވެސް ދެ ތަރިން ފިލްމުގައި ފެންނާނީ ދެ ލޯބިވެރިންގެގޮތުގައިކަން ފިލްމުގެ ޕޯސްޓައިން ދޭހަވާކަމަށް ބައެއް ސަޕޯޓަރުންވަނީ ބުނެފައެވެ.
މިފިލްމާއެކު ޑައިރެކްޓަރު ސޫރަޖު ބަރުޖަތުޔާގެ ކާމިޔާބު ފިލްމު "މޭނޭ ޕިޔާރު ކިޔާ"ގެ ހަނދާންތައް އާ ވެގެންދާނެކަމަށް ޑައިރެކްޓަރު އަވްނިޝްވަނީ ބުނެފައެވެ.
ސޫރަޖުގެ އައިކޮނިކް ފިލްމުތަކަށް ލިބިފައިވާ ކާމިޔާބީއާއި މަގުބޫލުކަން މިފިލްމަށް މިހާރުގެ ޖީލުގެ ކުދިންގެ ފަރާތުން ލިބޭނެކަމަށް އުއްމީދުކުރާއިރު ޑައިރެކްޓަރު ސޫރަޖްއަށް ލިބިފައިހުރި ހުނަރުމިވަނީ މިހާރުގެ ޖީލުތަކާ ހަވާލުކޮށްފައެވެ. ސޫރަޖުގެ ދަރިފުޅު އަވްނިޝް މީގެކުރިން މަސައްކަތްކުރި ފިލްމުތަކުގެތެރޭގައި "ޕްރޭމް ރަތަން ދަން ޕާޔޯ" އަދި ދާދިފަހުން ރިލީޒްވި ފިލްމު "އޫންޗާއި" ހިމެނެއެވެ. ފިލްމު "ދޯނޯ" ސިނަމާތަކަށް ގެންނާނެ އިރެއް އަދި ހާމަކޮށްފައެއް ނުވެއެވެ.