26 Jul 2023, 15:28
ތަފާތު ޚިޔާލުތަކަށް ޖާގަދީ، އެކަކު އަނެކަކަށް އިޙްތިރާމްކޮށް، އެންމެން ގުޅިގެން މަސައްކަތް ކުރުމަކީ މިނިވަންކަމާއި ގައުމުގެ ހަމަޖެހުން ދެމެހެއްޓުމަށް މުހިންމު ކަމެއް ކަމުގައި ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
މިނިވަން ދުވަހުގެ ތަހުނިޔާ އަރިސްކުރުމަށް މާރިޔާ ދެއްވި ޚިޠާބުގައި ވިދާޅުވީ ބަދަލުވަމުންދާ ސަރަޙައްދީ މާހައުލާއި އިސްތިރާޖީ ހަލަބޮލިކަމުގެ ތެރެއިން މިގައުމު ކުރާ ދަތުރު އަމާންކަމާ އޮމާންކަމާ ހަމަޖެހުމާއެކު ކުރިއަށް ގެންދިއުމުގެ ހަކަތަޔަކީ އެއްބަވައިންތަކަން ކަމަށެވެ.
"ރާއްޖޭގެ ނާޒުކު ތިމާވެށި ހިމާޔަތްކުރުމާއި ދިވެހިންގެ ސަޤާފީ ތަރިކަ ރައްކާތެރިކޮށް، އިޙްތިރާމާއި ޤަދަރު ލިބިފައިވާ، ޝަރަފްވެރި ދައުލަތެއްގެ ގޮތުގައި ރާއްޖެއިން ޤަބޫލުކުރާ ހަމަތަކާއި އުޞޫލުތައް ނަގަހައްޓާ ދަމަހައްޓަންޖެހޭ،" އެކަމަނާ ވިދާޅުވިއެވެ.
ރާއްޖޭގެ މިނިވަންކަމަށްޓަކައި ޝަހީދުވި އަބްތޯލުންގެ ޒިކުރާ މިއަދު އާކުރަން ޖެހޭނެ ކަމަށްވެސް މާރިޔާ ވިދާޅުވިއެވެ.
އެކަމަނާ ވަނީ ރާއްޖޭގެ ސަރަޙައްދާއި ދިވެހީންގެ ބިން ވަރުބަލިކަމެއްނެތި ރައްކާތެރިކަމާއެކު ބަލަހައްޓާ ދިވެހި ސިފައިންގެ ޚިދުމަތުގެ އަގުވަޒަން ކޮށްފައެވެ.
"އެންމެ ޙައްސާސް ވަގުތުތަކުގައިވެސް ގައުމާއި ރައްޔިތުންނަށް ކުރިމަތިވާ ކޮންމެ ދަތި ޙާލަތަކާވެސް ފަސްޖެހުމެއްނެތި ކުރިމަތިލާ، މަސްއޫލިއްޔަތާއި ވާޖިބަށް އިސްކަންދީގެން ކުރާ ހިތްވަރުގަދަ މަސައްކަތަކީ މި ދިވެހި ފަސްގަނޑާއި ދިވެހި ރައްޔިތުންގެ މައްޗަށް އެމީހުންގެ ހިތުގައިވާ ކުލުނާއި ލޯބި ހާމަކޮށްދޭ ކަމެއް،" މާރިޔާ ވިދާޅުވިއެވެ.
މާރިޔާ ވިދާޅުވީ ސަރުކާރުން އަބަދުވެސް އެންމެ އިސްކަންދޭ ކަންކަމުގެ ތެރޭގައި ރާއްޖޭގެ ޤައުމީ ސަލާމަތާއި ރައްޔިތުންގެ ރައްކާތެރިކަން ހިމެނޭނެ ކަމަށެވެ. އަދި ދިވެހި އަސްކަރިއްޔާއަށް ބޭނުންވާ އާލާތްތައް ހޯދާ ޒަމާނީ ކުރުމާއި ގައުމަށް ދިމާވެދާނެ ކޮންމެ ނުރައްކަލަކަށް ތައްޔާރު ވުމަށް ބޭނުންވާ ވަސީލަތްތަކާއި ތަމްރީނުތައް ހޯދައިދިނުމަށް ސަރުކާރުން ވަރަށް ބޮޑު އަހައްމިއްޔަތު ކަމެއް ދޭ ކަމަށް ވެސް އެކަމަނާ ވަނީ ވިދާޅުވެފައެވެ.
މިނިވަންކަމަކީ ހަމައެކަނި އަސްކަރީ ބާރާއި ގުޅިފައިވާކަމެއްނޫން ކަމަށާއި އެއީ މުޅި ދިވެހި މުޖުތަމައާއި ދިވެހި ކޮންމެ ރައްޔިތަކާ ގުޅިފައި އޮތް ކަމެއް ކަމަށް މާރިޔާ ފާހަގަކުރެއްވިއެވެ.
"ރައްޔިތުންނަށް ޚިޔާލު ފާޅުކުރުމުގެ މިނިވަންކަމާއި، އަދުލު އިންސާފް ޤާއިމްވުމާއި، ރައްޔިތުންނަށް ހަމަހަމަ ފުރުސަތު ހޯދައި ދިނުމާއި، ވިޔަފާރިއާއި އިޤްތިޞާދުގައި ރައްޔިތުންނަށް ބައިވެރިވެވޭނެ ފަހި މާޙައުލެއް އޮތުމާއި، ރައްޔިތުންގެ ފުދުންތެރިކަން އިތުރުވުމަކީވެސް، ޤައުމުގެ މިނިވަންކަމާއި ގުޅިފައިވާ މުހިންމު ކަންކަން،" އެ ކަމަނާ ވިދާޅުވިއެވެ.
އަދި މިހާތަނަށް ހޯދިފައިވާ ކާމިޔާބީތައް ފާހަގަކޮށް އުފާކުރާއިރުކުރިމަގަށް ވިސްނަންޖެހޭ ކަންކަންވެސް އެހާމެ ގިނަކަން ވެސް މާރިޔާ ވަނީ ފާހަގަކުރައްވާފައެވެ.
މާރިޔާ އިތުރަށް ވިދާޅުވީ ކޮންމެ ފަރުދަކީވެސް މި ޤައުމުގެ މުސްތަޤުބަލު ބިނާ ކުރުމުގައި މުހިންމު ޒިންމާއެއް އޮތް މީހެއްކަން ޤަބޫލުކުރަން ޖެހޭނެ ކަމަށެވެ. އަދި ހުރިހާ ދިވެހިން ޝާމިލުވާގޮތަށް މި ޤައުމު ބިނާކުރުމަށް ޢަޒުމް ކަނޑައެޅުމަކީ ކޮންމެހެން ކުރަންޖެހޭ ކަމެއްކަމުގަައި ވެސް އެކަމަނާ ވަނީ ވިދާޅުވެފައެވެ.