02 Aug 2023, 00:53
ރިޔާސީ ޓިކެޓަށް މަސައްކަތް ކުރައްވާ ކަމުގެ ތުހުމަތުގައި މާލޭގެ މޭޔަރު އަދި ޕީޕީއެމްގެ ނައިބު ރައީސް ޑރ. މުހައްމަދު މުއިއްޒަށް މަރުގެ އިންޒާރު ދީފިއެވެ.
ސެޕްޓެމްބަރު ނުވައެއްގައި އޮންނަ ރިޔާސީ އިންތިޚާބަށް ޕީޕީއެމްގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ނިންމަވާފައިވާ ނިންމުން ބަދަލު ކުރަން އުޅޭ ކަމަށް ބުނެ، މުއިއްޒަށް މަރުގެ އިންޒާރު ދީ މެސެޖުތަކެއް ފޮނުވާފައިވަނީ ތައިލެންޑު ނަންބަރުކަން އޭނާގެ އަނބިކަނބަލުންގެ ފޯނަށެވެ.
މުއިއްޒު ވަނީ އެކަން "ސަން"އަށް ކަށަވަރު ކޮށްދެއްވައިފައެވެ. އެ މައްސަލަ މިހާރު ވަނީ ފުލުހަށް ހުށަހަޅައިފައެވެ.
އޭނާއަށް އިންޒާރު ދީ ފޮނުފައިވާ މެސެޖުތަކުގައި ވަނީ މުއިއްޒު ޔާމީންގެ ނިންމެވުން ބަދަލު ކުރަން މަސައްކަތް ކުރާ ކަމަށް ތުހުމަތު ކޮށްފައެވެ. އަދި، އެގޮތަށް ކަންތައް ކޮށްފިނަމަ ބޮޑެތި ކަންތައްތަކާ ކުރިމަތިލާން ޖެހޭނެ ކަމަށް ބުނެ ވަނީ އިންޒާރު ދީފައެވެ.
އަދި، ޔާމީނަށް ވާދަ ނުކުރެވިއްޖެ ހާލަތެއްގައި ޕީޕީއެމް/ޕީއެންސީގެ ކެންޑިޑޭޓަކަށް ވާނީ އެ މަނިކުފާނުގެ ރަނިންމޭޓު އަދި އިސް ގާނޫނީ ވަކީލު ޑރ. މުހައްމަދު ޖަމީލު އަހުމަދު ކަމަށް ވެސް އެ މެސެޖުގައި ވަނީ ބުނެފައެވެ.
މުއިއްޒަށް އިންޒާރު ދީ ފޮނުވާފައިވާ މެސެޖެއްގެ ސްކްރީން ޝޮޓެއް ---
"ނިންމުމަށާއި ސިސްޓަމަށް އިޙްތިރާމު ކުރަން ޖެހޭނީ. އޭނާގެ [މުއިއްޒުގެ] ޓީމުން ކުރަމުން އެ ގެންދާ މަސައްކަތް އެއް ގޮތަކަށް ވެސް ބަލައެއް ނުގަނެވޭނެ،" އިންޒާރުގެ މެސެޖުގައި ވެއެވެ.
ޕީޕީއެމް/ޕީއެންސީގެ ސެނެޓަށް ނުފޫޒު ފޯރުވާ ކަމަށް ބުނެ ވެސް އެ މެސެޖުގައި ވަނީ މުއިއްޒަށް އިންޒާރު ދީފައެވެ.
ފަތުރުވެރިކަމަށް ވ. އާރަށް ކުއްޔަށް ދޫކުރުމުގައި ރިޝްވަތު ގަބޫލުކޮށް، އެ ފައިސާ ލޯންޑާ ކުރި ކަމުގެ ތުހުމަތުގައި މިދިޔަ ޑިސެމްބަރު މަހުގެ 25 ވަނަ ދުވަހު ޔާމީނަށް އިއްވި 11 އަހަރުގެ ޖަލު ހުކުމުގެ ސަބަބުން، ޔާމީންގެ ކެންޑިޑެސީ ފޯމު ބަލައިނުގަންނަން އިލެކްޝަންސް ކޮމިޝަނުން މިއަދު ވަނީ ނިންމައިފައެވެ.
އީސީގެ ނިންމުން، ސުޕްރީމް ކޯޓުގައި އިސްތިއުނާފު ކުރަން ޕީޕީއެމުން މިހާރު އަންނަނީ ތައްޔާރު ވަމުންނެވެ.
އެކަމަކު، ސުޕްރީމް ކޯޓުން ނާކާމިޔާބު ވެދާނެ ހާލަތަކަށް ބަލައި، ޔާމީން ވަނީ ޕީއެންސީން ވެސް ކެންޑިޑޭޓެއް ނެރެން އަންގަވައިފައެވެ. އެ ކެންޑިޑޭޓަށް ވެދާނެ ކަމަށް ބެލެވޭ ބޭފުޅުންގެ ތެރޭގައި މުއިއްޒު ވެސް ހިމެނެއެވެ. އެކަމަކު، އެ ކަމާ ގުޅިގެން އޭނާ މިހާތަނަށް ރަސްމީކޮށް ބަހެއް ބުނެފައެއް ނުވެއެވެ.
ޕީޕީއެމް/ޕީއެންސީގެ ސެނެޓުގެ ކޮންޓްރޯލް އޮތީ މުއިއްޒަށް ކަމަށް ވާހަކަ ދެކެވޭތާ ދުވަސްތަކެއް ވެފައިވާއިރު، މިދިޔަ ހަފުތާގައި މުއިއްޒު ވަނީ ޔާމީންގެ ކެންޑިޑެސީއަށް ގޮންޖެހުން ރަނގަޅު ނޫން ކަމަށް ބުނެ ވާހަކަ ދައްކަވައިފައެވެ. އަދި، ޔާމީންގެ ފަހަތުގައި ހުންނެވިކަމަށް ތަކުރާރުކޮށް ވިދާޅުވެފައެވެ.
ޕީއެންސީގެ ރިޔާސީ ކެންޑިޑޭޓެއް ކަނޑައެޅުން ޔާމީނަށް ދޫކޮށްލަން ލީޑާޝިޕުން ވަނީ ނިންމައިފައެވެ. އެކަމަކު، އެ މަނިކުފާނު ވަނީ އެ ޕާޓީގެ ސެނެޓުން ކެންޑިޑޭޓަކު ކަނޑައަޅަން އެދިވަޑައިގެންފައެވެ.