05 Aug 2023, 20:54
މިއަހަރުގެ ރިޔާސީ އިންތިޚާބުގައި ވާދަ ކުރައްވާ އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ރަނިން މޭޓަކަށް ހަމަޖެއްސެވި ހިތަދޫ އުތުރު ދާއިރާގެ މަޖިލިސް މެމްބަރު މުޙައްމަދު އަސްލަމްއަށް، ޑިފެންސް މިނިސްޓަރު މާރިޔާ އަހްމަދު ދީދީ ތަހުނިޔާ ފޮނުއްވައިފިއެވެ.
ރައީސް ޞާލިޙުގެ ރަނިންމޭޓަކަށް އަސްލަމް ހަމަޖެއްސެވުމާ ގުޅިގެން ކުރެއްވި ޓްވީޓެއްގައި މާރިޔާ ވިދާޅުވީ އަސްލަމަކީ އެމްޑީޕީ އުފެއްދި ދުވަހުން ފެށިގެން ބަދަލެއް ނައިސް، އެއްގޮތެއްގައި ދެމި ހުންނަވާ ވަރަށް ތަޖުރިބާކާރު ސިޔާސީ ލީޑަރެއް ކަމަށެވެ. އަދި އެމްޑީޕީގެ ޕީޖީ ލީޑަރު ކަމުގައި ހުންނަވައިގެން އަސްލަމް އަދާކުރައްވާ ދައުރު ވަނީ ފާހަގަ ކުރައްވާފައެވެ.
"އަސްލަމް އަކީ އިތުބާރު ކުރެވޭ ތަޖުރިބާކާރު ސިޔާސީ ލީޑަރެއް. އަސްލަމް ގެންދަވަނީ އެމްޑީޕީގެ ޕީޖީ ގްރޫޕުގެ ލީޑަރަކަށް ހުންވައިގެން ވަރަށް އިޚުލާސްތެރި މަސައްކަތްތަކެއް ކުރައްވަމުން،" މާރިޔާ ވިދާޅުވިއެވެ.
އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަސްލަމަކީ މަޖިލީހުގައި މިހާރު ތިއްބެވި މެމްބަރުންގެ ތެރެއިން އެންމެ ގިނަ ދުވަސްވީ އެއް މެމްބަރެވެ. އެގޮތުން މަޖިލީހުގެ ހިތަދޫ އުތުރު ދާއިރާގެ ގޮނޑި ފުރުއްވާތާ ވަނީ 15 އަހަރު ވެފައެވެ.
ރައީސް ޞާލިހްގެ ކެމްޕޭނުގައި މާލޭ އޭރިޔާގެ ކޯޑިނޭޓަރު އަދި ރިޔާސީ އިންތިޚާބުގައި އެމަނިކުފާނުގެ ކެންޕެއިން ސްޕޯކްސް ޕާސަންކަން ވެސް ކުރައްވާ މާރިޔާ ވަނީ މިހާރުގެ ނައިބު ރައީސް ފައިސަލް ނަސީމަށް ވަރަށް ބޮޑަށް ތައުރީފް ކުރައްވާފައެވެ.
އޭނާ ވިދާޅުވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ނައިބަކަށް މިހާރު ހުންނެވި ފައިސަލް އަކީ ރައީސް ޞާލިޙްއަށާއި ރައްޔިތުންނަށް ވެސް ވަރަށް ހިތްހެޔޮ، ތެދުވެރި، އަދި އިޚުލާސްތެރި ބޭފުޅެއް ކަމަށެވެ.
"ފައިސަލް ގެންދަވަނީ އަމާނާތްތެރިކަމާއެކު ނައިބު ރައީސްކަން ކުރުމުގެ ނަމޫނާ ދައްކަވަމުން،" މާރިޔާ ވިދާޅުވިއެވެ.
ސެޕްޓެމްބަރު ނުވަ ވަނަ ދުވަހު ބާއްވާ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ ތެރެއިން މިހާތަނަށް ރަނިން މޭޓަކު ހަމަޖައްސާފައި ނުވަނީ ގާސިމް އިބްރާހީމް އެކަންޏެވެ.