17 Aug 2023, 18:23
ދ. މީދޫން ޢާލިމް އަބްދުއްލަތީފް
ދ. މީދޫގެ މަގުތައް ތާރު އަަޅައި ޒަމާނީ ފެންވަރަކަށް ހެދުމުގެ ޔަގީންކަމާއެކު މި ރަަށަށް ޕީޕީއެމް، ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ގިނަ ވައުދުތަކެއް ވެވަޑައިގެންފިއެވެ.
ހަތަރު އަތޮޅަކަށް ކުރައްވާ ކެމްޕޭން ދަތުރުގައި ދ. އަތޮޅުގެ ތިން ރަށަކަށް މިއަދު މުއިއްޒު ވަނީ ވަޑައިގެންފައެވެ. ފުރަތަމަ މާއެނބޫދުއަށް ވަޑައިގަތުމަށްފަހު ދެން ވަޑައިގެންނެވީ ހުޅުދެއްޔަށެވެ. އެއަށްފަހު، ވަަޑައިގެންނެވީ މީދުއަށެވެ.
މީދޫގައި މުއިއްޒަށް މަރުހަބާ ދެންނެވުމަށް ގިނަ އަދަދެއްގެ ބަޔަކު ނުކުމެ ތިއްބެވެ. މިއީ އޭނާގެ އަނބިކަނބަލުންގެ މަންމަގެ ރަށެވެ.
މުއިއްޒު ވިދާޅުވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ޒައާމަތުގައި މި ރަށަށް ގިނަ ކަންތައްތަކެއް ކޮށްދެއްވައިފައިވާ ކަމަށެވެ.
ޑރ. މުހައްމަދު މުއިއްޒު ދ. މީދޫގައި ވާހަކަ ދައްކަވަނީ --
އެ ގޮތުން ބިންހިއްކުމުގެ މަޝްރޫއު އޭނާ ފާހަގަކުރެއްވިއެވެ. ނަމަވެސް، އެ ބިމުގައި ގެދޮރު ބިނާކުރުމުގެ ފުރުސަތު މި ރަށުގެ ރައްޔިތުންނަށް އަދިވެސް ނުލިބޭކަމަށް ވިދާޅުވިއެވެ.
އޭނާގެ ވެރިކަމެއްގައި ގެދޮރުވެރިކަމުގެ މައްސަލަ މި ރަށުގައި ހައްލުކުރައްވާނެކަމަށް ވެސް ވިދާޅުވިއެވެ. އަދި ގެދޮރު އެޅުމަށް އަތްފޯރާފަށުގައި ލުއި ލޯނު ދެވޭނެކަމަށް ވެސް ވިދާޅުވިއެވެ.
މި ރަށަކީ މަސްވެރިރަށެއް ކަމަށާއި މި ރަށުގެ ލޭނާރަކީ މަސްވެރިކަން ކަމަށް ވެސް މުއިއްޒު ފާހަގަކުރެއްވިއެވެ.
"މަސްވެރިންނަށް ބޭނުންވާ ކަންކަން މި ރަށުގެ ރައްޔިތުންނަށް ޓަކައި، މަސްވެރިންނަށް ޓަކައި ސަރުކާރުން ކޮށްދިނުމަކީ މުހިންމުކަމެއް،" މުއިއްޒު ވިދާޅުވިއެވެ.
އެ ގޮތުން މި ރަށުގައި އައިސް ޕްލާންޓެއް ގާއިމުކޮށްދެއްވާނެކަމަށް ވެސް އޭނާ ވިދާޅުވިއެވެ.
"އަޅުގަނޑު އެދެނީ ތިޔަ ބޭފުޅުން އަޅުގަނޑަށް އިތުބާރުކުރެއްވުން،" މުއިއްޒު ވިދާޅުވިއެވެ.
މުއިއްޒު ވިދާޅުވީ، މި ރަށުގެ މަގުތައް މިހާރު ހަދަން ޖެހިފައިވާ ކަމަށެވެ. މި ރަށަކީ މި އަތޮޅުން ދެވަނައަށް އެންމެ އާބާދީ ބޮޑު ރަށަށް ވާތީ، މަގުތައް ހެދުމުގެ ސަބަބުން އިގްތިސޯދަށް ވެސް ފައިދާވާނެކަމަށް ވިދާޅުވިއެވެ.
މަގުތައް ހެދުމުގެ ސަބަބުން، ވިޔަފާރިތައް ފުޅާވެ، ވަޒީފާތައް އިތުރުވާނެ ކަމަށް ވެސް އޭނާ ވިދާޅުވިއެވެ.
"މި ރަށުގެ މަގުތައް ހެދުމަކީ އަޅުގަނޑުމެންގެ ސަރުކާރެއްގައި ވަރަށް އިސްކަން ދީގެންކުރާނެކަމެއް،" މުއިއްޒު ވިދާޅުވިއެވެ.
މި ރަށުގައި ހުރި ސިއްހީ މަރުކަޒު މިހާރަށްވުރެ ރަނގަޅުކޮށް މިހާރަށްވުރެ ރަނގަޅު ޚިދުމަތް ލިބޭނެ ސިއްހީ މަރުކަޒެއް ގާއިމުކޮށްދޭނެކަމަށް ވެސް އޭނާ ވިދާޅުވިއެވެ.
މީގެ އިތުރުން، ޒުވާނުންގެ ކަންކަމަކީ ރައީސް ޔާމީން ވަރަށް އިސްކަންދެއްވި ކަމެއް ކަމަށް އޭނާ ފާހަގަކުރެއްވިއެވެ.
"މިހާރު ފެންނަނީ ކުޅިވަރުކުޅެން ގާއިމުކުރެވުނު ގިނަ ތަންތަން ގިނަ ރަށްރަށުގައި ވީރާނާވެ ހަލާކުވެ ދާތަން،"މުއިއްޒު ވިދާޅުވިއެވެ.
މި ރަށުގައި ޒުވާނުންނަށް ހާއްސަކޮށް ސްޕޯޓްސް ކޮމްޕްލެކްސްއެއް ގާއިމުކުރުުމަކީ އޭނާގެ ސަރުކާރެއްގައި ކުރާނެކަމެއް ކަމަށް ވެސް ވިދާޅުވިއެވެ.