10 Oct 2023, 10:39
އިންތިޚާބުގެ ދެވަނަ ބުރުގައި މަސައްކަތްކުރި އޮފިޝަލުންނާއި އަދިވެސް ޓާސްކުފޯހުގައި ހިމެނޭ އިތުރު މީހުންނަށް މި ހަފުތާ ތެރޭގައި އެލަވަންސް ދިނުމަށް މަސައްކަތް ކުރަމުން އަންނަ ކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވެއްޖެއެވެ.
އެކަމާ ގުޅޭގޮތުން މިއަދު 'ސަން' އާ ވާހަކަ ދައްކަވަމުން ހަބީބް ވިދާޅުވީ އެލަވަންސް ދިނުމަށް ކުރަން ޖެހޭ މަސައްކަތްތަކުގެ ތެރެއިން އެ އެލަވަންސް ޓާސްކު ފޯހުގައި ހިމެނޭ މީހުންނަށް ހަވާލު ކުރުމަށް ފިނޭންސް މިނިސްޓްރީއަށް އިލެކްޝަންސް ކޮމިޝަނުން މި ހަފުތާ ތެރޭގައި ފޮނުވާނެ ކަމަށެވެ.
އިތުރަށް ވާހަކަ ދައްކަވަމުން އޭނާ ވިދާޅުވީ ރިޔާސީ އިންތިޚާބުގެ ދެ ބުރުގެ ތެރެއިން ކޮންމެ ބުރެއްގައިވެސް ޓާސްކް ފޯހުގައި ހިމެނޭ އެންމެންނަށް ފައިސާ ދިނުމަށް 18 މިލިއަން ރުފިޔާ ހޭދަވި ކަމަށެވެ.
އޭނާ ވިދާޅުވީ އެއީ ހަމައެކަނި އޮފިޝަލުންގެ އެލަވަންސް ނޫން ކަމަށެވެ. އޭގެ ތެރޭގައި ޓްރެއިނީސް ވެސް ހިމެނޭ ކަމަށް އޭނާ ވިދާޅުވިއެވެ.
މީގެ އިތުރަށް ހަބީބް ވިދާޅުވީ މިހާތަނަށް ފުރަތަމް ބުރުގެ އެލަވަންސް މިހާރު ހުރިހާ ރަށެއްގެ ސެންޓަރުތަކުގައި ހަރަކާތްތެރިވި މީހުންނަސް ވެސް ދީފައިވާ ކަމަށެވެ. މިހާރު އެ އެލަވަންސް ނުދެވި ހުންނާނީ ހަމައެކަނި ބައެއް ރިސޯޓު ތަކުގެ ސެންޓަރު ތަކުގައި ހަރަކާތްތެރިވި މީހުންނަށް ކަމަށްވެސް އޭނާ ވިދާޅުވިއެވެ.
މި އަހަރުގެ ރިޔާސީ އިންތިޚާބުގެ ފުރަތަމަ ބުރަށް މިދިޔަ ސެޕްޓެމްބަރު މަހުގެ ނުވަ ވަނަ ދުވަހު ވޯޓު ލައިފައި ވާއިރު، އެ އިންތިޚާބުގެ ދެވަނަ ބުރަށް ވޯޓު ލައިފައިވަނީ އެ މަހުގެ 30 ވަނަ ދުވަހުއެވެ.