15 Oct 2023, 22:07
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނައިބު ރައީސް ހުސައިން ޝާފިއު (ކޮއްކީ) އާއި ހިންގާ ކޮމިޓީގެ މެންބަރު މުއާވިޔަތު ހަލީލް (މުއާބެ) އިސްތިއުފާދެއްވައިފިއެވެ.
އެފްއޭއެމްގެ ނައިބު ރައީސްގެ މަގާމުގައި ހުންނެވި ކޮއްކީއަކީ މިވަގުތު ރާއްޖޭގެ އެންމެ ވަރުގަދަ ކްލަބު، މާޒިޔާ ސްޕޯޓްސް އެންޑް ރެކްރިއޭޝަން ކްލަބުގެ ސީއީއޯއެވެ. އަދި އެފްއޭއެމްގެ ހިންގާ ކޮމިޓީގެ މެންބަރެއްގެ ގޮތުގައި ހުންނެވި މުއާބެއަކީ ކްލަބު ގްރީން ސްޓްރީޓްސްގެ ރައީސެވެ.
އެފްއޭއެމްގެ އޮފިޝަލަކު "ސަން" އަށް ކަށަވަރުކޮށްދިން ގޮތުގައި މުއާބެ އިސްތިއުފާދެއްވީ މިދިޔަ ހަފުތާގެ ތެރޭގައެވެ. އަދި އޭގެ ފަހުން ކޮއްކީ އިސްތިއުފާދެއްވާފައިވާކަން ވެސް އޮފިޝަލް ކަށަވަރުކޮށްދިނެވެ.
ކޮއްކީ އިސްތިއުފާދެއްވުމަށްފަހު އޭނާ ވަނީ އެފްއޭއެމްގެ ރައީސްކަމުގެ މަގާމަށް ރާއްޖޭގެ ތާރީހު ދުށް އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ގެނައުމަށް ސޯޝަލް މީޑިއާ މެދުވެރިކޮށް ތާއީދުކޮށްފައެވެ. އެފްއޭއެމްގެ ރައީސްކަމުގެ މަގާމަށް ދަގަނޑޭ ގެނައުމަށް ސޯޝަލް މީޑިއާގައި ކެމްޕޭނެއް ހިންގަމުންދާ އިރު، އެކަމަށް ގިނަ ބަޔަކު ދަނީ ތާއީދުވެސް ކުރަމުންނެވެ.
އެފްއޭއެމްގެ ހިންގާ ކޮމިޓީން ކޮއްކީ އާއި މުއާބެ އިސްތިއުފާދިނުމާ ގުޅިގެން މިހާރު އެ ކޮމިޓީގައި ހިމެނެނީ ހަތް މެންބަރެކެވެ. އެއީ އެފްއޭއެމްގެ ރައީސް ބައްސާމް އަދީލް ޖަލީލް، ސީނިއާ ނައިބު ރައީސް އަލީ އުމަރު، ޓީސީ ސްޕޯޓްސް ކްލަބުގެ އަހުމަދު ނަޝީދު (ޑޭވް)، ކްލަބު އީގަލްސްގެ ވައިސް ޗެއާމަން މުވާފިޒް ހާޝިމް (މުފާ)، އަހުމަދު ޝަކީބް (ޑޮކް)، މުހައްމަދު ޝިފާއު އަދި އާމިނަތު ޝާނީޒެވެ.
އެފްއޭއެމްގެ ރައީސްކަމުގެ މަގާމުގައި މިހާރު ހުންނެވި ބައްސާމް އެ މަގާމު އަދާކުރައްވާތާ މިހާރު ހަތް އަހަރުވާ އިރު، އޭނާއަށް ވަނީ ގިނަ ފާޑުކިޔުންތަކަކާ ކުރިމަތިލާން ޖެހިފައެވެ. އެގޮތުން އެފްއޭއެމްގެ ދަރަނީގެ މައްސަލަތަކާއެކު ކޮރަޕްޝަންގެ ތުހުމަތުތަކެއް ވެސް ވަނީ އަމާޒުވެފައެވެ.
އެފްއޭއެމަށް ގަވާއިދުން ލީގު ހިންގޭ ގޮތް ނުވުމުން އެކަމުގެ އަސަރު ގައުމީ ޓީމުން ވެސް ފެނިގެންދެއެވެ. ދެކުނު އޭޝިއާގެ ދެވަނައަށް އެންމެ ވަރުގަދަ ޓީމުގެ ގޮތުގައި އޮތުމަށްފަހު، މިހާރު ނޭޕާލް އަދި ބަންގުލަދޭޝް ފަދަ ޓީމުތަކާ ދެކޮޅަށް ނަތީޖާތައް ނެރުމަށް ވަނީ އުނދަގޫތަކާ ކުރިމަތިލާން ޖެހިފައެވެ.
އެފްއޭއެމަށް ވަނީ އެ އިދާރާގެ މުވައްޒަފުންނަށް މުސާރަ ދެވޭ ގޮތް ވެސް ނުވެފައެވެ. އޭގެ އިތުރުން ކުރިން ގައުމީ ޓީމުގައި މަސައްކަތްކުރި ޓެކްނިކަލް މުވައްޒަފުންނަށް މުސާރަ ދީފައިނުވުމުން، ފީފާގައި ވެސް އެފްއޭއެމްގެ މައްސަލަތައް ކުރިއަށްދެއެވެ. އަދި ރާއްޖޭގެ ކޯޓުތަކުގައި ވެސް އެފްއޭއެމްގެ މައްސަލަތައް ކުރިއަށްދެއެވެ.