28 Oct 2023, 15:05

ޓެލްއަވީވު (28 އޮކްޓޯބަރު 2023) : އިސްރާއީލުން ޣައްޒާގެ އާންމު ރައްޔިތުންނާ ދެކޮޅަށް ހިނގަމުން ގެންދާ ގަތުލުއާންމުތައް ހުއްޓާލުމަށް ގޮވާލައި އދ. ގެ އާންމު މަޖިލީހުން ގަރާރެއް ފާސްކުރުމުން އެއީ ވަރަށް ނުބައި އަމަލެއްކަމާއި، އެ ގަރާރަށް ތާއީދުކޮށް ވޯޓުދިން ގައުމުތަކަކީ ދަށުދަރަޖައިގެ ނުބައި ގައުމުތަކެއްކަމަށް އިސްރާއީލުގެ ޚާރިޖީ ވަޒީރު އިލީ ކޮހެން ސިފަކޮށްފިއެވެ.

އަނެއްކޮޅުން އިސްރާއީލު ގެ އަސްކަރީ ތަރުޖަމާނަކު ބުނިގޮތުގައި ރޭ އެއްގަމު މަގުން ޣައްޒާއަށް އަރައިގަތް އިސްރާއީލުގެ ލަޝްކަރުތައް ހަމާސްގެ ރައްދު ހަމަލާތަކާ ގުޅިގެން ވަނީ ހުއްޓުމަކަށް އައިސްފައެވެ. ކުރިޔަށް ދެވޭނެގޮތެއް އަދިވަނީ ނުވެފައެވެ.

އިސްރާއިލާ ދެކޮޅަށް 120 ގައުމަކުން އދ. ގައި އަޑުއުފުލައިފި

އިސްރާއީލުން ޣައްޒާއާ ދެކޮޅަށް ހިންގާ އުދުވާނު ވަގުތުން ހުއްޓާލުމަށް ގޮވާލައި އދ. ގެ އާންމު މަޖިލީހުން ރޭ ފާސްކުރި ގަރާރަށް ތާއީދުކޮށް އދ. ގައި ހިމެނޭ 193 ގައުމުގެ ތެރެއިން 120 ގައުމަކުން ވޯޓުދީފައިވާއިރު މިގަރާރާ ދެކޮޅަށް އިސްރާއީލުގެ އުދުވާނަށް ތާއީދުކޮށްފައިވަނީ އެންމެ 14 ގައުމެކެވެ.

މި 14 ގައުމުގެ ތެރޭގައި އިސްރާއީލުގެ އިތުރުން ހިމެނެނީ އެމެރިކާއާއި އިނގިރޭސިވިލާ ފަރަންސޭސިވިލާތްފަދަ ހުޅަނގުގެ އަނިޔާވެރި އިސްތިއުމާރީ ގައުމުތަކެވެ. މި ގަރާރާ ދެކޮޅަށްވެސް އަދި އެއްކޮޅަށްވެސް 45 ގައުމަކުން ވޯޓުދީފައެއް ނުވެއެވެ. ވަކިކޮޅަކަށް ވޯޓުނުދީ ހަނުތިބި 45 ގައުމުގެ ތެރޭގައި ހިމެނެނީ ޔޫރަޕްގެ ބައެއް ގައުމުތަކާއި އެމެރިކާގެ ބާރާއި ނުފޫޒު ހިނގާ އޮސްޓްރޭލިއާއާއި އޭޝިއާ، އެފްރިކާ އަދި ލެޓިން އެމެރިކާގެ ބައެއް ގައުމުތަކެވެ. މީގެތެރޭގައި ޖަރުމަނުވެސް ހިމެނެއެވެ.

އިސްރާއީލުގެ ޚާރިޖީ ވަޒީރު އެލީ ކޮހެން

މިގަރާރު އދ. ގެ އާންމު ޖަމްއިއްޔާއަށް ހުށަހަޅާފައިވަނީ އުރުދުން އިސްކޮށް އޮވެގެން އަރަބި ގައުމުތަކާ އަދި އިސްލާމީ ގައުމުތައް ގުޅިގެންނެވެ. އދ. ގެ އާންމު ޖަމްއިއްޔާއިން މިގަރާރު ފާސްކުރީ އެމެރިކާ ވީޓޯގެ ބިރު ދައްކަމުން ގެންދާތީ އދ. ގެ ސަލާމަތީ މަޖިލީހުން މި ގަރާރު ފާސް ކުރެވޭނެ އެއްވެސް ގޮތެއް ނެތިގެންނެވެ.

އެމެރިކާއަކީ އިސްރާއީލުގެ ގަތުލުއާންމުތަކާއި ހަނގުރާމައިގެ ޖަރީމާތަކަށް އެންމެ ބޮޑަށް ހިއްވަރުދީ ވާގިވެރިވާ އިސްތިއުމާރީ ގައުމެކެވެ. އެމެރިކާ ވަނީ އިސްރާއީލު ބޭނުންވާ ވަރަކަށް ބޭނުން ހަތިޔާރެއް ދޭނެކަން ހާމަކޮށް ފަލަސްތީނުގެ ޖަމާއަތްތަކަށް ހަތިޔާރު ނުދިނުމަށް އީރާންފަދަ ފަލަސްތީނުގެ މިނިވަންކަމުގެ ޖިހާދަށް ވާގިވެރިވާ ގައުމުތަކަށް އިންޒާރުދީފައެވެ.

ފަލަސްތީނުގެ ޖަމާއަތްތަކުގެ އިތުރުން އިސްރާއީލުގެ އަނިޔާވެރިކަމާ ދެކޮޅަށް ޖިހާދުކުރާ ލުބްނާނުގެ ހިޒްބުﷲ ޖަމާއަތަށް ހަތިޔާރު ނުދިނުމަށްވެސް އެމެރިކާ ވަނީ އީރާނަށް އިންޒާރުކޮށްފައެވެ. ފަލަސްތީނު މައްސަލާގައި އެމެރިކާ އަބަދުވެސް ގެންގުޅޭ ސިޔާސަތަކީ މިއެވެ.

މުޖާހިދުންނަށް އެހީ ނުވުމަށް އެމެރިކާއިން އީރާނަށް އިންޒާރު ކޮށްފި

އިސްރާއީލަށް ބޭނުންވާ ހުރިހާ ބާވަތެއްގެ ހަތިޔާރު ދީ އެއީ އިސްރާއީލުގެ ހައްގެއްކަމަށް ބުނެ ފަލަސްތީނުގެ މިނިވަންކަމަށް މަސައްކަތް ކުރުމަކީ ޓެރަރިޒަމްކަމަށް ސިފަކޮށް ފަލަސްތީނުގެ މިނިވަންކަމަށް މަސައްކަތްކުރާ ޖަމާއަތްތަކަށް ހަތިޔާރުދިނުމަކީ އަދި އެ ޖަމާއަތްތަކަށް ވާގިވެރިވުމަކީވެސް ޓެރަރިޒަމްކަމަށް ސިފަކުރުމެވެ. ދެން އެ ޖަމާއަތްތަކަށް ވާގިވެރިވާ ގައުމުތަކަށް ބިރުދައްކައި އެ ގައުމުތަކާ ދެކޮޅަށް ދަތިކުރުމުގެ ފިޔަވަޅުތައް އެޅުމެވެ.

މި ކަމަށް ބިރުން ފަލަސްތީނުގެ ޖަމާއަތްތަކަށް އެހީތެރިވުމަށާއި ހަތިޔާރު ދިނުމަށް އަރަބި އެއްވެސް ގައުމަކަށް ނުކެރެއެވެ. ދޭ ހަތިޔާރެއް ސިއްރުން ނަމަވެސް ދެނީ އީރާނުންނެވެ. ދެން ފަލަސްތީނުގެ ޖަމާއަތްތަކުން ގެންގުޅެނީ އެ މީހުން އަމިއްލައަށް އުފައްދާ ވަރަށް އާދައިގެ ހަތިޔާރެވެ. ނަމަވެސް މިފަހަކަށް އައިސް އުތުރު ކޮރެއާއިން ހަމާސް ޖަމާއަތަށް ސިއްރިޔާތުގައި މިސްރު ހުރަސްކޮށް ޣައްޒާގެ މަގުން ހަތިޔާރު ތަކެއް ދީފައިވާކަމަށް އެމެރިކާއާއި އިސްރާއީލު ތުހުމަތުކޮށްފައިވެއެވެ.

ހަމަލާތައް ހުއްޓާލުމަށް ގޮވާލާ ގަރާރު ރޭ އދ. ން ފާސްކޮށްފައިވަނީ އިސްރާއީލުން ޣައްޒާއިން ކަރަންޓާއި މުވާސަލާތީ ޚިދުމަތްތައް (ފޯނާއި އިންޓަނެޓް) ކަނޑާލުމަށްފަހު ޣައްޒާއަށް ވަރުގަދައަށް ބޮންއަޅައި އަދި އެއްގަމު މަގުންވެސް ޣައްޒާއަށް އަރައި ގަތުލުއާންމުތަކެއް ހިންގަން ފަށާފައި ވަނިކޮށެވެ.

މުޖާހިދުން އިސްރާއީލަށް 10 ޓޭންކް ހަލާކުކޮށްލައިިފި

ކަރަންޓާއި މުވާސަލާތީ ޚިދުމަތްތައް ކަނޑާލާފައިވާތީ އިސްރާއީލުން ޣައްޒާގައި ހިންގާ ޖަރީމާތަކާބެހޭ މާބޮޑު ތަފްސީލެއް ނުލިބެއެވެ. ނަމަވެސް ރިޕޯޓްތައް ބުނާގޮތުން ފަލަސްތީނު މުޖާހިދުންވަނީ އިސްރާއީލުގެ ޓޭންކަރުތަކުގެ ތެރެއިން 10 ޓޭންކް ހަލާކުކޮށްލައި އިސްރާއީލުގެ ބައެއް ސިފައިން މަރާލާފައެވެ.

މިއާއެކު އިސްރާއީލު ސިފައިންނަށް ވަނީ އެއްގަމު މަގުން ކުރިޔަށް ދެވޭނެގޮތް ނުވެފައެވެ. އިސްރާއީލުގެ މީޑީއާ ރިޕޯޓްތައް ބުނާގޮތުންވެސް އިސްރާއީލު ސިފައިންނަށް އެއްގަމު މަގުން ކުރިއެރުމެއް ނުލިބެއެވެ. ޣައްޒާގެ ބައެއް ސަރަހައްދުތަކުގައި ފަލަސްތީނުގެ މުޖާހިދުންނާ އިސްރާއީލު ސިފައިންނާ ދެމެދުދަނީ ވަރުގަދައަށް ހަނގުރާމަ ހިނގަމުންނެވެ.