14 Nov 2023, 14:56
ޣައްޒާއަކީ ފަލަސްތީނުގެ ބިމެއް ކަމަށާއި އެމެރިކާއިން އެކަން ގަބޫލު ކުރަންޖެހޭ ކަމަށް ތުރުކީވިލާތުގެ ރައީސް ރަޖަބް ތައްޔިބު އުރުދުޣާން ވިދާޅުވެއްޖެއެވެ.
ހަނގުރާމަ ހުއްޓާލުމަށް އެމެރިކާއިން އިސްރާއީލަށް ބާރު އަޅަންޖެހޭ ކަމަށާއި ޣައްޒާއަކީ އިސްރާއީލުގެ ބިމެއް ކަމަށް އެމެރިކާއިން ބުނާ ބުނުން ގަބޫލުނުކުރެވޭނެ ކަމަށް އުރުދުޣާން ވިދާޅުވިއެވެ.
އުރުދުޣާން މިހެން ވިދާޅުވީ ސައުދީ އަރަބިއާގެ ރިޔާދުގައި ބޭއްވި އަރަބި އިސްލާމީ ގައުމުތަކުގެ ސަމިޓްގައި ބައިވެރިވެވަޑައިގެންނެވުމަށްފަހު އެނބުރި ގައުމަށް ވަޑައިގަންނެވި މަގުމަތީގައި ނޫސްވެރިންނަށް ދެއްވި އިންޓަވިއުއެއްގައެވެ.
މަރުވާ މީހުންނަކީ މުސްލިމުންނަށް ވުމުން އެމެރިކާއާއި ހުޅަނގުގެ އެހެން ޖަމިއްޔާތަކުގެ މަސައްކަތްތައް ހުއްޓި، އިސްރާއީލުގެ ޖަރީމާތައް އެ މީހުންނަށް ނުފެންނަ ކަން އެނގޭ ކަމަށްވެސް އުރުދުޣާން ވިދާޅުވިއެވެ. އަދި ދެ ވަނަ ބޮޑު ހަނގުރާމައަށްފަހު އުފެއްދި އދ ގެ އޮނިގަނޑު ޒަމާނީކޮށް، ދާއިމީ މެމްބަރުކަމާއި ވީޓޯ ކުރުމުގެ ބާރު އޮތް ގޮތްވެސް ބަދަލުކުރަން ޖެހޭ ކަމަށް އުރުދުޣާން އިތުރަށް ވިދާޅުވިއެވެ.
ދުނިޔޭގެ މުސްތަގްބަލާއި ރައްޔިތުންގެ މުސްތަގްބަލް ނިންމުން އެންމެ ފަސް މެމްބަރު ގައުމުގެ އަތްމައްޗަށް ދޫކޮށްލެވެން ނެތް ކަމަށް އުރުދުޣާން ވިދާޅުވިއެވެ. އުރުދާޣާން އިޝާރާތް ކުރެއްވީ އދ ގެ ސަލާމަތީ މަޖިލީހުގެ ދާއިމީ ފަސް މެމްބަރު ގައުމުކަމަށްވާ އެމެރިކާ، ރަޝިއާ، ޗައިނާ، އިނގިރޭސިވިލާތް އަދި ފަރަންސޭސިވިލާތަށެވެ.
ހަމާސް އަކީ ޓެރަރިސްޓު ޖަމާއަތެއް ކަމަށް ބުނާ މީހުންނަށް ވެސް އުރުދުޣާން ވަނީ ފާޑު ވިދާޅުވެފައެވެ. ހަމާސްއަކީ ޓެރަރިސްޓު ޖަމާއަތެއް ނޫން ކަމަށާއި އެއީ އެ މީހުންގެ އަމިއްލަ ބިން މިނިވަންކޮށް ރައްކާތެރިކުރުމަށް މަސައްކަތްކުރާ ޖަމާއަތެއް ކަމަށް އުރުދުޣާން ވިދާޅުވިއެވެ.
އުރުދުޣާން ވަނީ ޣައްޒާގައި އިސްރާއީލުން ހިންގަމުންދާ ގަތުލުއާންމުތައް ހުއްޓުވުމަށް ބައިނަލްއަގުވާމީ މުޖުތަމައަށް ގޮވާލައްވައި، އދ ސަލާމަތީ މަޖިލީހަކީ "ބާރެއް ނެތް" މަޖިލީހެއް ކަމަށް ވިދާޅުވެ ތަކުރާރުކޮށް ފާޑުވިދާޅުވެފައެވެ.
އުރުދުޣާން މި މޭރުމުން ވާހަކަފުޅު ދައްކަވާފައިވާއިރު، ޔޫރަޕް އިއްތިހާދުގެ ގައުމުތަކަށް ހުށަހަޅާފައިވާ ތުރުކީވިލާތުގެ ވިސާ ގަބޫލުނުކުރާ މިންވަރު އިތުރުވެފައިވާ ކަމަށް އެ ގައުމުގެ ހާރިޖީ ވަޒީރު ހަކަން ފިދާން ވަނީ ވިދާޅުވެފައެވެ.