30 Nov 2023, 09:38
އދ. މަޖިލިސް (30 ނޮވެންބަރު 2023): އިސްރާއީލުން ޣައްޒާގެ މަދަނީ ތަންތަނަށް ދޭ ހަމަލާތަކުގެ ސަބަބުން ފަލަސްތީނުގެ ކުޑަކުދިން މަރުވެފައިވާ މިންވަރަށް ފަހުގެ ހަނގުރާމައެއްގައި ކުރު މުއްދަތެއްގައި ކުޑަކުދިން މަރުވެފައި ނުވާކަމަށް އދ.ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް ވިދާޅުވެއްޖެއެވެ.
ޣައްޒާގައި ފަލަސްތީނުގެ އާންމުންނާ ދެކޮޅަށް އިސްރާއީލު ހިންގާ ގަތުލުއާންމުތަކާ ބެހޭގޮތުން އދ.ގެ ސަލާމަތީ މަޖިލީހުގައި ބޭއްވި ބައްދަލުވުމެއްގައި ވާހަކަ ދައްކަވަމުން ގުޓެރެސް ވިދާޅުވީ ޣައްޒާގައި އިސްރާއީލު ހިންގާ ފަދަ އަނިޔާވެރި ހަނގުރާމައެއް އޭނާ އދ.ގެ ސެކްރެޓަރީ ޖެނެރަލް ކަމުގެ މަގާމުގައި ހުންނަވަނިކޮށް ހިނގާފައި ނުވާކަމަށާއި އިސްރާއީލުން ޣައްޒާގެ މަދަނީ ތަންތަނަށް ދޭ ހަމަލާތަކުގެ ސަބަބުން ފަލަސްތީނުގެ ކުޑަކުދިން މަރުވެފައިވާ މިންވަރަށް ކުރުމުއްދަތެއްގައި ފަހުގެ ހަނގުރާމައެއްގައި ކުޑަކުދިން މަރުވެފައި ނުވާކަމުގައެވެ.
ގުޓެރެސް ވިދާޅުވިގޮތުގައި ޣައްޒާގައި އިސްރާއީލު ހިންގާ ހަނގުރާމައިގެ އަމަލުތައް ވަގުތީގޮތުން ހުއްޓާލާފައިވާއިރު ދެން އަމަލުތައް އަލުން ޣައްޒާގެ އާންމުންނާ ދެކޮޅަށް ފެށުމުގެ ފުރުސަތު ދެވިގެން ނުވާނެއެވެ. އަދި ހަނގުރާމަތަކުގައި މަދަނީ ތަންތަނަށް ހަމަލާދިނުމުގެ ގާނޫނާ އިސްރާއީލު ޚިލާފުވެފައިވާކަމަށާއި އިސްރާއީލުން އިންސާނީ ހައްގުތަކާއި އާންމުންގެ ފުރާނައަށް އިހުތިރާމު ނުކުރާކަމަށާއި މިއީ ވަރަށް ދެރަކަމެއްކަމަށް ގުޓެރެސް ވިދާޅުވިއެވެ.
ގުޓެރެސް ތަންކޮޅެއް ކުރިން ދެއްވި ބަޔާނެއްގައި ވަނީ ހަމާސް ޖަމާއަތުން މިދިޔަ މަހުގެ ހަތް ވަނަ ދުވަހު އިސްރާއީލަށް ހަމަލާ ދިނީ ސަބަބުތަކެއް ނެތި ނޫންކަމަށްވެސް ވިދާޅުވެފައެވެ.
ގުޓެރެސް ނުސީދާ ގޮތެއްގައި މި އިޝާރާތް ކުރެއްވީ އިސްރާއީލުން ފަލަސްތީނުގެ ބިންތައް ގަދަބާރުން ހިފައިގެން އޮންނަ އޮތުމަށާއި ކޮންމެ ދުވަހަކު އިސްރާއީލުން ފަލަސްތީނުގެ އެކި ތަންތަނަށް ހަމަލާދީ ގެތައް ތަޅައި އާންމުން މަރައި ހިންގަމުން ގެންދާ އަނިޔާވެރި ލާއިންސާނީ ޖަރީމާތަކަށް ކަމަށް ވަނީ ބެލިވިފައެވެ. ނަމަވެސް ގުޓެރެސް މިހެން ވިދާޅުވުމުން އިސްރާއީލު ވަނީ އެވާހަކަތައް ކުށްވެރިކޮށް ގުޓެރެސްގެ އިސްތިއުފާއަށް ގޮވާލާފައެވެ.
އިސްރާއީލުގެ އަނިޔާވެރިކަމާއި ލާއިންސާނީ ކަމުން މިހާރު އދ.ގައި އިސްރާއީލުވަނީ ވަރަށް ބޮޑަށް އެކަހެރިވެފައެވެ. އެމެރިކާއާއި އިނގިރޭސިވިލާތާއި ފަރަންސޭސިވިލާތާއި ޖަރުމަނުފަދަ ހުޅަނގުގެ އިސްތިއުމާރީ ބާރުތަކުން ނޫނީ އިސްރާއީލުގެ ދިފާއުގައި ވާހަކައެއް ނުދައްކައެވެ. އެނޫން ގައުމުތަކުން ގެންދަނީ އިސްރާއީލުން ޣައްޒާގެ އާންމުންނާ ދެކޮޅަށް ހިންގާ ގަތުލުއާންމުތައް ކުށްވެރި ކުރަމުންނެވެ.
ކުރިން އިސްރާއީލު ކުށްވެރިކޮށް ވާހަކަ ނުދައްކާ ރަޝިއާއާއި ޗައިނާއާއި ޖަޕާން ފަދަ ގައުމުތަކުންވެސްވަނީ ޣައްޒާގައި އިސްރާއީލު ހިންގާ ގަތުލުއާންމުތައް ކުށްވެރިކޮށް ވާހަކަ ދައްކާފައެވެ. ރަޝިއާ އިންވަނީ ފަލަސްތީނުގެ އާންމުން މަރައިގެން އަމާންކަން ލިބޭނެކަމަށް އިސްރާއީލު ހީކުރުމަކީ މޮޔަކަމެއްކަމަށް ބުނެފައެވެ.
ޗައިނާވަނީ ޣައްޒާއަށް ދޭ ހަމަލާތައް ހުއްޓާލައި އދ.ގެ ގަރާރުތަކަށް ބޯލަނބައި ފަލަސްތީނުގެ މިނިވަން ދައުލަތެއް އުފެއްދުމުގެ ފުރުސަތުދީގެން މައްސަލަ ހައްލު ކުރުމަށް އިސްރާއީލަށް ގޮވާލާފައެވެ. އެމެރިކާގެ ސެނެޓްގެ ޖާސޫސީ ކަންތައްތަކާބެހޭ ސަބްކޮމިޓީގެ ވެރިޔާވެސްވަނީ ޣައްޒާގައި އިސްރާއީލު ހިންގާ އަނިޔާވެރި އަމަލުތަކުގެ ސަބަބުން ދުނިޔޭގެ ގިނަ ބަޔަކު އިސްރާއީލާމެދު ނަފްރަތު ކުރަންފަށާފައިވާކަމަށް ވިދާޅުވެ ވާހަކަ ދައްކަވާފައެވެ. މިއީ އެމެރިކާގެ މަސްއޫލުވެރިއަކު މީގެކުރިން ވިދާޅުނުވާ ވަރުގެ ވާހަކައެކެވެ.