13 Dec 2023, 09:55
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ މުވައްޒަފުންނަށް މުސާރަދިނުމަށް ފީފާއިން އެއް ލައްކަ ޑޮލަރު ދީފިއެވެ.
އެފްއޭއެމްގެ މާލީ ހާލަތު ދަށްވެ، މުވައްޒަފުންނަށް މުސާރަ ނުދެވި ގިނަ ދުވަސްތަކެއް ވަނީ ވެފައެވެ. އެކަމާ ގުޅިގެން މުވައްޒަފުން މަސައްކަތަށް ނުކުތުން ހުއްޓާލުމާ އެކު، މުބާރާތްތައް ހިންގުމަށް ވެސް އެފްއޭއެމަށް ވަނީ ދަތިތަކަކާ ކުރިމަތިލާން ޖެހިފައެވެ.
އެފްއޭއެމްގެ އޮފިޝަލަކު "ސަން"އަށް ވިދާޅުވީ ފީފާއިން މިހާރު އެފްއޭއެމަށް އެއް ލައްކަ ޑޮލަރުގެ އެހީތެރިކަމެއް ދީފައިވާ ކަމަށާއި ނަމަވެސް އެ ފައިސާ ދީފައިވަނީ އެހެން ކަމަކަށް ހަރަދު ނުކޮށް، އެ ފައިސާ އިން މުވައްޒަފުންގެ މުސާރަތައް ހަމަޖެއްސުމަށް ޝަރުތުކުރުމަށްފަހު ކަމަށެވެ. އަދި، އޭގެ އިތުރަށް ވެސް ދެ ލައްކަ ޑޮލަރު ދޭން ފީފާއިން ނިންމާފައިވާ ކަމަށް އޭނާ ވިދާޅުވިއެވެ.
ފައިސާގެ ދަތިކަމުގެ އިތުރުން އެފްއޭއެމަށް ވަނީ ކޮރަޕްޝަންގެ ގިނަ ތުހުމަތުތަކެއް ވެސް ކުރެވިފައެވެ. އެ ތުހުމަތުތަކާ ގުޅިގެން ފުލުހުން ތަހުގީގުތަކެއް ހިންގާފައިވާ އިރު، އެފްއޭއެމުން ދަނީ އެ ތުހުމަތުތައް ދޮގުކުރަމުންނެވެ.
އެ މައްސަލައިގައި ކޯޓު އަމުރެއްގެ ދަށުން އެފްއޭއެމްގެ ރައީސް ބައްސާމް އަދީލް ޖަލީލްގެ ޕާސްޕޯޓު މިހާރު ހިފަހައްޓާފައިވާ އިރު، އެފްއޭއެމް ހިންގުމުގައި އިސްކޮށް ތިބި މީހުންގެ މައްޗަށް ކުރަނީ، އެ އެސޯސިއޭޝަނަށް ފީފާއިން ފޮނުވާ ފައިސާ ރާއްޖޭގެ ގާނޫނުތަކާއި ގަވާއިދުތަކާ ހިލާފަށް އެކި ކަންކަމަށް ބޭނުންކުރުމުގެ ތުހުމަތެވެ.
ޕީޖީން ބުނެފައިވަނީ ފައިސާއާ ގުޅުން ހުރި މިފަދަ ތަހުގީގުތަކުގައި ބޭންކް ކާޑުތަކުން މީހުން ކުރާ މުއާމަލާތްތައް މެދުވެރިކޮށް، ތަހުގީގަށް މުހިންމު މައުލޫމާތު ލިބޭ ކަމަށެވެ.
އެގޮތުން ތުހުމަތުކުރެވޭ މީހުން ކުރާ ދަތުރުތަކުގައި ކާޑު ބޭނުންކޮށްފައިވުމުން، އެ މީހުން ދިޔަ ހޮޓެލްތަކާއި ޝޮޕިން މޯލްތައް އެނގެން އޮތް ކަމަށް ބުނެފައިވެއެވެ. ނަމަވެސް އެފްއޭއެމްގެ މައްސަލައިގައި ދައުވާ ކުރުމުގެ ކުރިން އިތުރަށް ހޯދަން ޖެހޭ މައުލޫމާތު ހުރިކަން ޕީޖީން ފާހަގަކުރިއެވެ.
އެ މައްސަލައާ ގުޅިގެން ބައްސާމް ވިދާޅުވެފައިވަނީ އެފްއޭއެމްގެ އެއްވެސް ފައިސާއެއް އޭނާގެ އެކައުންޓަށް ވަދެފައި ނުވާނެ ކަމަށާއި ފީފާ އާއި އޭއެފްސީގެ އޮޑިޓްތަކުން ވެސް ކޮރަޕްޝަންގެ މައްސަލައެއް ފާހަގަކުރެވިފައި ނޯންނާނެ ކަމަށެވެ.