16 Dec 2023, 15:19
އެކި ގައުމުތަކުގެ ބިދޭސީން ވޯކް ޕާމިޓުގައި ރާއްޖެ އެތެރެވުމުގެ ކުރިން މެޑިކަލް ޓެސްޓުތައް ހަދައި، ރިޕޯޓު ހުށަޙަޅަންޖެހޭ ގޮތަށް އުސޫލު ބަދަލުކުރަންޖެހޭކަމަށް އިމިގްރޭޝަން ކޮންޓްރޯލަރު މުޙައްމަދު ޝަމާން ވަހީދު މިއަދު ވިދާޅުވެއްޖެއެވެ.
މިހާރު ވޯކް ޕާމިޓުގައި ބިދޭސީން ރާއްޖެ އެތެރެވާއިރު މެޑިކަލް ރިޕޯޓެއް ހުށަހަޅާކަށް ނުޖެހެއެވެ. ނަމަވެސް ރާއްޖެ އައިސް މެޑިކަލް ހަދަންޖެހޭކަމަށް އުސޫލެއް އޮތް ނަމަވެސް މިހާރު އެއަށް އަމަލެއް ނުކުރެއެވެ.
މެޑިކަލް ހެއްދުމެއް ނެތި ރާއްޖެ އެތެރެވުމަށް ބިދޭސީންނަށް އެއްވެސް ހުރަހެއް ނެތްއިރު، އެ ފަދަ ބިދޭސީންގެ ފަރާތުން ނުރައްކާތެރި ބަލިތައް ރާއްޖެ އެތެރެވެ ފެތުރުމުގެ ނުރައްކާ އިންތިހާއަށް ވަނީ ބޮޑުވެފައެވެ. ވަރަށް ފަހުން މިވަނީ ކުޅުދުއްފުށީ ސިޓީއިން ވެސް ފައިފަލަވާ ބަލި ޖެހިފައިވާ 17 ބިދޭސީއަކު ފެނިފައެވެ.
މި ކަމާ ގުޅިގެން "ސަން"އާ ވާހަކަދައްކަވަމުން ޝަމާން ވިދާޅުވީ ރަނގަޅު ނިޒާމެއްގައި ކަންކުރުން އެންމެ ރަނގަޅު ގޮތަކީ، ބިދޭސީން ރާއްޖެ އެތެރެވުމުގެ ކުރިން މެޑިކަލް ސްކްރީނިން ހެދުން ކަމަށެވެ. އަދި ވޯކް ޕާމިޓަށް އެދޭއިރު އެ ރިޕޯޓް ހުށަހެޅުންކަމަށެވެ.
"ރާއްޖެއަށް އެ މީހުން އައުމުގެ ކުރިން އެބަޖެހޭ ސްކްރީނިންއެއް ހެދެން. އެއީ ދުނިޔޭގެ އެހެން ތަންތަނުގައި ވެސް މި ކަން އޮންނަ ގޮތް. އެ ގައުމަކަށް އެތެރެވުމުގެ ކުރިން ހެލްތު ސްކްރީނިންއެއް ހެދިގެން މި ޖެހެނީ އެތެރެވާން. ފާސްވެ، ވެޓް ކުރެވިގެން މި އަންނަން ޖެހެނީ. އެކަމު ރާއްޖޭގައި މި އޮތީ އެ ގޮތެއް ނޫން. ކުރިން ވިއްޔާ ވިސާ ޖަހައިދެނީ ސީދާ މެޑިކަލް ހުށަހަޅައިގެން،" ޝަމާން ވިދާޅުވިއެވެ.
އޭނާ ވިދާޅުވީ ރާއްޖޭގައި މިހާރު އެ ކަން އޮތީ 'ހިތަށް އެރުމުން' ކުރާފަދަ ގޮތަކަށް ކަމަށެވެ. އަދި މެޑިކަލް ރިޕޯޓު ހުށަހަޅާއިރު ފޯޖުކޮށްފައި ހުންނަ މެޑިކަލް ރިޕޯޓު ހުށަހެޅި ނަމަވެސް އެ ކަން ޔަގީންކުރެވޭނެ އެއްވެސް ގޮތެއް ނެތްކަމަށެވެ.
އެހެންވެ، އެ ކަމަށް އޮތް އެންމެ ހަރުދަނާ، އެންމެ ރަނގަޅު ހައްލަކީ ދިވެހި ސަރުކާރުން ގަބޫލުކުރާ ބޭރުގެ ސިއްހީ ޚިދުމަތްދޭ ތަނަކުން މެޑިކަލް ހަދައި އެ ރިޕޯޓުގެ ނަތީޖާއަށް ބަލައި ރާއްޖެ އެތެރެވުމުގެ ހުއްދަ ދިނުންކަމަށް ވިދާޅުވިއެވެ.
އޭނާ ވިދާޅުވީ މީގެ ކުރިން ރާއްޖެ އައިސް މެޑިކަލް ހެދުމަށްފަހު މައްސަލަ ދިމާވުމުން ބައެއް ބިދޭސީން ފިލައިފައި ވެސް އެބަހުރިކަމަށެވެ.
"އެއީ އެ މީހުން އަންނަނީ ބޮޑެތި ލޯނުތަކާ އެއްޗެހި ދައްކައިގެންތާ. އެހެންވީމާ ރާއްޖެ އައިސް މެޑިކަލް އަންފިޓޭ ބުނީމަ އެބަ އެނގޭ ފޮނުވައިލާނެކަން އަނބުރާ ގައުމަށް. އެހެންވީމާ ފޮނުވައިލާނަމޭ ބުނީމާ އެ ބިރުގައި ފިލަނީ، އެެހެންވީމާ އެޗްއައިވީ ޖެހުނަސް، ހެޕަޓައިޓިސް ޖެހުނަސް، އެހެން އެއްޗެއް ޖެހުނަސް ފިލަނީ،" ޝަމާން ވިދާޅުވިއެވެ.
އެއާއެކު ޝަމާން ވިދާޅުވީ ބިދޭސީން ރާއްޖެ އެތެރެވުމުގެ ނިޒާމު ހަރުދަނާކުރުމަށް ޓަކައި ސަރުކާރާއެކު ގުޅިގެން ކުރިއަށްހުރި ދުވަސްތަކުގައި މުހިންމު ގިނަ މަސައްކަތްތަކެއް ކުރާނެ ކަމަށެވެ.
އަދި އެ ކަމަށް ޚާއްސަ މަޝްވަރާތައް ކުރިއަށް ގެންގޮސް، ގޮތްތަކެއް ކަނޑައަޅާނެކަމަށް ވިދާޅުވިއެވެ.
މި ފަހުން ރާއްޖެއިން މުޅިން ނައްތައިލައިފައި އޮއްވައި ފެތުރެން ފެށި މެލޭރިއާއާއި، ހިމަބިހީގެ ކޭސްތައް ވެސް އެންމެ ފުރަތަމަ ފެނުނީ ރާއްޖެ އެތެރެވި ބިދޭސީއެއްގެ ފަރާތުންނެވެ. ދެން މިހާރު މިވަނީ ފައިފަލަވާ ބަލި ފެނިފައެވެ.
އެއާއެކު ރައްޔިތުންގެ ކަންބޮޑުވުން ވަރަށް ބޮޑަށް އޮތީ އިތުރުވެފައެވެ.