16 Dec 2023, 19:58
ޖުމްހޫރީ ޕާޓީ (ޖޭޕީ)ގެ ޓިކެޓުގައި ކުރިއަށް އޮތް ރައްޔިތުންގެ މަޖިލިސް އިންތިޚާބުގައި ކުރިމަތިލާން ބޭނުންވާ ފަރާތްތަކަށް ފޯމު ހުށަހަޅަން ހުޅުވާލައިފިއެވެ.
ޖޭޕީން ނެރުނު އިއުލާނެއްގައި ބުނީ އެކަމަށް ޝައުގުވެރިވާ ފަރާތްތަކުން މި މަހުގެ 26ވާ އަންގާރަ ދުވަހުގެ މެންދުރުފަހު 14:00ގެ ކުރިން އެކަމަށް ޚާއްޞަކޮށްފައިވާ ފޯމް ފުރުމަށްފަހު ހުށަހަޅަން ވާނެ ކަމަށެވެ.
އެ ޕާޓީން އެދިފައި ވަނީ ފޯމާއެކު އެފަރާތްތަކުގެ ވަނަވަރާއި (ސީވީ)، ތައުލީމީ ސެޓްފިކެޓްތަކުގެ ކޮޕީއާއި، ދިވެހި ރައްޔިތެއްކަން އަންގައިދޭ ކާޑުގެ ދެ ފުށުގެ ކޮޕީ ހުށަހެޅުމަށެވެ.
އެ ޕާޓީން ބުނީ، މަޖިލިސް އިންތިޚާބުގައި ވާދަކުރުމަށް އެދި ހުށަހަޅާ ފަރާތްތަކުގެ މައުލޫމާތުގެ ސައްހަކަމާއި ގާބިލުކަން ބެލުމަށްފަހު އެ ފަރާތްތަކުގެ ކެންޑިޑެސީ ކަށަވަރު ވާނީ އެ ޕާޓީގެ ކައުންސިލުން ނުވަތަ އެކަމަށްޓަކާ ކައުންސިލުން ކަނޑައަޅާ ކޮމިޓީއަކުން ވަޒަންކޮށް ބެލުމަށްފަހު ކަމަށެވެ.
އަދި ފޯމު ހުށަހެޅުމުގެ ކަމަކާ ގުޅޭގޮތުން އިތުރު މައުލޫމާތު ބޭނުންވާނަމަ އެ ޕާޓީ އޮފީހުގެ ނަންބަރު 3014912 އަކަށް ގުޅުމަށް ވަނީ އެދިފައެވެ.
އަންނަ އަހަރު ބާއްވާ 20 ވަނަ މަޖިލިސް އިންތިޚާބުގައި ވާދަކުރުމަށް ޖޭޕީން މީގެ ކުރިން ވަނީ ސިޔާސީ ޕާޓީތަކާއެކު މަޝްވަރާ ބައްދަލުވުންތައް ބާއްވާފައެވެ. އެގޮތުން ވެރިކަން ކުރާ ޕީއެންސީއާއެކު މަޝްވަރާ ބައްދަލުވުންތައް ވެސް ބޭއްވިއެވެ.
މީގެ އިތުރުން ދާދި ފަހުން އެ ޕާޓީން ވަނީ، މަޖިލީހުގައި މިހާރު އަޣުލަބިއްޔަތު އޮތް އެމްޑީޕީއާއެކު ވެސް މަޝްވަރާ ބައްދަލުވުމެއް ބާއްވައިފައެވެ.
ދެހާސް ނަވާރަ ވަނަ އަހަރުގެ މަޖިލިސް އިންތިޚާބާ ޖެހުނު އިރު ސަރުކާރު ކޯލިޝަންގައި އޮތް ޖޭޕީން، އެ އިންތިޚާބުގައި އެމްޑީޕީއާ އެކު ވާދަކުރަން މަޝްވަރާ ކުރި ނަމަވެސް އެ ދެ ޕާޓީއަށް އެއްބަސްވުމަކަށް ނާދެވުނެވެ.
މިހާރު މަޖިލީހުގައި ތިބީ ޖޭޕީ ތަމްސީލު ކުރައްވާ ދެ މެންބަރުންނެވެ. އެއީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ގާސިމް އިބްރާހީމާއި ކެންދޫ ދާއިރާގެ މެންބަރު ޢަލީ ޙުސައިނެވެ.