19 Dec 2023, 14:00
އަންހެނަކު ލައްވައި ދައުވަތު ދީގެން، މީހަކު ގެސްޓް ހައުސަކަށް ގެނެސް އެ މީހާ ފޭރެން އުޅުނުކަމުގެ ތުހުމަތުގައި މާލެއިން ތިން މީހަކު ހައްޔަރުކޮށްފިއެވެ.
އެ މައްސަލައިގައި ހައްޔަރުކޮށްފައިވަނީ 21 އަހަރާއި 46 އަހަރުގެ ދެ ދިވެހި ފިރިހެނުންނާއި 18 އަހަރުގެ ދިވެހި އަންހެން ކުއްޖެކެވެ. މި ތިން މީހުންގެ ބަންދަށް ވެސް ކްރިމިނަލް ކޯޓުން އިއްޔެ ވަނީ 15 ދުވަސް ޖަހައިފައެވެ.
ތިން މީހުންގެ މައްޗަށް ވެސް ކުރެވެނީ ހުއްދަ ނޫން ގޮތުގައި މީހަކު ހިފަހައްޓައި، ފޭރެން އުޅުނުކަމުގެ ތުހުމަތެވެ.
މި ހާދިސާގައި އަނިޔާ ލިބުނު މީހާ ފުލުހުންނަށް ކިޔައިދީފައިވާ ގޮތުގައި ގެސްޓްހައުސަށް ދާން އޭނާއަށް ދައުވަތު ދީފައިވަނީ އަންހެން ކުއްޖާއެވެ.
ދައުވަތު ދީގެން ގެސްޓް ހައުސަށް ގެންދިއުމަށް ފަހު، އެ މީހާ ހިފަހައްޓައި، ފޭރެން މަސައްކަތްކޮށްފައިވާ ކަމަށް ފުލުހުން ވަނީ ތުހުމަތުކޮށްފައެވެ.
ތިން މީހުން ވެސް ހައްޔަރުކުރީ ސީނުން، ގެސްޓްހައުސް ތެރެއިންނެވެ.
މި މައްސަލައިގައި ހިމެނޭ 21 އަހަރުގެ ފިރިހެން މީހާއަކީ މީގެ ކުރިން 23 ފަހަރަށް ހައްޔަރުކޮށްފައިވާ މީހެކެވެ. ދެން ތުހުމަތުވާ 46 އަހަރުގެ މީހާ ހައްޔަރުކުރީއިރު އޭނާގެ ކަރުގައި އަނިޔާ ލިބުނު މީހާގެ ފަށެއް އޮތް ކަމަށް ވެސް ފުލުހުން ބުނެފައިވެއެވެ. އެ މީހާއަކީ ކުށުގެ ރިކޯޑު އޮތް މީހެކެވެ.
އެހެންވެ، ކްރިމިނަލް ކޯޓުން އިއްޔެ ވަނީ ތިން މީހުންގެ ބަންދަށް 15 ދުވަސް ދީފައެވެ. ބަންދުގެ މުއްދަތު ހަމަވާނީ އަންނަ މަހު ދޭއްގައެވެ.
ފާހަގަކޮށްލެވޭ ގޮތުގައި ހަށިވިއްކުމުގެ ތުހުމަތުގައި ވެސް އިއްޔެ ތައިލޭންޑު އަންހެނަކު ވަނީ ބަންދުކޮށްފައެވެ. އެ މީހާގެ ބަންދަށް ކޯޓުން ދީފައިވަނީ ތިން ދުވަހުގެ މުއްދަތެކެވެ.