01 Jan 2024, 11:02
ދުނިޔެއަށް ކުރިމަތިވެފައިވާ ގޮންޖެހުންތަކާއި ދުނިޔޭގެ ހާލަތު ރަނގަޅުކުރަން ގައުމުތަކުގެ ވެރިންނާ ގުޅިގެން މަސައްކަތްކުރައްވާނެކަމުގެ ޔަގީންކަން ރައީސް ޑރ.މުޙައްމަދު މުއިއްޒު މިއަދު ދެއްވައިފިއެވެ.
އެ މަނިކުފާނު މިފައިދައިން ވިދާޅުވީ، ގައުމުތަކަށް ފޮނުއްވި އާ އަހަރުގެ ތަހުނިޔާގެ މެސެޖެއްގައެވެ.
ތަހުނިޔާގެ މެސެޖުގައި ރައީސް މުއިއްޒު ވިދާޅުވީ، މި ފެށޭ އަހަރަކީ ގައުމުތަކުގެ ރައްޔިތުންނަށް ކާމިޔާބު، އުފާފާގަތި އަހަރަކަށްވުމަށް އުންމީދުކުރައްވާ ކަމަށެވެ.
އަދި، ގައުމުތަކާއި ރާއްޖެއާއި އޮތް ގުޅުން އިތުރަށް ބަދަހިވެ، އެއް ގައުމުން އަނެއް ގައުމަށްދޭ އެއްބާރުލުން އިތުރުވެގެންދާނެ ކަމަށް އުންމީދުކުރައްވާ ކަމަށް އެ މަނިކުފާނު ވިދާޅުވެފައިވެއެވެ.
އާ އަހަރުގެ ތަހުނިޔާ ބޮޑެތި ޖަމިއްޔާތަކުގެ ވެރިންނަށް ވެސް ރައީސް މުއިއްޒު ވަނީ ފޮނުއްވައިފައެވެ. އެގޮތުން އދ، ސާކް، އަދި ކޮމަންވެލްތު ފަދަ ޖަމިއްތާކުގެ ވެރިންނަށް އެ މަނިކުފާނު ވަނީ ތަހުނިޔާ ފޮނުއްވައިފައެވެ.
ރައީސް މުއިއްޒު ވަނީ ޤައުމުތަކުގެ ވެރިންނަށާއި، އެ ޤައުމުތަކުގެ ސަރުކާރަށާއި، ރައްޔިތުންނަށް ވަރަށް އިޚްލާޞްތެރިކަމާ އެކު ތަހުނިޔާއާއި ހެޔޮއެދުންތައް ފޮނުއްވާފައިވެއެވެ.