10 Jan 2024, 11:45
ގުދުރަތީގޮތުން ތަފާތު ރީތި ސިފަތަކެއް ލިބިގެންވާ ރަށްތަކުގެ ތެރެއިން ރަށެއް ކަމުގައިވާ ހދ. ކޭލަކުނުގައި އިކޯ ޓޫރިޒަމް ތަރައްގީކުރުމުގެ މަޝްރޫއެއް ހިންގަން ސަރުކާރުން ނިންމި ނިންމުމާ ގުޅިގެން ހަ ޖަމިއްޔާއަކުން މިއަދު ކަންބޮޑުވުން ފާޅުކޮށް، އެކަމާ ދެކޮޅަށް އަޑުއުފުލައިފިއެވެ.
މިދިޔަ އާދިއްތަ ދުވަހު ސަރުކާރުން ވަނީ ކޭލަކުނު އިކޯ ޓޫރިޒަމަަށް ތަރައްގީކުރަން ނިންމިކަން ހާމަކޮށްފައެވެ. އަދި، އެ ކަމުގެ އިތުރު މަޝްވަރާ އިކޮނޮމިކް ކައުންސިލުގައި ކުރަމުން އަންނަކަމަށް ވެސް ސަރުކާރުން ބުނެފައިވެއެވެ.
އެ މަޝްރޫއާ ދެކޮޅަށް އަޑުއުފުލައި ހަ ޖަމިއްޔާއަކުން ވަނީ ބާޔާނެއް ނެރިފައެވެ. އެއީ، ޒީރޯ ވޭސްޓް މޯލްޑިވްސް، ޓްރާންސްޕޭރެންސީ މޯލްޑިވްސް އަދި ސޭވް މޯލްޑިވްސް ކެމްޕެއިން, އެސޯސިއޭޝަން ފޯ ޑިމޮކްރަސީ، އީކޯކެއާ މޯލްޑިވްސްގެ އިތުރުން ބެލީފް މޯލްޑިވްސްއެވެ.
ހަ ޖަމިއްޔާއިން ގުޅިގެން ނެރުނު ބާޔާނުގައި ބުނެފައިވަނީ ގައުމީ ތަރިކައެއް ގޮތުގައި ހިމާޔަތްކޮށްފައި އޮންނަން ޖެހޭ ރަށެއް ކަމުގައިވާ ކޭލަކުނުގެ ދިރިހުރި ގުދުރަތީ ނެތިގެންގޮސްދާނެތީ ކަންބޮޑުވާ ކަމަށެވެ.
ކޭލަކުނުގެ ބިޔަ ބޯ ޖަންގަލި --- ފޮޓޯ/ޓުވިޓާ
މީގެ އިތުރުން، އެ ރަށް އީކޯޓޫރިޒަމް މަންޒިލެއްގެ ގޮތުގައި ތަރައްޤީކުރުމާ ދެކޮޅަށް ތެދުވުމުގެ އިތުރުން، ފަތުރުވެރިކަމުގެ ހަރަކާތްތަކުން ތިމާވެށީގެ އިކޯސިސްޓަމަށް ކުރިމަތިވަމުންދާ ނުރައްކާތައް ދެނެގަނެ، މިކަމާ މެދު ވިސްނާ މިކަން ހައްލުކުރުމަށް ސަރުކާރަށް އެ ޖަމިއްޔާތަކުން ގޮވާލިއެވެ.
ކޭލަކުނު އީކޯ ޓުއަރިޒަމަށް ތަރައްގީ ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
ކޭލަކުނަކީ ޖަންގައްޔެއްގައި ހުންނަ ސިފަތައް ހުންނަހެން ރާއްޖޭގައި އޮތް ހަމައެކަނި ރަށެވެ.
އެ ރަށަކީ ކުރީގައި މީހުން ދިރިއުޅުން ރަށެއް ނަމަވެސް މީލާދީ ގޮތުން 1820 ގައި ކުރި ގަދަ ވިއްސާރާގެ ސަބަބުން އެ ރަށް ސުންނާފަތިވެ، އެ ރަށުގައި ދިރިއުޅުނު މީހުން ރަށުން ފައިބައިގެން ދިޔައީ ކަމަށް ތާރީޚީ ފޮތްތަކުގައިވެއެވެ.