31 Jan 2024, 07:27
މީގެ ކުރިން ވެސް ފިލްމީ ދާއިރާއިން ދިގު މުއްދަތަކަށް ދުރަށް ޖެހިފައިވާތީ އެކަން ތަކުރާރު ނުކުރުމަށް ބޮލީވުޑްގެ މަގުބޫލު އެކްޓަރު ޝާހް ރުކް ޚާން ކިބައިން ސަޕޯޓަރުން އެދިފައިވާ ކަމަށް ޝާހު ބުނެފިއެވެ.
ފިލްމު "ޒީރޯ"އަށް ފަހު ބޮލީވުޑްގެ ފިލްމަކުން ޝާހު ނުފެނި ހަތަރު އަހަރު ވަނީ ވެފައެވެ. ހަތަރު އަހަރުގެ މެދުކެނޑުމަކަށް ފަހު އިންޑިއާގެ ކިންގް ޚާން އެނބުރި ސިނަމާއަށް އައީ މިދިޔަ އަހަރު ވަރަށް ވަރުގަދަ ތިން ފިލްމަކާ އެކުއެވެ. ކިޔުންތެރިން އިތުރު ތަފުސީލަކަށް ބޭނުން ނުވާ އެ ތިން ފިލްމަށް ލިބުނު ތަރުހީބަކީ މާ ގިނަ ދުވަސް ވަންދެން ޝާހު ބޮޑު ސްކްރީނާ ދުރުގައި ހުންނަން ސަޕޯޓަރުން ބޭނުންނުވާ ކަމުގެ ހެއްކެއް ކަމަށް އެކްޓަރު ވަނީ ބުނެފައެވެ.
މިދިޔަ އަހަރުގެ ޑިސެމްބަރ މަހު ބޮޑު ސްކްރީނަށް އައި ފިލްމު "ދުންކީ"ގެ ފޭން މީޓް އެންޑް ގްރީޓް ސެޝަންއެއްގައި ސަޕޯޓަރުންނާ އެކު ކުރިއަށް ދިޔަ މުއާމަލާތެއްގައި ޝާހު ބުނީ ފިލްމީ ދާއިރާގައި މެދު ނުކެނޑި 33 އަހަރު ވަންދެން އޭނާ މަސައްކަތް ކޮށްފައިވާ ކަމަށެވެ. މީގެ ކުރިން ކެރިއަރުގައި ކުޅުނު ފިލްމުތަކަށް މާ ބޮޑު ތަރުހީބެއް ނުލިބުމުން އެހާ ހާސްވެ ކަންބޮޑު ނުވާ ކަމަށެވެ. އެހެންނަމަވެސް މިހާރު އެ ހިޔާލު ދޫކޮށްލާފައިވާ ކަމަށާއި ކުރިއަށް އޮތް ތަނުގައި ފިލްމުތައް ހޮވުމުގައި އިސްކަމެއްދޭނީ ބެލުންތެރިންނަށް ކަމުދާނެ ފަދަ ތަފާތު ފިލްމުތަކަށް ސޮއިކުރުމަށް ކަމަށް 58 އަހަރުގެ އެކްޓަރު ވަނީ ބުނެފައެވެ.
ޝާހްރުކް ޚާން އަންހެނުން ގޯރީ އަދި ދަރިފުޅު ސުހާނާ ޚާންއާ އެކު--ފޮޓޯ/ފޭސްބުކް
ފިލްމު "ދުންކީ"އަށް ފަހު ހަތަރު މަހުގެ ބްރޭކެއް މަސައްކަތުން ނަގާފައިވާ ކަމަށާއި އެހެންނަމަވެސް ހަތަރު އަހަރު ނުވާނެ ކަމަށް ޝާހު ވަނީ ސަޕޯޓަރުން ގާތު ބުނެފައެވެ.
ޑައިރެކްޓަރު ރާޖް ކުމާރު ހިރާނީގެ ފިލްމަށް ފަހު ޝާހު ދެން އެންމެ އަވަހަށް ފިލްމީ މަސައްކަތެއް ފަށާނީ މި އަހަރުގެ އޭޕްރިލް މަހު ކަމަށް ރިޕޯޓުތަކުން ވަނީ ބުނެފައެވެ. މި ފިލްމަކީ، ދަރިފުޅު ސުހާނާ ޚާންއާ އެކު ޝާހު ފުރަތަމަ ފަހަރަށް ފެންނާނެ ފިލްމު ކަމަށް ފިލްމީ ޚަބަރުތަކުން ވަނީ ބުނެފައެވެ. ޑައިރެކްޓަރު ސިދާތު އާނަންދުގެ ފިލްމު ކުންފުނިން އުފައްދާ މި ފިލްމަކީ ސުހާނާގެ ކެރިއަރުގެ ދެ ވަނަ ފިލްމުވެސްމެއެވެ.