19 Mar 2024, 20:48
ހުޅުމާލޭގައި ކެމްޕެއިން ބެނާ ދަމާއިރު، އާންމު ޚިދުމަތްތައް ފޯރުކޮށްދިނުމަށް ސާވިސް ޕްރޮވައިޑަރުން އަޅާފައިވާ ނެޓްވޯކްތަކަށް ގެއްލުން ނުވާނޭހެން އެކަން ކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެފިއެވެ.
އެޗްޑީސީން ކުރި އިއުލާނެއްގައި ވަނީ، ޕޯސްޓަރުތަކާއި ބެނާތައް ހަރުކުރެވޭ ސަރަހައްދުގެ ގޮތުން ކަރަންޓު ކޭބަލާއި ފެނާއި ސަރުދަމާގެ ނިޒާމަށް ގެއްލުމެއް ލިބި ޚިދުމަތް މެދު ކެންޑިއްޖެ ހާލަތެއްގައި ރައްޔިތުންނަށް ގިނަގުނަ އުނދަގޫތަކާ ކުރިމަތިލާން ޖެހޭނެ ކަމަށެވެ.
އެހެންކަމުން ކުރިއަށް އޮތް ތަކުގައި މިފަދަ ކެންވަސްތަކާ ބެނާތައް ހަރުކުރާ ފަރާތްތަކުން މިކަމަށް ސަމާލުވެ، ކެމްޕެއިން މެޓީރިއަލް ހަރުކުރުމުގެ ކުރިން ކޯޕަރޭޝަންގެ ހުއްދަ ހޯދާ އެޗްޑީސީގެ ލަފައާ އިރުޝާދުގެ މަތިން އެކަން ކުރުމަށް އެޗްޑީސީން ވަނީ އިލްތިމާސްކޮށްފައެވެ.
އެޗްޑީސީން ބުނީ ރާއްޖޭގައި ބާއްވާ އިންތިޚާބުތަކާ ގުޅިގެން ކެމްޕެއިން ބެނާއާ ކެންވަސް މެޓީރިއަލް ހަރުކުރުމުގެ ފުރުސަތު ހަމަހަމަކަމާއެކު ހުރިހާ ފަރާތަކަށް ހޯދައިދިނުމަށް ކޯޕަރޭޝަނުން އަބަދު ވެސް މަސައްކަތް ކުރާކަމަށެވެ.
ހުޅުމާލޭގެ އެކި ސަރަހައްދުތަކުގައި މިހާރު ވެސް އެކި ސައިޒުގެ ބޮޑެތި ބެނާތަކާއި ކެންވަސްތައް ހަރުކޮށްފައި އެބަހުއްޓެވެ.
މި ފަދަ ބައެއް ތަކެތި ހަރުކޮށްފައި ހުންނަ ގޮތުގެ ސަބަބުން ދުއްވާ މީހުންނަށް ވެސް އެކަމުގެ ދައްޗާ ކުރިމަތިވެއެވެ.