26 Mar 2024, 12:35
ޓެލްއަވީވު (26 މާޗް 2024) : ޣައްޒާއާ ދެކޮޅަށް އިސްރާއީލު ދެމުން ގެންދާ ހަމަލާތައް ވަގުތުން ހުއްޓައިލުމަށް ގޮވައިލި ގޮވާލުމަށް އިސްރާއީލު ދެކޮޅު ހަދައިފިއެވެ.
އިސްރާއީލުގެ ދިފާއީ ވަޒީރު ޔޯވް ގަލަންޓް ބުނީ ސަލާމަތީ މަޖިލީހުގެ ގަރާރާ ގުޅިގެން އިސްރާއީލުގެ ސިޔާސަތަށް އެއްވެސް ބަދަލެއް ނާންނާނެ ކަމަށާއި ޣައްޒާއަށް ދޭ ހަމަލާތައް އިސްރާއީލުގެ މަގްސަދު ހާސިލުން ވަންދެން ހުއްޓުމެއްނެތި ކުރިޔަށްގެންދާނެ ކަމަށެވެ. އިސްރާއީލުގެ މީޑިއާ ބުނާގޮތުން އެގައުމުގެ ހަނގުރާމައިގެ ކެބިނެޓުންވެސްވަނީ ޣައްޒާއަށް ދޭ ހަމަލާތައް ހުއްޓާނުލުމަށް ނިންމާފައެވެ.
ޣައްޒާއަށް ދޭ ހަމަލާތައް އިސްރާއީލުން މައިގަނޑު ގޮތެއްގައި އަމާޒުކުރަނީ އެސަރަހައްދުގައި ދިރިއުޅޭ އާންމު ރައްޔިތުންނަށާއި ހޮސްޕިޓަލްތަކާއި އާންމުންގެ ގެދޮރުފަދަ މަދަނީ ތަންތަނަށެވެ. މިހަމަލާތަކުގައި އިސްރާއީލުވަނީ ޣައްޒާގެ އާންމުންގެ ތެރެއިން 32 ހާސް މީހުން ޝަހީދުކޮށްލައި 82 ހާހަށްވުރެ ގިނަ މީހުން ޒަޚަމްކޮށް ޣައްޒާގެ ގިނަ ހޮސްޕިޓަލްތައް ހަލާކުކޮށް އާންމުންގެ ގެދޮރު ބިމާ ހަމަކޮށްލާފައެވެ.
މީގެއިތުރުން ޣައްޒާގެ އާންމުން ބަނޑަށް ޖައްސައި ހައިހޫނުކަމުގައި މެރުން ވެސްވަނީ އިސްރާއީލުގެ ސިޔާސަތަކަށް ހަދައިފައެވެ. އިސްރާއީލު އަނިޔާވެރިކަން މިހާ ބޮޑަށް ހައްދު ފަހަނައަޅައިފައިވާތީ ސީއެންއެން ފަދަ ޔަހޫދީ މަހުޖަނުން ފަންޑްކުރާ އެމެރިކާއާއި ޔޫރަޕްގެ މެއިންސްޓްރީމް މީޑީއތަކުން ގެންދަނީ އިސްރާއީލުގެ މި ޖަރީމާތައް ފޮރުވުމަށް މަސައްކަތް ކުރަމުންނެވެ.
މިގޮތުން ޣައްޒާގައި އާންމުންނާ ދެކޮޅަށް އިސްރާއީލު ހިންގާ ޓެރަރިޒަމްގެ އަމަލުތަކާއި ގަތުލުއާންމުތަކާއި މީހުން ބަނޑަށް ޖައްސައިގެން މެރުމާއި ކާބޯތަކެތި ހޯދަން ކިޔޫގައި ތިބޭ މީހުންގެ ގަޔަށް ބަޑިޖަހައި މެރުންފަދަ އިސްރާއީލުން ހިންގާ ލާއިންސާނީ ޖަރީމާތަކުގެ ޚަބަރުތައް ސިއެންއެން އާއި ބީބީސީ އަދި އެ ނޫން ވެސް އެމެރިކާއާއި ޔޫރަޕްގެ މެއިންސްޓްރީމް މީޑީއާ ތަކުން ގެނެސްދިނުމަށް ދަނީ ފަސްޖެހެމުންނެވެ.
އިސްރާއީލުން އދ. ގެ ގަރާރަށް ބޯނުލަނބައި ޣައްޒާއަށް ދޭ ހަމަލާތައް ހުއްޓާނުލާނެކަމަށް ބުނުމުން އެމެރިކާގެ ކުރީގެ ރައީސް އަދި މި އަހަރުގެ ރިޔާސީ އިންތިޚާބުގައި ވާދަކުރައްވާ އެމެރިކާގެ އިދިކޮޅު ލީޑަރު ޑޮނަލްޑް ޓްރަމްޕް ވެސް ވަނީ ކަންބޮޑުވާކަން ހާމަކުރައްވާފައެވެ.
ޓްރަމްޕް ވިދާޅުވީ އިސްރާއީލުން ޣައްޒާއަށް ދޭ ހަމަލާތައް ނުހުއްޓައިފިނަމަ އިއާދަ ނުކުރެވޭ ވަރުގެ ބޮޑު ގެއްލުންތަކެއް އަޚުލާގީ ގޮތުން އިސްރާއީލަށް ލިބި އިސްރާއީލަށް އެހީތެރިވާ ހުޅަނގުގެ ހަމްދަރުދީ ވެސް އިސްރާއީލަށް ގެއްލި ދުނިޔޭގައި އިސްރާއީލު ވަރަށް ބޮޑަށް އެކަހެރިވެ އެކަނިވަމުންދާތަން މިހާރު ވެސް ފެންނަކަމުގައެވެ.
ޓްރަމްޕަކީ އިސްރާއީލުގެ ހަރުކަށި އަމަލުތަކަށް ހިއްވަރުދެއްވާ އަދި އިސްރާއީލުގެ ޖަރީމާތަކަށް ތާއީދުކުރުމުގެ ސިޔާސަތެއް ގެންގުޅުއްވާ ބޭފުޅެކެވެ.
އެމެރިކާގެ ވެރިކަމުގައި ޓްރަމްޕް ހުންނެވިއިރު އޭނާވަނީ ފަލަސްތީނާ ދެކޮޅަށް އިސްރާއީލު ހިންގި ޣައިރު ގާނޫނީ އަދި ސްޓޭޓް ޓެރަރިޒަމްގެ އެތައް އަމަލުތަކަކަށް ހިއްވަރު ދެއްވައި އިސްރާއީލަށް ހިފެހެއްޓުމެއްނެތި ތާއީދު ކުރައްވާފައެވެ.
މިހާރުވެސް ޓްރަމްޕަކީ އިސްރާއީލުގެ ސަޕޯޓަރެކެވެ. ފަލަސްތީނުގެ މިނިވަންކަމަށް މަސައްކަތްކުރާ ހަމާސް ޖަމާއަތުންވަނީ ހަމަލާތައް ވަގުތުން ހުއްޓައިލުމަށް ގޮވާލައި ފާސްކުރި އދ.ގެ ގަރާރަށް މަރުހަބާ ކިޔާފައެވެ.
މި ގަރާރު ގޮވާލަނީ ވަގުތުން ހަމަލާތައް ހުއްޓައިލުމަށާއި ޣައްޒާއަށް ބޭހާއި ކާބޯތަކެއްޗާއި އިންސާނީ އެ ނޫން ވެސް އެހީ ވެއްދުމުގެ ފުރުސަތު ދިނުމަށެވެ. އަދި ފަހުން ދާއިމީކޮށް ހަމަލާތައް ހުއްޓައިލުމަށެވެ.