09 Apr 2024, 22:51
ކުރީގެ ރައީސް އަބްދުﷲ ޔާމީން އަބްދުލްގައްޔޫމު އިސްވެ އުފައްދަވަން މަސައްކަތްކުރާ ޕީޕަލްސް ނެޝަނަލް ފްރަންޓް (ޕީއެންއެފް) އުފައްދަން ބާއްވާ ޖަލްސާ މިރޭ ޣިޔާސުއްދީން ސްކޫލުގައި ބާއްވަން ކުޑަތަންވެފައި އޮއްވައި ސްކޫލު ގޭޓު ފުލުހުން ބަންދުކޮށް، އިލެކްޝަންސް ކޮމިޝަންގެ މެމްބަރުން ވެސް ޖަލްސާއަށް ނުވެއްދުމުން އީސީގެ މެމްބަރުން އަނބުރާ ގޮސްފިއެވެ.
ޣިޔާސުއްދީން ސްކޫލުގެ ހޯލު ޕީއެންއެފަށް ކުއްޔަށް ދިން އެގްރިމަންޓު ބާތިލްކުރުމާއެކު ޕީއެންއެފްގެ ޖަލްސާ ބޭއްވުން ހުއްޓުވުމަށް ޓަކައި ފުލުހުން ވަނީ އެ ސްކޫލު ސަރަހައްދަށް ގޮސްފައެވެ. އަދި ސްކޫލު ގޭޓުވަނީ ބަންދު ވެސް ކޮށްފައެވެ.
އެހެންވެ އެ ޖަލްސާއަށް ހާޒިރުވާން ދިޔަ ގިނަ އާންމު މެމްބަރުންތަކަކަށް ޖަލްސާއަށް ވަދެވޭ ގޮތެއް ނުވިއެވެ. ނަމަވެސް ޕާޓީގެ އިސްވެރިން ސްކޫލަށް ވައްދައި، ބައެއް އާންމު މެމްބަރުން ވެސް ވަނީ ފުލުހުންގެ ސަފުތައް ފޫއަޅުވައިލުމަށްފަހު ގޭޓު ހުރަސްކޮށް ވަދެފައެވެ.
އެއާއެކު މިހާރު ޖަލްސާގެ ކޯރަމް ހަމަވީ ނަމަވެސް، އީސީގެ މެމްބަރަކު ހާޒިރުވެ ނެތުމުން ޖަލްސާ ކުރިއަށް ގެންދެވޭގޮތް ވަނީ ނުވެފައެވެ.
މި ކަމާ ގުޅިގެން "ސަން"އަށް މައުލޫމާތުދެއްވަމުން އީސީގެ މެމްބަރު ހަސަން ޒަކަރިއްޔާ ވިދާޅުވީ އެ ޖަލްސާ ބާއްވާ ތަނަށް އީސީގެ މެމްބަރުން ދިޔަކަމަށާއި އެހެން ނަމަވެސް ފުލުހުން އެ މެމްބަރުން ނުވެއްދި ކަމަށެވެ.
"އަޅުގަނޑުމެންނަށް އަމާންކަމާއެކު މަސައްކަތްކުރެވޭނެ މާހައުލެއް ގާއިމްވީމާ ދާނަން،" އޭނާ ވިދާޅުވިއެވެ.
ޕީއެންއެފް އުފެއްދުމުގެ ޖަލްސާ ޣިޔާސުއްދީން ސްކޫލުގައި ބާއްވަނީ އެ ޖަލްސާ ބޭއްވުމުގެ ހުއްދަ ބާތިލުކޮށް، އެކަން އަންގާފައި ވަނިކޮށް ކަމަށް ފުލުހުން މިރޭ ވަނީ ބުނެފައެވެ.
ޕީއެންއެފްއިން އަންނަނީ އެ ޖަލްސާއަށް ހުރަސް އަޅަނީ ސަރުކާރުން އަޑީގައި އޮވެގެން ކަމަށް ތުހުމަތު ކުރަމުންނެވެ.