08 May 2024, 07:39
މި މަހުގެ އެއްވަނަ ދުވަހު ނެޓްފްލިކްސްއިން ޕްރިމިއަކުރި ވެބް ސީރީޒް "ހީރާމަންޑީ"ގެ މުހިއްމު ރޯލަކުން ފެނުނު ބަތަލާ މަނީޝާ ކޮއިރަލާ ދެއްކި އެކްޓިންއަށް ކުރީގެ ބަތަލާ ރޭކާ ވަރަށް ބޮޑަށް ތައުރީފުކޮށްފިއެވެ.
މަނީޝާ "ހީރާމަންޑީ"ގައި ކުޅުނު މަލީކާޖާން ރޯލަކީ މީގެ 18 އަހަރު ކުރިން އެ ސީރީސްގެ ޕްރޮޑިއުސަރު ސަންޖޭ ލީލާ ބަންސާލީ ރޭކާއަށް ހުށަހެޅި ރޯލެއް ކަމަށާއި އޭރު ކޮންމެ ވެސް ސަބަބަތުކަކާ ހެދި ރޭކާވަނީ ލިބުނު ފުރުސަތު ދޫކޮށްލާފައެވެ. ސީރީޒް ބެލުމަށް ފަހު ބަތަލާ ރޭކާގެ ފޯނު ކޯލެއް މަނީޝާއަށް ލިބުނު ކަމަށާއި އެއީ ކެރިއަރުގައި މިހާތަނަށް ލިބުނު އެންމެ އުފާވެރި އެއް ފޯނު ކޯލު ކަމަށް މަނީޝާ ވަނީ ބުނެފައެވެ.
ރޭކާއަށް އެ ރޯލް ދޫކޮށްލަން ޖެހުމުން އެ ރޯލަށް އެންމެ އެކަށީގެންވާ ބަތަލާއަކީ މަނީޝާ ކަމަށާއި މަނީޝާ އެ ސީރީޒްއިން ފެންނާނެ ކަމަށް މީގެ ކުރިން ވެސް އުއްމީދުކުރި ކަމަށް ރޭކާ މަނީޝާ ގާތު ބުނެފައިވެއެވެ. ރޭކާ ފަދަ ތަޖުރިބާހުރި ސިނަމާގެ ބެލުންތެރިންގެ އިހުތިރާމު ލިބިފައިވާ ފަރާތަކުން އެފަދަ ބަސްތަކެއް އަޑުއިވުމަކީ އެވޯޑެއް ލިބުމަށްވުރެ މާ ބޮޑު އުފަލެއް ލިބޭ ކަމެއް ކަމުގައި މަނީޝާ ވަނީ ބުނެފައެވެ.
ވެބް ސީރީސް "ހީރާމަންޑީ"ގެ ޕޯސްޓަރެއް--ފޮޓޯ/ބޮލީވުޑްހަންގާމާ
މަނީޝާ ކޮއިރަލާ މުހިއްމު ރޯލް ކުޅުނު މި ސީރީޒްއަކީ އިންޑިއާއަށް މިނިވަންކަން ލިބުމުގެ ކުރިން ލާހޯރްގެ ރެޑް ލައިޓް އޭރިއާގައި އުޅުނު ޝާހީ ޖާރިޔާއިންގެ ވާހަކަ ގެނެސްދޭ ސީރީޒްއެކެވެ.
މަނީޝާގެ އިތުރުން "ހިރާމަންޑީ"ގައި ހިމެނޭ މައިގަނޑު ފިލްމީ ތަރިންގެ ތެރޭ ސޮނާކްޝީ ސިންހާ، ރިޗާ ޗައްޑާ، އަދިތީ ރާއޯ ހައިދަރީ، ޝަރުމިން ސޭގަލް އަދި ސަންޖީދާ ޝެއިހް ހިމެނެއެވެ. އަދި، ފަރުދީން ޚާނާއި ތާހާ ޝާހާއި ޝޭކަރް ސުމަންގެ އިތުރުން އޭނަގެ ދަރިފުޅު އަދިޔަޔަން ސުމަން ވެސް މި ސީރިޒްގައި މުހިއްމު ރޯލުތަކެއް ކުޅެފައިވެއެވެ.