15 May 2024, 19:34
ދިރާގުގެ ޕްރިޕެއިޑް ކަސްޓަމަރުންނަށް އަންލިމިޓެޑް ގްރޫޕް ކޯލިން ކުރެވޭ ފަދަ އެޑްއޮންއެއް ތައާރަފުކޮށްފިއެވެ.
އެ އޮފާގެ ދަށުން، ދިރާގު ކަސްޓަމަރުންނަށް އެޕް މެދުވެރިކޮށް 'ވާހަކަ އެޑްއޮން' އެކްޓިވޭޓްކޮށްގެން، އެ އެޑްއޮން ބޭނުންކުރާ އާއިލާ މެންބަރުންނާއި ރައްޓެހިންނަށް ހިލޭ ގުޅޭނެއެވެ.
ދިރާގުން ބުނީ ވަޓްސްއެޕް، ޓެލެގްރާމް ނުވަތަ ވައިބާ މެދުވެރިކޮށް މިގޮތަށް ކޯލަށް އިންވައިޓު ކުރެވޭނެ ކަމަށެވެ.
ފަންސާސް ރުފިޔާއަށް ލިބޭ އެ އެޑްއޮން 30 ދުވަހަށް ބޭނުންކުރެވުމުގެ އިތުރުން އެއާއެކު އެއް ޖީބީ މޮބައިލް ޑޭޓާ ވެސް ލިބޭނެއެވެ.
މިއަދު ދިރާގުން ބޭއްވި ނޫސްވެރިންގެ ބައްދަލުވުމެއްގައި އެ ކުންފުނީގެ މެނޭޖަ މާކެޓިން ކޮމިއުނިކޭޝަން ހަސަން ޝާރިހު ވިދާޅުވީ، މި އެޑްއޮންގެ އަމާޒަކީ މެސެޖު މެދުވެރިކޮށް ކިޔައި ނުދެވޭ އިހުސާސްތައް ފޯނުން ކިޔައިދިނުމުގެ ފުރުސަތު ފަހިކޮށްދިނުން ކަމަށެވެ.
"މިފަހަރު ވާހަކަ އެޑް އޮން މެދުވެރިކޮށް އަޅުގަނޑުމެން ބޭނުންވަނީ ވީހާވެސް ގިނަ ކަސްޓަމަރުން ވާހަކަދައްކަން. ޓެކްސްޓު ކުރުމުގެ ބަދަލުގައި، މި އެޑްއޮން އެންމެ 50 ރުފިޔާއަށް އެކްޓިވޭޓު ކޮށްލައިގެން އެންމެ 30 ދުވަހު ތިބޭފުޅުންނަށް އެކަކު އަނެކަކާ ހިލޭ ވާހަކަ ދައްކައިލެވޭނެ،" އޭނާ ވިދާޅުވިއެވެ.
ޝާރިހު ވިދާޅުވީ މި އެޑްއޮން ފަރުމާ ކޮށްފައިވަނީ އެކި އުމުރުފުރާތަކުގެ އެކި މީހުންނަށް ކަމަށެވެ.