06 Jun 2024, 07:35
މި އަހަރުގެ އޮކްޓޯބަރު މަހު ރިލީޒްކުރާ ފިލްމު "ދެވަރާ:ޕާޓް1"އަށް ސޮއިކުރި އެންމެ ބޮޑު އެއް ސަބަބަކީ ދުނިޔޭ ދޫކޮށްފައިވާ މަންމަގެ ހަނދާންތައް އާކުރުމަށް ކަމަށް ބަތަލާ ޖާންވީ ކަޕޫރު ބުނެފިއެވެ.
ފިލްމު "ދެވާރާ" މަޝްހޫރު ތެލުގޫ އެކްޓަރު ޖޫނިއަ އެންޓީއާރުގެ އާއިލީ ފިލްމު ކުންފުނިން ގެނެސްދީ އެކްޝަން ތުރިލާއެކެވެ. ޖޫނިއާ އެންޓީ އާރުގެ އިތުރުން ސައިފް އަލީ ޚާން ވެސް މި ފިލްމުގައި ޖާންވީއާ އެކު ފެންނާނެއެވެ. ވަރަށް ގިނަ ތަމަޅަ އަދި ތެލުގޫ ހިޓު ފިލްމުތައް ކުޅެފައިވާ ކުރީގެ ބަތަލާ ސްރީދޭވީ ފިލްމީ ދުނިޔެއަށް އެންމެ ފުރަތަމަ ތައާރަފުވެފައި ވަނީ ވެސް ތަމަޅަ ފިލްމަކުން ކުޑަ ކުއްޖެއްގެ ރޯލަކުންނެވެ.
މީޑިއާއަށް ދިން އިންޓަވިއުއެއްގައި ޖާންވީ ބުނެފައިވަނީ، ސައުތު ސިނަމާގެ ފިލްމުތަކުގައި މަސައްކަތްކޮށް އެ ބަހުރުވައި ވާހަކަދެއްކުމުން މަންމަ ސްރީދޭވީ ގާތުގައި ހުންނަކަމުގެ އިހުސާސް ވަރަށް ބޮޑަށް ކުރެވޭ ކަމަށެވެ. ޖާންވީގެ މަންމައަކީ އެންޓީއާރު އާއިލާ އަދި އެކްޓަރު ރާމް ޗަރަންއާ ވަރަށް ގާތް ގުޅުމެއް އޮތް މީހެއް ކަމަށާއި އެ އާއިލާގެ ފިލްމެއްގައި މަސައްކަތް ކޮށްލަން ލިބުމަކީ ފަޚުރުވެރިވާ ކަމެއް ކަމަށް 27 އަހަރުގެ ބަތަލާ ވަނީ ބުނެފައެވެ.
ޖާންވީ ކަޕޫރު ކުރީގެ ބަތަލާ އަދި މަންމަ ސްރީދޭވީއާ އެކު--ފޮޓޯ/ފިލްމުފެއަ
މަންމަ ސްރީދޭވީގެ އިތުރުން ބައްޕަ އަދި ޕްރޮޑިއުސަރު ބޮނީ ކަޕޫރަކީ ވެސް ސައުތު ސިނަމާގެ ގިނަ ފިލްމުތަކެއްގެ ރިމޭކް އުފައްދާފައިވާ ފަރާތެއް ކަމަށާއި ސައުތު ސިނަމާގެ ދުނިޔެއަކީ ޖާންވީއަށާއި ކޮއްކޮ ޚުޝީއަށް ވެސް ވަރަށް ޚާއްސަ އިންޑަސްޓްރީއެއް ކަމަށް ޒުވާން ބަތަލާ ވަނީ ބުނެފައެވެ.
ޖާންވީގެ ކެރިއަރުގެ ފުރަތަމަ ތެލުގޫ ފިލްމު ރިލީޒްކުރުމުގެ ކުރިން ބަތަލާގެ ސްޕައި ތުރިލާ ފިލްމު "އުލަޖް" ކުރިއަށް އޮތް ޖުލައި މަހުގެ ފަސްވަނަ ދުވަހު ރިލީޒްކުރުމަށް ވަނީ ނިންމާފައެވެ.