28 Sep 2024, 22:01
ޕިކަޕެއް ދަށުގައި މަސްތުވާތަކެތިކަމަށް ޝައްކުކުރެވޭ ރަބަރު ޕެކެޓުތަކެއް ފޮރުވަން އުޅުނު މީހަކު 15 ދުވަހަށް ބަންދުކޮށްފިއެވެ.
މި މައްސަލައިގައި ބަންދުކޮށްފައިވަނީ ކ. ގުރައިދޫ، ރޯޝަނީ މަންޒިލްގޭ އުމުރުން 49 އަހަރުގެ ޞާލިހު ވަފާދެވެ.
ކްރިމިނަލް ކޯޓުން މިއަދު ނެރުނު އަމުރުގައިވަނީ ފުލުހުންނަށް ފެނުމުން، އޭނާ ހުރި ދިމާލުގައި ޕާކުކޮށްފައި އޮތް ޕިކަޕެއްގެ ދަށަށް އެއްޗެއް ލައި، ފޮރުވަން މަސައްކަތް ކުރި ކަމަށެވެ. ފުލުހުން އެ އެތި ބެލިއިރު، މަސްތުވާތަކެތި ކަމަށް ބެލެވޭ އެއްޗެއްހުރި ހަތަރު ރަބަރު ޕެކެޓު ފެނިފައިވާ ކަމަށް ކޯޓު އަމުރުގައިވެއެވެ.
ޞާލިހުގެ ކުޑަކަމުދާ ތަކެތި ޓެސްޓު ކުރުމުން މަސްތުވާތަކެއްޗަށް ޕޮޒިޓިވްވި ކަމަށާ ފުލުހުން ތުހުމަތުކުރާ ގޮތުގައި އޭނާއަކީ ސްޓްރީޓް ލެވެލްގައި މަސްތުވާތަކެތި ވިއްކާ ފަރާތެއް ކަމަށް ކޯޓު އަމުރުގައިވެއެވެ.
އޭނާ ބަންދުގައި ބަހައްޓަންޖެހޭ ހަލާތެއް އޮތް ކަމަށް ކަނޑައަޅާފައިވަނީ މުޖުތަމައުގެ ސަލާމަތާއި ރައްކާތެރި ކަމަށްޓަކައެވެ. ކޯޓު އަމުރުގައިވާ ގޮތުން ޞާލިހަކީ މި ފަހުގެ ތާރީޚެއްގައި ވެސް މަސްތުވާތަކެތީގެ ރިކޯޑު އޮތް މީހެކެވެ. އަދި އޭނާއަކީ ވަޒީފާ އަދާކުރާ ފަރާތަކަށް ނުވާއިރު، އޭނާގެ އަމިއްލަ ބަހުން ވެސް އެއީ މަސްތުވާތަކެތީގެ ވިޔަފާރި ކުރާ މީހެއްކަން އެނގޭ ކަމަށް ކޯޓު އަމުރުގައިވެއެވެ.
މަސްތުވާތަކެތީގެ މައްސަލައަކީ ރާއްޖޭގައި ދިމާވެފައި އޮތް އެންމެ ބޮޑު އިޖުތިމާއީ މައްސަލައެވެ. މި މައްސަލަ ހައްލު ކުރުމަށް ޓަކައި ފުލުހުން އަންނަނީ މަސައްކަތްތަކެއް ކުރަމުންނެވެ.
ފުލުހުންގެ ތަފާސްހިސާބުން ދައްކާ ގޮތުގައި މި އަހަރުގެ މިހާތަނަށް މަސްތުވާތަކެއްޗާ ގުޅުންހުރި 2،217 މައްސަލައެއްގެ ރިޕޯޓު އެ އިދާރާއަށް ލިބިފައިވެއެވެ.