Last Updated: 1 decade 3 year ago
ރޭ ޑިއުޓީއަށް ދިއުމުގެ މަގުމަތީ ކ. ކާށިދޫގައި ތޫނު އެއްޗަކުން ހަމަލަދީ މަރާލި އާދަމް ހަލީމް 26،ގެ ވަޅުލާފައިވަނީ ތިން ބަޑީގެ ސަލާމަކާއެކު މިއަދު ހަވީރު 4:30 ހާއިރު ގަލޮޅުސަހަރާގަ އެވެ. ސަހަރާއަށް ގެންދިޔަ ވަގުތު އެސަރަހައްދަށް ގިނަ ބަޔަކު އެއްވެފައިވެ އެވެ. އަދި ރައީސް ޑރ. މުހައްމަދު ވަހީދު ހަސަން މަނިކާއި އިސްގާޒީ އަބުދުﷲ މުހައްމަދާއި މަޖިލިސް މެމްބަރުންގެ އިތުރުން ގިނަ އަދަދެއް ފުލުހުންނާއި ސިފައިން ގޮސްފައި ވެއެވެ.
ވަޅިން ހަމަލަ ދިނުމުގެ ސަބަބުން ލިބުނު ޒަޚަމްތަކަށް ކާށީދޫ ސިއްހީ މަރުކަޒުގައި ފަރުވާ ދެމުން ދަނިކޮށް މަރުވި ހަލީމްގެ މޫނު ދެއްކުން އޮތީ މިއަދު މެންދުރު 2:00 އިރު އިސްލާމީ މަރުކަޒުގަ އެވެ. ހަލީމްގެ މޫނު ދުށުމަށް ގިނަ އަދަދެއްގެ ފުލުހުންނާއި ސިފައިންނާއި އާންމު ރައްޔިތުން ގޮސްފައިވާއިރު ރައްޔިތުންގެ މަޖިލީހުގެ ބައެއް މެމްބަރުން ވެސް އިސްލާމީ މަރުކަޒަށް ވަޑައިގެންފައި ވެއެވެ. މި ސަރުކާރުގެ ވަޒީރުންނާއި ކުރީސަރުކާރުގައި ވަޒީރު ކަން ކުރެއްވި ބައެއް ބޭފުޅުން ވެސް އާދަމް ހަލީމްގެ މޫނު ބަލަން ވަޑައިގެންނެވި އެވެ. އަދި ރައީސް ޑރ. ވަހީދާއި ކުރީގެ ރައީސް މައުމޫނާއި އިސްގާޒީ އަބުދުﷲ މުހައްމަދުާއި ކުރީގެ ކޮމިޝަނާ ފަސީހު ވެސް ވަޑައިގެންނެވި އެވެ.
ހަލީމްގެ މޫނު ބެލުން ކުރިއަށް ދިޔަ ވަގުތު އެތަނަށް ދިޔަ އާއިލާމީހަކު ވަނީ ހޭނެތިގެން ހޮސްޕިޓަލަށް ވެސް ގެންގޮސްފަ އެވެ. މޫނުބެލުމަށް އާދަމް ހަލީމްގެ މަންމަ އާއި ބައްޕައާއި އަންހެނުންގެ އިތުރުން ތިން މަސްނުވާ ދަރިފުޅު ވެސް އިސްލާމީ މަރުކަޒަށް ދިޔަ އެވެ.
ޢަސުރު ނަމާދަށްފަހު އާދަމް ހަލީމްގެ ކަށުނަމާދު ކުރުން އޮތީ އިސްލާމީ މަރުކަޒުގަ އެވެ. ކަށުނަމާދު ކޮށްދެއްވީ އިސްލާމިކް މިނިސްޓާ ޝެއިޚް މުހައްމަދު ޝަހީމް ޢަލީ ސަޢީދެވެ.
ފުލުހުންގެ ވާޖިބު އަދާ ކުރެއްވުމަށް ޑިއުޓީއަށް ދަނިކޮށް ހަލީމްގެ ހަށިގަނޑުގެ ހަތަރު ތަނަކަށް ވަޅި ހަރައި މަރާލި ހާދިސާއާ ގުޅިގެން ފުލުހުން ވަނީ ކާށިދޫން ރޭ މީހަކު ވެސް ހައްޔަރުކޮށްފަ އެވެ.
ހޯމް މިނިސްޓަރު ޑރ. މުހައްމަދު ޖަމީލް އަހުމަދު ވިދާޅުވީ ހަލީމް މަރާލި މީހުން ގާނޫނުގެ ކުރިމައްޗަށް ހާޒިރުކޮށް، މަރަށް މަރު ހިފަން ބޭނުންވާ ކަމަށް ހަލީމްގެ ބައްޕަ އެދުނު ކަމަށެވެ.
އޭނާގެ މަރުގެ ހާދިސާ ސަރުކާރާއި ސިޔާސީ ޕާޓީތަކުން ދަނީ ކުއްވެރި ކުރަމުންނެވެ. އެމްޑީޕީން މިއަދު ނެރުނު ބަޔާނެއްގައި ބުނެފައި ވަނީ ހަލީމް މަރާލި މީހުންނަށް ދެވެން އޮތް އެންމެ ހަރުކަށި އަދަބު ދިނުމަށެވެ. އަދި ރަހުމް ކުޑަ ގޮތަކަށް ހަލީމް މަރާލުން އެމްޑީޕީން އެކަން ހަރުކަށި އިބާރާތުން ކުށްވެރިކޮށްފައިވެ އެވެ.
މިއީ ވަރަށް ބިރުވެރި މައްސަލައެއް. އަޅުގަނޑުމެން އަހުލާގު ނެތިގެން ގޮސް މީހުންގެ ފުރަނައަކީ ބުރަދަނެއް ނެއް އެއްޗަކަށް ވެގެން މިދަނީ. މިކަން ކަން ހުއްޓުވޭނީ މަރަށް މަރުހިފައިގެން
ވީއެންމެ އަވަހަކަށް މިކަން ތަހުގީގު ކުރަން އަޅުގަނޑު ވާނީ އަންގާފަ. މި އަމަލު ހިންގި ފަރާތް ވެސް މިވަނީ ހައްޔަރު ކުރެވިފަ. އޭގެ އިތުރުން ގައުމީ ދިދަ މިވަނީ ބައި ދަނޑިއަށް ތިރި ކުރެވިފަ. އަދި ފުލުހުންގެ ދިދަ ތިން ދުވަހަށް ތިރިކުރެވި. އަދި މަރުހޫމްގެ އާއިލާއަށް ދައުލަތުން ހަމަޖައްސަން ޖެހޭ އިނާޔަތްތަކާއި އަދި އެހެނިހެން ކަންތައްތައް ހަމަޖެއްސުމުގެ ކަންތައްތައް ކުރިއަށް ގެންދާނަން،